Entradas

O pasado venres faleceu Álvaro Guevara, fundador de Teatro del Andamio

O pasado venres falecía, logo dunha longa enfermidade, Álvaro Guevara, actor, director, dramaturgo e fundador da compañía coruñesa Teatro del Andamio e da escola homónima. Guevara, nado en Arxentina, desenvolveu unha intensa carreira dramática no noso país tanto na súa compañía como en diferentes series e filmes. Títulos como Doente, O ano da carracha, Mia Sarah ou libro de familia fan parte da súa produción audiovisual. O corpo de Guevara, que tiña sesenta anos, foi incinerado o pasado sábado na intimidade familiar.

Fonte: Culturagalega

Foto

Foto Axencias: Galicia Hoxe.

A escritora que dá aulas de galego nas redes sociais

Non son consellos ou indicacións. Son aulas en soporte dixital preparadas para as condicións especiais das redes sociais. O curso comezou hai pouco, cando a polémica do “polbo” chegou a Academia. Despois de asistir ao balbordo producido, Helena Villar considerou que aí non estaba o problema e decidiu contribuír a promover a calidade da lingua desde a súa casa na aldea, apegada ao ordenador e cun público cada día maior que asiste á grande actividade da escritora na rede.

“Pensei que a grande preocupación que teñen os falantes é o vocabulario que, ao fin e ao cabo, é o menos interesante porque se resolve co dicionario. Pola contra, non vexo que se lle dea relevancia á desfeita cos pronomes, poño por caso, ou á fonética”, comeza a explicar Helena Villar do momento inicial no que regresou ao seu oficio comezando precisamente polo que máis lle preocupaba: os pronomes.

Villar Janeiro é tamén pedagoga e iso percíbese na calidade dos apuntamentos e nos exercizos prácticos que propón. Mesmo hai xa algúns ensinantes que queren empregar a metodoloxía de Helena traspasada ás aulas. “Cómpre secuenciar, coñecer o soporte e traballar os materiais. Estou a facer un grande esforzo coa programación. Agora vou facer exercizos, case como se ensinara unha lingua estranxeira porque a xente ten que tomar conciencia da necesidade de traballar tamén a nosa lingua. Non todo vale”, defende Helena Villar, magoada cos “despropósitos” que le e escoita cada día.

Alumnado que pregunta

Sorpréndelle agora a repercusión que as súas aulas dixitais están a ter no facebook. Comezou dirixíndose a tres ou catro persoas e cada vez son máis as que se unen á escola de lingua de Helena Villar. Comentan, dan indicacións, preguntan dúbidas e propoñen temas. Eis as posibilidades das redes sociais, espazo que a escritora manexa con destreza e no que leva tempo xa ofrecendo os seus artigos, as súas receitas, consellos literarios, opinións e tamén a morea de fotografías artísticas que esta muller de moitas facianas creativas comezou a facer públicas hai pouco tempo.

“Non vale estar colocando mal os pronomes toda a vida. Iso non pasaría con ningunha outra lingua. Quero contribuír a crear conciencia de que podemos mellorar o uso do galego”, insiste Helena Villar que comezará en breve a traballar cos paradigmas, dando modelos para a construción correcta das frases.

“Vexo o interese que tedes, as ganas de saber, o ben que interactuades e isto vaise convertendo nunha aula. Benzóns e mañá seguimos”, escribe nun dos posts nos que se dirixe ao seu alumnado. Noutro remata: “Isto debera quedar hoxe bastante claro para avanzar mañá outro pouco”. A profesora de lingua nas redes sociais amplía a cada pouco a súa aula, ofrece apuntamentos e exercizos e corrixe probas. Da outra beira, unha morea de internautas gozan por se converter en alumnado da escritora Helena Villar.

