A catedral de Santiago deteriorouse máis desde os 80 que en oito séculos

 Os informes atribúen o desgaste ás visitas e a intervencións erróneas.

A Catedral de Santiago deteriorouse máis nos últimos trinta anos que no resto dos seus oitocentos de historia. É o que sinalan os informes técnicos resultantes das análises de seguimento realizados para coñecer a saúde do Pórtico da Gloria e dos principais elementos do templo. Así o explicou o director da Fundación Catedral, Daniel Lorenzo, tras a presentación da exposición Iacobus, que repasa a iconografía xacobea ao longo da historia.

Lorenzo asegurou que todos os estudos e as medicións sinalan que a catedral compostelá sufriu nos «últimos anos unha deterioración que se multiplicou exponencialmente» e que necesitará de «un esforzo investidor e organizativo extraordinario para poder facerlle fronte».

As razóns desta perda acelerada de saúde do monumento débense a varias causas. Unha das principais é o desgaste producido polos millóns de visitantes do templo. Unha deterioración que, segundo o director da Fundación Catedral, «ten que ser controlado porque somete á catedral a unha presión moi grande». Durante estes días, a fundación está a facer probas para o control do acceso de turistas ao Pórtico da Gloria, en parte para evitar desgastes innecesarios e «algunhas actuacións por parte de visitantes que o edificio non pode soportar».

Outra das circunstancias que afectan máis seriamente á saúde do edificio son algunhas das intervencións de conservación realizadas no pasado. Neste sentido, Daniel Lorenzo sinala que o cemento «nas cubertas e as fiestras estancas impediron que a pedra se ventilase de modo natural, o que aumentou a humidade no interior en lugar de rebaixala». No mesmo sentido, apunta que durante algúns anos se utilizou en conservación o método de encerar a pedra, «unha técnica que resultou ser moi nociva».

Apunta tamén a que a catedral se ve afectada por cuestións aparentemente inocuas: «Coa onda de calor, abríronse as portas da catedral e eses cambios bruscos de temperatura afectaron á pedra». A calor tamén afectou ao órgano da catedral. Daniel Lorenzo sinala que desde os anos 80 pódese comprobar a situación «comparando as fotos dos mesmos elementos entón e agora». Pero advirte que se se compara coas imaxes de 1926 «a deterioración dos últimos cen anos é inmenso».

Fonte: La Voz de Galicia, 2o xullo 2013