Ánxela Gracián gaña o 10º Premio Meiga Moira de Literatura Infantil e Xuvenil 2022

Reunido e mirando á Baía da Coruña, hoxe 17 de maio de 2022 o xurado do 10.º Premio Meiga Moira, integrado por Violeta Meléndrez (influencer e bookstagramer divulgadora da literatura galega nas redes sociais), Pilar Ponte (profesora de ensino medio, dinamizadora da normalización lingüística no ensino e na sociedade e activista cultural), Armando Requeixo (investigador no Centro Ramón Piñeiro, profesor na USC, crítico literario e promotor do blog Criticalia), Blanca-Ana Roig (profesora na USC, investigadora da literatura infanto-xuvenil galega e crítica literaria), e Olalla Sánchez (xornalista de La Voz de Galicia e divulgadora da literatura infanto-xuvenil), outorgou por unanimidade o premio á obra Donas de nós, presentada baixo o lema “María Balteira”, que resultou ser da escritora Ánxela Gracián.

O xurado valorou en Donas de nós:

A súa proposta de revisión e reescrita da mellor tradición literaria ao incorporar como protagonistas personaxes como o Mago Merlín, a Fada Morgana, o Príncipe Azul ou os Reis Provenzais, creando un artefacto dramático metaliteraturizado non exento de humor e ironía, onde se visitan e actualizan temas importantes do noso tempo e de todo tempo dando unha ollada claramente identificada e feminista.

Tamén si, coa súa decisión quixo apostar pola escrita teatral como xénero idóneo para achegar os valores da creación literaria e como vehículo para convidar á mocidade a coñecer e recoñecer o mundo que nos rodea, as súas problemáticas e os seus retos e os camiños aínda por andar, así como unha ferramenta para o desenvolvemento persoal.

A obra premiada recibirá unha dotación económica a de 2.000 euros e será publicada por Baía Edicións na súa colección Meiga Moira.

Ánxela Gracián en 2018 foi gañadora coa obra As voces da auga, compartindo o premio con Pere Tobaruela e a súa obra Auga e Lume.

Baía conta con varios candidatos nos premios Follas Novas do Libro Galego

Felices de contar con catro dos nosos títulos como candidatos na primeira fase de selección da edición deste 2022 dos premios Follas Novas do Libro Galego. Nesta edición dos Follas Novas ampliouse o proceso de elección dos premios cunha nova fase antes da designación de finalistas. Os premios Follas Novas están organizados pola Asociación de Escritoras en Lingua Galega, a Asociación Galega de Editoras e a Federación de Librarías de Galicia. Os candidatos son:

Divulgación

Desmontando o corpo, construíndo a ciencia. As xemelgas Fernández de la Vega, de Andrea Barreira.

Infantil

Don Carlos e o misterio dos lucecús, de Patricia Torrado Queiruga, ilustrado por Xan López Domínguez.

Libro ilustrado

XelArias, palabra á intemperie, de Emma Pedreira, ilustrado por Laura Romero.

Teatro

República Sideral, de Esther F. Carrodeguas.

 

Máis información

Celebramos este martes 8 de marzo o Día internacional da Muller

O Día Internacional da Muller Traballadora, tamén chamado Día Internacional da Muller, conmemora a loita da muller pola súa participación, en pé de igualdade co home, na sociedade e no seu desenvolvemento íntegro como persoa. Celébrase o día 8 de marzo.

Baía Edicións participa deste Día recordando moitos dos seus títulos onde, dun xeito ou outro, fai unha homenaxe á muller:

O Concello da Coruña aborda este ano a campaña conmemorativa do 8 de marzo, Día Internacional das Mulleres, a través dun programa de actividades que ten como lema “Importa e moito” e por obxectivos principais:

  • Remover situacións e tratos inxustos potenciando as calidades e logros que proporciona a idade e cuestionando o que se dá por inmutable.
  • Abordar a discriminación por razón de imaxe física (delgadez/gordura – gordofobia-…) e os seus efectos sobre a saúde e o benestar na adolescencia (trastornos de conduta alimentaria).
  • Abordar a situación, papel e representación das mulleres nos ámbitos de publicidade, teatro, animación, cinema,…
  • Abordar o xénero e a migración co obxectivo de contemplar outras miradas que rompan cos estereotipos existentes asociados á cor de pel, cultura, rompendo coa tendencia para homoxeneizar a todas as mulleres migrantes e visibilizando as súas achegas.