Fonte: Sermos Galiza

Foto

Ser Libris segue a viaxar nos autobuses de Santiago

Os textos literarios de oito editoriais galegas seguen acompañando aos viaxeiros dos autobuses urbanos de Santiago até o 20 de febreiro. Le un libro e viaxa é a campaña deseñada por Illa Bufarda Produtora Creativa para a Asociación Galega de Editores dentro do marco de Ser Libris, unha iniciativa que a AGE promoveu no ano 2012 para dinamizar o libro e a lectura en Galicia.

Os obxectivos desta campaña céntranse na promoción do libro e a lectura como unha actividade máis da vida cotiá da cidadanía galega, así como na visiblización da edición dos libros dos editores galegos a través de textos de obras publicadas polas empresas editoriais integradas na Asociación Galega de Editores.

Corresponsabilidade asociativa

Os textos literarios, impresos nos vinilos que levarán os autobuses, foron seleccionados polas editoriais participantes nesta campaña: Nova Galicia Edicións, knsEdiciones, Ouvirmos, Editorial Galaxia, Edicións Xerais, Baía Edicións, Tambre Edicións, Ediciones Linteo e Dardo Editorial,  empresas que contribúen corresponsablemente ao financiamento desta campaña. No entanto, e como se pode visiblizar no cartel anunciador da iniciativa, todas as empresas editorais asociadas participan da idea promovida pola AGE.

A Asociación Galega de Editores agradece a colaboración do Concello de Santiago e da empresa TUSSA, concesionaria do servizo de autobuses urbanos da cidade, pola súa implicación nesta iniciativa.

Fonte: AGE

As grandes empresas de internet apenas tributan nos países onde se insiren

As grandes transnacionais de internet apenas tributan nos países onde se insiren e buscan sempre aqueles onde a tributación é moito menor.

Google, Apple, Yahoo, Amazon, Facebook, Microsoft, e Bay, etc, veñen realizando unha serie de operacións fiscais que lles permiten tributar o mínimo polos seus negocios, trasladando o máis relevante das súas facturacións a outros países onde se tributa menos, como sería o caso de Luxemburgo ou Irlanda. Segundo o portal Lecturalab, citando fontes de El País, os xigantes gañan por goelada. Google leva os seus beneficios ás Illas Bermudas e refactura os seus custos cunha marxe de entre un oito e un dez por cento en Google Ireland e Google Inc, en concepto de servizos de marketing, investigación e desenvolvemento. Segundo o mesmo xornal, a empresa declarou pérdidas en España no ano 2012, o que tamén fixo Apple.

Amazon vén de mercar Buyvip, transformándoa nunha empresa de servizos chamada Amazon Spain Services. Non declara beneficios, declara pérdidas por non poder deducir boa parte dos gastos. Yahoo factura o 85% da súa publicidade dende Luxemburgo e o resto dende Irlanda.

Fonte: AGE

A Coruña súmase as mobilizacións contra o IVE Cultural

Hoxe, como cada día 21 desde hai uns meses, celébranse en todo o Estado concentracións para protestar pola aplicación dun IVE do 21% aos produtos culturais. Nesta ocasión, A Coruña súmase a esta reclamación da man das asociacións ProNOCHE, Acces e Clubtura. Os colectivos organizan unha Santa Compaña do Ocio que visitará ás 11 horas a Delegación de Facenda na Cidade Herculina.

Fonte: Culturagalega

As empresas galegas usan máis software de código aberto que a media española

A fenda tecnolóxica que durante anos existiu entre Galicia e España en moitos indicadores relacionados coa Sociedade da Información desapareceu xa en moitos eidos ou mesmo se pode enunciar á inversa, sobre todo en certos grupos de idade ou sectores. Os datos ofrecidos polo informe La Sociedad de la Información en España, da Fundación Telefónica, correspondentes a 2013, confirman o crecemento cuantitativo e cualitativo do uso de internet e das novas teconoloxías en Galicia, onde o 65,3% da poboación afirmou ter empregado a rede nos últimos tres meses, unha cifra aínda seis puntos por debaixo da media española (71,6%).

