Artigos

Baía Edicións presenta ‘En branco e negro’, de Pere Tobaruela, en Mondoñedo

Chus Amieiro e Baía Edicións presentan o libro En branco e negro na Casa da poeta (Casa de Mañas. Calvela 1, Vilamor, Mondoñedo), o venres, 13 de abril ás 20:00 horas.

O acto contará coa participación de Chus Amieiro, Belén López Vázquez (Directora de Baía Edicións) e de Pere Tobaruela, autor do libro.

Contido do libro

Sara Martí, a protagonista de En branco e negro, é unha xornalista que se nega a aceptar a realidade tal como é. Así o manifesta nos seus artigos de opinión en Coses Nostres. A través de vivencias propias e alleas, Sara vai tecendo unha historia salpicada de recordos amargos: o exterminio nazi, unha violación, a guerra dos Balcáns, o asasinato dun ser querido, as represalias do réxime ditatorial na Guinea Ecuatorial despois da súa independencia, o desacougo dun amor frustrado…

Mais non todo é negro na vida de Sara, pois, como di un dos personaxes, recordando as palabras de Ernesto Sábato: “O mundo está cheo de horrores, de traizóns, de envexas; desamparos, tortura e xenocidios. Pero tamén de paxaros que levantan o meu ánimo cando escoito os seus cantos, na alborada; ou cando a miña vella gata adormece sobre os meus xeonllos; ou cando vexo a cor das flores, ás veces tan minúsculas que hai que observalas desde ben cerca”.

Quedades todas convidadas!

 

 

Baía Edicións e a Agrupación Cultural Francisco Lanza presentan ‘Mar..usía. Relatos salpresados’ en Ribadeo

Baía Edicións presenta o libro Mar…usía Relatos salpresados na Casa das Letras (Rúa Rodríguez Murias, 8), o xoves, 22 de marzo ás 20:30 horas.

A presentación contará coa participación de Francisco Fernández Rei (académico), Bernardo Penabade, Pablo Mosquera e o autor da obra, Paco Rivas.

Contido do libro: Colección de 15 relatos con protagonismo do mar e das súas xentes que respiran a mellor tradición do realismo fantástico e mostran unha lingua que procura recoller fielmente a fala da xente da Mariña luguesa, mesturada, no entanto, cunha prosa rica en matices e recursos estilísticos postos ao servizo do dramatismo das distintas historias.

Como manifesta o profesor, escritor e ensaísta Luís Alonso Gigardo, autor do prólogo da obra: «Velaquí un novo libro de Paco Rivas. Agora un libro de prosa narrativa, de historias do mar e dos mariñeiros, das faenas de pesca e das súas artes; do mar e dos seus misterios, dos naufraxios, das conversas nas tabernas; de barcos e barcas, da vida da xente. Todo no reducido ámbito dunha moi concreta xeografía: a Mariña luguesa, as costas e as augas do norte, Nois, Pena Orxal e outras penas. En Nois precisamente ten o seu pequeno reino privado Paco Rivas; a súa casa é unha pequena atalaia a carón do mar que el coñeceu dende neno e que aínda hoxe continúa a contemplar, a revivir e reinventar e, como non, a recrealo coas palabras […]».

Visita a exposición ‘Como se imprime un libro Grafistas e impresores en Bos Aires 1936 – 1950’ na Fundación Luis Seoane

En 1942 a Imprenta López de Bos Aires edita e regala aos seus clientes e colaboradores máis achegados unha obra mestra do deseño gráfico moderno: o fotolibro Cómo se imprime un libro.

A través do deseño de Attilio Rossi e as fotografías e fotomontaxes de Horacio Coppola e Grete Stern, a publicación rexistra de xeito maxistral os pasos na produción dun libro e é un documento único e de primeira man do que foron os oficios das artes gráficas naquela época.