Máis información

Baía Edicións convoca o 10º PREMIO MEIGA MOIRA de Literatura Infantil-Xuvenil

O prazo de recepción de orixinais do 10º Premio Meiga Moira de Literatura Infantil-Xuvenil remata o 2 de abril e a resolución do xurado darase a coñecer o DÍA DAS LETRAS GALEGAS, 17 de maio de 2022.

PARTICIPA!!

Recordamos as bases do concurso e as obras gañadoras do ano 2018, xa que o 9.º Premio Meiga Moira de Literatura Infantil e Xuvenil quedou deserto:

Baía Edicións fará entrega do III Premio Fina Casalderrey o próximo 17 de novembro

Baía Edicións fará entrega do III Premio Fina Casalderrey de Literatura Infantil pola Igualdade á autora, Marta Lado por A pita xefa. No acto participará Valentín García Gómez, secretario Xeral de Política Lingüística, Belén López Vázquez, directora de Baía Edicións e a autora e gañadora do premio, Marta Lado. Terá lugar no Pazo de San Roque de Santiago de Compostela o mércores día 17 de novembro ás 12:00 horas.

O Xurado do III Premio Fina Casalderrey de Literatura Infantil pola Igualdade estivo formado por Charo Baleirón Soñora, coordinadora do Departamento de Innovación Pedagóxica das Escolas Católicas en Galicia e dos recoñecidos Premios Frei Martín Sarmiento; María Jesús Fernández Fernández, socia fundadora de Gálix, colaboradora de revistas como CLICJ, Revista Galega de Educación, Platero e Criaturas, nas que centra o seu interese na divulgación da literatura infantil e xuvenil; Esther Gómez Suárez, propietaria da Libraría Moito Conto (A Coruña); Ángeles Roca López, Bibliotecaria, actualmente xubilada, gañou o Premio Nacional de Animación á Lectura, pola súa creación do Moucho Leroucho, auténtico dinamizador da lectura e do libro para xeracións de nenas e nenos de Cambre e Tania Vázquez García, profesora de ensino secundario, filóloga, investigadora e colaboradora de diversos plans de lectura e igualdade.

Aberta a plica correspondente, resultou ser a gañadora do premio a obra de Marta María Lado Ínsua, que leva como título definitivo A pita xefa.

O Xurado manifestou, entre outros aspectos, o seguinte:

“A temática axústase estritamente ás bases, criticando os roles de xénero tan asentados na nosa sociedade e loitando contra os estereotipos, cunha historia orixinal, divertida e reivindicativa sen caer en dogmas nin estereotipos.

Enmárcase nun mundo animal-natureza co que é doado que se identifiquen as lectoras e lectores aos que vai dirixida, considerando un acerto o emprego da imaxe do galiñeiro, que ilustra perfectamente as leis que rexen o comportamento dos distintos individuos que o forman, piramidal e dominada polo galo.

Abre a porta a unha mudanza dos comportamentos estabelecidos dun xeito lúdico sen caer no dirixismo e tratando á rapazada con intelixencia. Anima a romper cos esquemas sexistas dominantes, pon de manifesto  a utilidade da unión e anima  a loitar por un obxectivo igualitario.

O emprego do galego está moi coidado, presentando estruturas e léxico do noso, resultando un texto, fresco, divertido, con musicalidade, conectado con refráns e bastante retranca. A linguaxe é clara e está ben adaptada a primeiras lectoras e lectores.