Porén, se atendemos a outros indicadores, vemos como os galegos e galegas menores de 45 anos utilizan Internet moi por riba da media do Estado. Son usuarios habituais da rede o 85% dos galegos e galegas que contan entre 35 e 45 anos, fronte ao 83,5% dos españois nesa franxa de idade. Galicia tamén mellora a media nas persoas entre 25 e 35 anos (93,3% fronte a 92%).

Outros indicadores tamén amosan esta realidade. Galicia é a segunda comunidade autónoma no uso da Administración electrónica para obter información de páxinas web e en descarga de formularios oficiais. Un 61,5% dos internautas galegos obtivo información de webs da Administración (5,5 puntos máis que a media estatal) e un 43,1% descargou formularios oficiais (3,5 puntos máis que a media estatal).

De igual xeito, Galicia é a segunda comunidade autónoma coa maior porcentaxe de fogares (o 55%) que se conectan a Internet dende dispositivos móbiles (tanto telefonía como tabletas), superando en oito puntos a media estatal. O mesmo sucede con indicadores coma o do comercio electrónico. O 22,7% dos españois mercan habitualmente a través da rede (cando menos unha vez nos últimos tres meses), algo por riba dos datos de Galicia (21,2%). Pero, de novo, analizando os datos por idades, vemos como entre os 25 e os 35 anos o 41,7% dos galegos mercan habitualmente en Internet (fronte á media española do 35%), e o mesmo pasa nos que teñen entre 35 e 45 anos (34,9% en Galicia, fronte a 30% no conxunto de España). Por riba de 45 anos o diferencial é claramente positivo a favor de España.

E o mesmo podemos destacar ao analizar os datos das empresas galegas de máis de dez traballadores. Un 98,2% das empresas galegas de 10 ou máis empregadas ten contratada conexión a Internet, superando a media estatal (98%), e un 99,3% destas dispón de banda larga. Ademais, o 64,4% destas empresas dispón de páxina web e o 74,4% utiliza software de código aberto, 3,9 puntos máis que a media estatal. O informe da Fundación Telefónica tamén destaca que “emerxen novas solucións TIC no ámbito empresarial” e, por exemplo, un 16,3% das empresas galegas de 10 e máis traballadoras utilizan cloud computing, un 25,6% participaron en medios sociais, un 11,6% empregou canles de contidos multimedia e un 10,5% fixo uso de blogs ou Twitter.

Onde Galicia aínda se sitúa por debaixo dos indicadores do conxunto de España é nas pequenas empresas, de menos de 10 empregados, que constitúen a meirande parte do tecido empresarial do noso país. Iso si, neste eido, o diferencial foise reducindo nos últimos anos. Un 71,2% das microempresas galegas dispón de fronte, fronte ao 71,6% do Estado; o crecemento en Galicia foi dun 13,6%, moi superior ao estatal (0,4%), reducindo nun ano a fenda de 8,6 a 0,4 puntos. O 64,9% das microempresas galegas ten conexión a Internet, aumentando un 12,3% e reducindo a distancia coa media estatal en 6,6 puntos. Un 28,1% das microempresas con conexión a Internet dispón de web, un 15,2% máis que o ano anterior.

O informe tamén destaca que “o sector TIC ten especial relevancia no tecido empresarial galego”, pois Galicia é a quinta Comunidade en número de empresas TIC (2.029), cun crecemento do 2,7% e emprega 15.144 traballadores e traballadoras.

Fonte: Praza

Publican estudos sobre a influencia, relación e contacto entre o galego, castelán e portugués

O CCG acolleu a presentación do libro “Contacto de linguas, hibrididade, cambio: contextos, procesos e consecuencias”, coeditado co Instituto da Lingua Galega. O volume aborda a relación do galego coas outras linguas do seu contorno. Na presentación estiveron presentes Ramón Villares, presidente do Consello da Cultura Galega, Ernesto González Seoane, director do Instituto da Lingua Galega e dous dos editores do libro: Henrique Monteagudo e Gabriel Rei Doval.