Tomando como guión esa folla de ruta que é o proxecto gráfico do libro, a exposición Como se imprime un libro. Grafistas e impresores en Bos Aires 1936-1950 traza un itinerario sobre pezas chave da gráfica editorial arxentina durante a chamada ‘época dorada da edición’ a través do traballo dos grafistas Attilio Rossi, Grete Stern, Horacio Coppola, Jakob Hermelin, Luis Seoane e do impresor Manuel López. Personaxes entre os que se teceron amizades, colaboracións e mutuas influencias nese período.

A exposición propón un achegamento a todo aquilo que conforma o pequeno universo plásticodo libro: o formato, a diagramación, os tipos de letra, as ilustracións, o deseño das cubertas, dos emblemas editorias, a impresión e a encadernación. A selección de pezas inclúe case cen titulos, a maioría primeiras edicións, e na que están representadas máis de 12 editoriais e unha vintena de coleccións, réxese en función do seu valor como aportacións a esa obra colectiva, multiforme pero claramente identificable, que será o deseño editorial latinoamericano durante o pasado século, e que na década dos 40 experimenta o seu primeiro e máis forte impulso co nacemento de editoriais como Losada, Emecé, Espasa-Calpe Argentina ou Nova.

A mostra busca novas maneiras de expoñer os libros, achegándoos ao espectador mediante recursos como ampliación de fragmentos, fotografías do contexto, proxeccións de secuencias de páxinas, interactivos, explicacións de procesos gráficos, etc. Como se imprime un libro intenta poñer de manifesto que o libro é en sí mesmo unha peza que responde aos parámetros estéticos da época na que se confecciona e constitúe un elemento chave na construción do imaxinario individual e colectivo.

Ademais das pertinentes consultas a bibliotecas e hemerotecas, contouse co asesoramento de coleccionistas, investigadores, familiares e amigos dalgúns dos protagonistas. Este labor de documentación permitiu reconstruír traxectorias biográficas e acreditar que nalgúns casos permanecían no esquecemento desde fai máis de sesenta anos.

Así podemos presentar a historia da Imprenta López desde a súa fundación en 1908, ou o catálogo máis amplo ata a data do traballo editorial en Bos Aires de Attilio Rossi ou de Jakob Hermelin, do que tamén se documentou boa parte do seu anterior labor en Alemania como editor de obra gráfica. O resultado de este estudo quedará rexistrado a través de catro ensaios complementarios entre sí e do catálogo de pezas que conforman a mostra no libro que se publicará sobre a exposición.

Máis información

Presentación de ‘ALMA. Un sopro de aire fresco’ na Sede Afundación da Coruña

Xosé Lorenzo Tomé presenta o libro Alma. Un sopro de aire fresco organizado polo Ateneo Republicano de Galicia na Sala de prensa Sede Afundación (Cantón grande 8), o próximo mércores, 20 de decembro ás 20:00 horas.

A presentación contará coa participación de Alberto Sucasas (Doctor en Filosofía pola USC), Pedro Incio (Xunta directiva Arga) e co autor da obra,  José Lorenzo Tomé.

Contido do libro: Obra na colección Baía Narrativa do profesor, filósofo, ensaísta e novelista José Lorenzo Tomé, centra a súa historia na xeración beat, na xeración europea que sufriu guerras e posguerras española e europea, na persecución dos nazis, dos xudeus e xudías, da contribución de Galiza por medio das irmás ribadavienses Touza, na colaboración cos servizos secretos para salvaren o pobo xudeu dos campamentos de exterminio e propiciaren a súa fuxida a Portugal, África ou América, presentado de forma singular polo pensador Walter Bejamin.

Unha obra poliédrica na que conflúen o ensaio, o diálogo e diversos xéneros literarios, postos ao servizo de resolver unha trama que percorre a obra e que procura poñer en valor o pensamento non abondo coñecido de Bejamin. As irmás Touza son unhas figuras de recoñecido prestixio entre o pobo xudeu sendo consideradas mesmo como heroínas polo Estado israelí, documentadas por Antón Patiño na súa novela A memoria de ferro. Na actualidade, infórmase por diversos medios que Hollyvood está preparando unha película (musical) sobre o seu papel para liberar do holocausto a máis de 500 persoas.