Trátase, á fin, dun texto rico en imaxes, o que favorecerá o traballo de ilustración da obra. Ambos rexistros, texto e imaxe, poderán perfectamente complementarse e dar lugar a un fermoso álbum ilustrado”.

A obra será publicada por Baía Edicións en álbum ilustrado a toda cor na colección Contoxconto e a autora recibirá 2 500 € cos que está dotado este premio.

O Premio Fina Casalderrey de Literatura pola Igualdade trátase do primeiro destas características que se convoca en Galicia, xurdido a raíz das carencias percibidas dalgunhas temáticas nos contos infantís, temáticas  que poden axudar á construción dun imaxinario en igualdade entre mulleres e homes xa desde a infancia, necesario para un mundo máis xusto.

Celebramos hoxe o Día das Escritoras

Hoxe, 18 de outubro, celebramos o Día das Escritoras, día que se convoca o luns máis próximo á data do 15 de outubro. É unha conmemoración iniciada en España en outubro de 2016 para recuperar o legado das mulleres escritoras, facer visible o traballo das mulleres na literatura e combater a discriminación que sufriron ao longo da historia.

O Día das Escritoras é unha iniciativa promovida pola Biblioteca Nacional de España en colaboración coa  Federación Española de Mujeres Directivas, Ejecutivas, Profesionales y Empresarias (FEDEPE) e coa Asociación Clásicas y Modernas. Desde 2016 búscase reivindicar o labor e o legado das escritoras a través da historia.

Desde Baía Edicións queremos felicitar a todas e cada unha das escritoras do panorama editorial e concretamente a todas as que confiaron en Baía Edicións para xestionar as súas publicacións! Parabéns!

Marta María Lado Ínsua gaña o III Premio Fina Casalderrey de Literatura Infantil pola Igualdade

O Xurado do III Premio Fina Casalderrey de Literatura Infantil pola Igualdade estivo formado por Charo Baleirón Soñora, coordinadora do Departamento de Innovación Pedagóxica das Escolas Católicas en Galicia e dos recoñecidos Premios Frei Martín Sarmiento; María Jesús Fernández Fernández, socia fundadora de Gálix, colaboradora de revistas como CLICJ, Revista Galega de Educación, Platero e Criaturas, nas que centra o seu interese na divulgación da literatura infantil e xuvenil; Esther Gómez Suárez, propietaria da Libraría Moito Conto (A Coruña); Ángeles Roca López, Bibliotecaria, actualmente xubilada, gañou o Premio Nacional de Animación á Lectura, pola súa creación do Moucho Leroucho, auténtico dinamizador da lectura e do libro para xeracións de nenas e nenos de Cambre e Tania Vázquez García, profesora de ensino secundario, filóloga, investigadora e colaboradora de diversos plans de lectura e igualdade.

Aberta a plica correspondente, resultou ser a gañadora do premio a obra de Marta María Lado Ínsua, que leva como título definitivo A pita xefa.

O Xurado manifestou, entre outros aspectos, o seguinte:

“A temática axústase estritamente ás bases, criticando os roles de xénero tan asentados na nosa sociedade e loitando contra os estereotipos, cunha historia orixinal, divertida e reivindicativa sen caer en dogmas nin estereotipos.

Enmárcase nun mundo animal-natureza co que é doado que se identifiquen as lectoras e lectores aos que vai dirixida, considerando un acerto o emprego da imaxe do galiñeiro, que ilustra perfectamente as leis que rexen o comportamento dos distintos individuos que o forman, piramidal e dominada polo galo.

Abre a porta a unha mudanza dos comportamentos estabelecidos dun xeito lúdico sen caer no dirixismo e tratando á rapazada con intelixencia. Anima a romper cos esquemas sexistas dominantes, pon de manifesto  a utilidade da unión e anima  a loitar por un obxectivo igualitario.

