Galicia contará cunha rede virtual de traballo coa que optimizar a atención ao alumnado con alta capacidade intelectual

O conselleiro de Cultura, Educación e Ordenación Universitaria, Xesús Vázquez Abad, mailo reitor da Universidade de Santiago de Compostela (USC), Juan Casares Long, veñen de asinar un protocolo de colaboración mediante o que optimizar a atención ao alumnado do país con alta capacidade intelectual, que pasa inicialmente por crear unha rede virtual de traballo para o intercambio de experiencias deste colectivo.

A iniciativa ten por obxectivo elaborar un protocolo para a identificación das alumnas e alumnos que conten con altas capacidades intelectuais e presenten, polo tanto, necesidades específicas de apoio educativo.

Para atallar este proceso de identificación e apoio ao alumnado, ámbalas dúas entidades comprometéronse a crear unha rede virtual de traballo, na que colaborará un grupo mixto de expertos formado, entre outros, por investigadores da USC.

Fonte: Codigocero

Foto: JJMerelo