Baía presenta este xoves ‘Mar…usía. Relatos salpresados’ en Lugo

Baía Edicións presenta o libro Mar…usía Relatos salpresados na Libraría Aguirre (Salvador de Madariaga, 1 – Lugo), este xoves, 14 de decembro ás 20:00 horas.

A presentación contará coa participación de de Pablo Mosquera, “Bígaro” (Presidente de ‘Os aventados’), Bernardo Penabade
(escritor), Belén López Vázquez (Directora Editorial de Baía Edicións) e co autor da obra, Paco Rivas.

Contido do libro: Colección de 15 relatos con protagonismo do mar e das súas xentes que respiran a mellor tradición do realismo fantástico e mostran unha lingua que procura recoller fielmente a fala da xente da Mariña luguesa, mesturada, no entanto, cunha prosa rica en matices e recursos estilísticos postos ao servizo do dramatismo das distintas historias.

Como manifesta o profesor, escritor e ensaísta Luís Alonso Gigardo, autor do prólogo da obra: «Velaquí un novo libro de Paco Rivas. Agora un libro de prosa narrativa, de historias do mar e dos mariñeiros, das faenas de pesca e das súas artes; do mar e dos seus misterios, dos naufraxios, das conversas nas tabernas; de barcos e barcas, da vida da xente. Todo no reducido ámbito dunha moi concreta xeografía: a Mariña luguesa, as costas e as augas do norte, Nois, Pena Orxal e outras penas. En Nois precisamente ten o seu pequeno reino privado Paco Rivas; a súa casa é unha pequena atalaia a carón do mar que el coñeceu dende neno e que aínda hoxe continúa a contemplar, a revivir e reinventar e, como non, a recrealo coas palabras […]».

‘Mar…usía’ en Compostela

Competindo con sete presentacións na cidade, Paco Rivas presentou onte con éxito na Libraría Couceiro a súa última publicación, Mar…usía. Relatos salpresados, unha clara homenaxe á xente do mar e, en especial, á de Nois, na mariña luguesa. Homenaxe que estende á linguaxe, cun abano de termos de clara influencia mariñá, que abarca a toponimia e as palabras de uso cotián no falar das xentes do lugar, algunhas case descoñecidas para o resto de galegas e galegos.

Arroupado polo prologuista e intúo tamén mentor, Luís Alonso Gilgado, quen dixo, entre outras verdades, que en Mar…usía “narrativa e lírica son a mesma cousa”, “dá a súa particular visión sensorial da realidade que evoca a poesía afrocubana de Nicolás Guillén”, así como indica as claras reminiscencias a Poe, Alberti ou Cunqueiro, e polo profesor, investigador e académico Francisco Fernández Rei, quen actuou como tal ao esmiuzar a terminoloxía empregada na obra, destacando o uso e “abuso” de sinónimos e xogos de palabras ao servizo do ritmo que impregna toda a obra.

Non sabemos se o exhaustivo traballo de recolla e espallamento da terminoloxía mariñá lle outorgará no futuro ao poeta e estudoso dos temas mariños Paco Rivas un lugar na Academia, como semellaba prognosticar a presenza neste acto de catro membros da Real Academia Galega, pero do que non temos dúbidas é que o autor é, a día de hoxe, o maior especialista en terminoloxía do mar da mariña luguesa.

Grazas a todas e todos os compañeiros de mesa, persoas asistentes e, como non, á Libraría Couceiro, anfitrioa indispensable do libro e a lectura en galego.

Nota da editora

Baía presenta este xoves ‘Mar…usía. Relatos salpresados’ en Santiago

Baía Edicións presenta o libro Mar…usía Relatos salpresados na Libraría Couceiro (Praza Cervantes, 6), este xoves, 23 de novembro ás 19:30 horas.
A presentación contará coa participación de Francisco Fernández Rei, da RAG, Luis Alonso Gilgado, prologuista, Belén López Vázquez, Directora Editorial de Baía e co autor da obra, Paco Rivas.