O emprego do galego está moi coidado, presentando estruturas e léxico do noso, resultando un texto, fresco, divertido, con musicalidade, conectado con refráns e bastante retranca. A linguaxe é clara e está ben adaptada a primeiras lectoras e lectores.

Trátase, á fin, dun texto rico en imaxes, o que favorecerá o traballo de ilustración da obra. Ambos rexistros, texto e imaxe, poderán perfectamente complementarse e dar lugar a un fermoso álbum ilustrado”.

A obra será publicada por Baía Edicións en álbum ilustrado a toda cor na colección Contoxconto e a autora recibirá 2 500 € cos que está dotado este premio.

O Premio Fina Casalderrey de Literatura pola Igualdade trátase do primeiro destas características que se convoca en Galicia, xurdido a raíz das carencias percibidas dalgunhas temáticas nos contos infantís, temáticas  que poden axudar á construción dun imaxinario en igualdade entre mulleres e homes xa desde a infancia, necesario para un mundo máis xusto.

Baía Edicións convoca o III PREMIO FINA CASALDERREY de literatura infantil pola igualdade

Co motivo da celebración do 8 de marzo, para promover a educación en igualdade e como homenaxe a todas as persoas que fixeron a aposta de escribir literatura infantil non sexista, Baía Edicións, coa colaboración da Secretaría Xeral de Política Lingüística da Xunta de Galicia, convoca o III PREMIO FINA CASALDERREY de Literatura Infantil pola igualdade, que se rexerá polas seguintes bases:

BASES DO CONCURSO

Primeira

Poderán concorrer ao premio todas as autoras e autores de calquera nacionalidade que presenten os orixinais escritos en lingua galega conforme a normativa vixente.

As obras deberán atender ao concepto de literatura infantil non sexista e coeducativa en calquera dos seus aspectos, introducindo elementos críticos que cuestionen o modelo social sexista dominante.

Segunda
As obras a concurso deben ser orixinais, inéditas e non premiadas. O feito de participar implica o compromiso de non optar a outros premios coas mesmas obras mentres non se resolva este, compromiso que se estenderá máis aló da resolución de resultar gañadora.
Aproveitamos para lembrarmos as obras gañadoras do I e II Premio Fina Casalderrey de Literatura Infantil pola Igualdade, de especial interese por tratar temas necesarios:
A ocupación do espazo central no patio do colexio, na actualidade maioritario para os nenos, resultando unha radiografía sexista, da que diversos estudos están a poñer a atención. Ese é o tema que Antía Yañez aborda n’A reconquista.
Calcúlase que 800 millóns de mulleres no mundo están menstruando á vez, no que supón o maior derramamento de sangue pacífico no mundo. No entanto, a sociedade oculta este feito, mitifícao e mesmo o discrimina con certas actitudes. Desde logo, os contos infantís non o teñen moito en conta, pero Sabela Losada Cortizas si, dando como resultado Vermella.
O País do Gran Furado, de Xerardo Quintiá é unha obra que resalta polo seu humor irreverente, pola súa transgresión dos contos populares e por reivindicar a poesía, a alegría e a revolución como camiños para procurar a igualdade.

Baía Edicións regala unha máscara cirúrxica con cada libro

A lectura como actividade individual non leva risco de contaxio; a compra de libros en librarías tampouco implica maior perigo que ir, por exemplo, polo pan, sempre que se manteñan as razoables medidas de protección xeral aconselladas pola administración sanitaria.

Se ademais, ao facerse cun libro, este leva no seu interior unha máscara de protección individual, podemos concluír que a actividade de ler é non só é recomendable en todo momento, tamén é aconsellable no actual estado de alarma para frear os efectos do contaxio do coronavirus.

Por iso, Baía Edicións, seguindo as medidas promovidas desde o inicio do estado de alarma, entregará unha máscara cirúrxica con cada libro adquirido a través da súa web até fin de existencias coas que conta.