Contido do libro: Colección de 15 relatos con protagonismo do mar e das súas xentes que respiran a mellor tradición do realismo fantástico e mostran unha lingua que procura recoller fielmente a fala da xente da Mariña luguesa, mesturada, no entanto, cunha prosa rica en matices e recursos estilísticos postos ao servizo do dramatismo das distintas historias.

Hoxe celebramos o DÍA DAS LIBRARÍAS

Hoxe, 10 de novembro celebramos o VII edición do Día das Librerías. O Ministerio de Educación, Cultura e Deporte e a Confederación Española de Gremios e Asociacións de Libreros (Cegal) organizan conxuntamente unha campaña con motivo do Día das Librerías.

No día de hoxe as librarías aplicarán un desconto especial do 5%, permanecerán abertas ata as 22h e organizarán multitude de actividades culturais.

Baixo o lema “Deixa que che conten”, a xornada reivindica a capacidade de recomendación persoal do libreiro e as librarías como lugar de dinamización cultural.

Hoxe celebramos o DÍA DA BIBLIOTECA

O Día 24 de outubro celébrase o Día da Biblioteca. Van xa máis de dúas décadas desde que a Asociación Amigos del Libro Infantil y Juvenil propuxera esta data para facer fincapé nos beneficios destas institucións ao servizo da lectura, da cultura e da cidadanía. Posteriormente, o Ministerio de Cultura apoiou esta celebración e todos os anos edítase un cartel cun texto conmemorativo e realízase un acto de celebración oficial. O cartel e”pregón” deste ano 2017 pódese consultar AQUÍ.

O departamento de Educación da Consellería de Cultura, Educación e O.U, pola súa parte, vén publicando desde 2008 uns carteis que pretenden facer visibles as distintas oportunidades e posibilidades da biblioteca escolar, porque o Día 24 de outubro é tamén o DÍA DA BIBLIOTECA ESCOLAR, por ser esta unha biblioteca esencial xa que por ela pasa toda a poboación escolar dun país. Cada ano proponse un lema e encárgase a súa interpretación a un creador ou a unha creadora do fértil mundo da ilustración en Galicia. Xosé Tomás é o ilustrador que este ano achega a súa creación a todas as bibliotecas escolares do territorio galego. Aprender a pensar coa biblioteca escolar, o lema elixido nesta ocasión, convida ao aproveitamento dos recursos, dos espazos, dos tempos e das actividades que a biblioteca facilita a toda a comunidade educativa.

Nesta data, e diante dos momentos de cambios que sofren as bibliotecas, pode ser útil volver aos principios e lembrar ao matemático e bibliotecario hindú, Shiyali Ramamrita Ranganathan, quen en 1931 enunciou “as 5 leis da biblioteconomía”:

  1. Os libros están para usarse.
  2. A cada lector o seu libro.
  3. A cada libro o seu lector.
  4. Hai que aforrar tempo ao lector.
  5. A biblioteca é un organismo en crecemento.

Que non lle falten libros ao noso alumnado, que teñan tempos e oportunidades para usalos, que cada rapaz, cada rapaza, atope o libro (ou á persoa) que o vincule á lectura “de por vida”, e que as nosas bibliotecas escolares sigan vivas e sigan a desenvolverse en todos e cada un dos centros educativos de Galicia.

Chegan os especialistas a Baía!

Baía Edicións acaba de abrir unha nova colección ESPECIALISTAS con tres títulos:

O CORPO HUMANO

O TEMPO E AS ESTACIÓNS

OS CASTELOS

Estes libros presentados ao xeito dos documentais nos que un animal, que actúa como presentador, descobre e mostra ás nenas e aos nenos o universo apaixonante que nos rodea e períodos que foron conformando a historia da humanidade e, en concreto, de Europa.

Todos eles finalizan, como recapitulación do lido e aprendido, cun léxico que recolle os termos e/ou aspectos máis significativos tratados na publicación.

Un material que de seguro non deixará indiferente a nais/pais e educadores/as.