Esta acción enmárcase na campaña xeral de fomento da lectura como actividade individual saudable e estimulante e do recoñecemento da importancia de todas as partes implicadas na súa creación e divulgación.

Accións de promoción da lectura que agora veñen complementar as levadas, xa nos primeiros días de confinamento absoluto, por Baía Edicións, cando liberou, co compromiso solidario de máis de catorce autoras, autores, ilustradoras e ilustradores e a colaboración dos medios de comunicación, dez libros para unha lectura en familia, que tan útiles resultaron tamén para seguir os plans lectores dos centros educativos, e puxo en marcha unha intensa campaña nas redes sociais de colaboradoras e colaboradores de todas as idades con actividades que tiñan como centro de actuación o libro galego e a súa lectura.

Ás accións postas en marcha, no momento máis crítico para o sector, como a decisión de suprimir os gastos de envío para pedidos online e que todas persoas interesadas puidesen facerse coa lectura desexada que até ese momento conseguían a través das librarías de proximidade, e que, a partir da semana que vén, se completará co agasallo de unha máscara de protección por cada pedido recibido, e que agora se manifestan tamén coa participación, xunto con outras editoras galegas, nas medidas de apoio ás librarías de proximidade que a distribuidora Consorcio Editorial Galego está implementando nesta semana das Letras Galegas para #DesconfinarALingua galega.

TVE emitirá o material inédito consultado por María Lopo no libro “Cartas no exilio”

TODO OU NADA, MARÍA CASARES

O domingo 29 de decembro de 2019 ás 21:30 h. en La 2: “Essentials” – Premio Nacional de Televisión 2019-. Produción propia de RTVE

María Casares é unha das grandes divas do teatro francés do século XX. E a pesar de ser galega, descoñécese en España.

O exilio foi, a pesar diso, o motor que moveu a vida e a paixón de María Casares, a gran diva do teatro francés do século XX. Nacida en Galicia, construíu unha carreira impecable e recoñecida por críticos e público.

Ver e escoitar a María Casares incluso a través dunha pantalla de televisión é unha experiencia intensa e emocionante. Ver en directo, no mesmo escenario, como a actriz Tina Sainz, ou desde a butaca, como o director de teatro Lluís Pasqual, significa entrar en estado de choque. A actriz naceu na Coruña en 1922, e sendo filla de Santiago Casares Quiroga, o xefe do goberno o día do golpe de Estado do 36 de marzo marcouna de por vida. Tivo que exiliarse coa súa nai e comezar de cero en París, onde tamén sufriron a ocupación alemá durante a Segunda Guerra Mundial.

Durante a súa vida traballou cos autores e directores máis importantes de teatro e cine da escena francesa, incluído o amor da súa vida, o escritor e nobel Albert Camus, como conta a súa filla Catherine Camus no documental. Os personaxes clave como o director Jorge Lavelli recordan como se enfrontou ao escenario; e a biógrafa de Casares, María Lopo (Cartas no exilio) ou a profesora de teatro da Royal Central School da Universidade de Londres, María Delgado, informan dos momentos cruciais na súa vida.

Ademais de ter algúns momentos valiosos gravados por TVE, como o seu regreso a España despois de 40 anos de exilio para representar “El Adefesio” de Rafael Alberti en 1976, este documental requiriu unha laboriosa investigación dos fondos documentais, na súa maioría en Caen, e Aviñón. Estes permitiron descubrir fotografías e vídeos nunca amosados ​​en España. Estas cidades, e especialmente París, tamén foron lugares de filmación. Tamén A Coruña, – onde a casa familiar é un museo – así como as praias dos arredores que o conectaban co seu amado océano.

“Durante moitos anos vivín nun estado de urxencia”, dixo María Casares, e iso podería aplicarse a maior parte da súa vida. Levada pola súa paixón polo teatro sempre experimentou para non estancarse. Envolto en todas esas vidas que viviu no escenario, non abandonou a memoria da súa orixe: nunca renunciou á nacionalidade española.