“Este volume é posible logo de catro décadas de deseño da norma e do estándar da lingua galega”, sinalou o profesor da Universidade de Wisconsin e coeditor da publicación Gabriel Rei Doval, “porque tenta aproximarse sen complexos a unha área difusa e na que se producen estas dinámicas de contacto co castelán e co portugués”. A presenza do galego no “léxico dispoñible” do castelán de Galicia ou fenómenos tan controvertidos coma o ‘castrapo’, o neofalantismo, o purismo lingüístico ou a fronteira entre o galego e o portugués son analizados neste volume por diferentes especialistas. Para os editores, “cando se pensa na historia e na situación lingüística actual de Galicia, o prolongado contacto entre o galego e o castelán é unha realidade imposible de ignorar”.

Os expertos destacaron a fortaleza do galego na convivencia con outras linguas. “Ponse moito acento na influencia do castelán sobre o galego, pero o galego tamén inflúe no castelán”, sinalou Henrique Monteagudo, coeditor da publicación e profesor da USC. “É un libro que demostra a madurez dunha comunidade científica”, sinalou Ramón Villares, presidente do Consello da Cultura Galega, “e que permite un diálogo non moi frecuente”, sinalou o Presidente do CCG, en alusión á perspectiva máis tradicional de estudar os idiomas coma compartimentos estancos, e non na súa relación cos idiomas do contorno, “pero hoxe podemos dialogar porque o espazo construído é firme e seguro”.

Unha colección de dez volumes

Ernesto González Seoane, director do Instituto da Lingua Galega, encadrou o libro dentro da liña de publicacións e traballos desta entidade. “Forma parte dunha serie de dez volumes que vimos coeditando co CCG desde o ano 2002, e en certo xeito, son un balance sobre o que sabemos en diferentes ámbitos relacionados coa lingua a nivel galego e internacional”.

O volume recolle as contribucións realizadas ao Simposio ILG 2010. Deste xeito, no redacción do volume participaron especialistas como Eva Gugenberger, María Álvarez de la Granja, Belén López Meirama, Dante Lucchesi, Marta Negro Romero, Xosé Afonso Álvarez Pérez, Fernando Ramallo, Gabriel Rei-Doal, Francisco Dubert, Eva Fernández ou Fernando Venâncio.c.

Fonte: Culturagalega

Convocada a edición número 23 dos Premios Irmandade do Libro

A Federación de Librarías de Galicia vén de convocar os  XXIII Premios Irmandade do Libro, cos que a organización libreira de Galicia quere render homenaxe aos que durante o ano 2013 destacaron no seu traballo para que o libro e a lectura segan a ter un presente activo e un futuro determinante para a sociedade galega. Os premios recoñecen as seguintes modalides: Centros de Ensino, Librarías, Fomento da Lectura, Libro do Ano,Libro Infantil e Xuvenil do Ano,Obra Editorial, Autor – Autora.

As bases dos premios poden consultarse na web dos libreiros galegos. A entrega de premios será na localidade coruñesa de Rianxo o día 5 de abril.

BAÍA EDICIÓNS gañou o Premio a OBRA EDITORIAL DO ANO 2012 polas GUÍAS DA NATUREZA Baía Verde. Este recoñecemento nos Premios Irmandade do Libro á colección Guías da natureza Baía Verde tivo unha especial importancia para nós porque describe case a nosa traxectoria vital, como empresa e como proxecto cultural desde os seus inicios no ano 1990, un ano antes da publicación da primeira edición da Guía de aves de Galicia. Máis información

Fonte: AGE

Galicia perdeu 17 bibliotecas entre 2010 e 2012

En 2012 había abertas en Galicia 505 bibliotecas, 17 menos que dous anos atrás. O Instituto Nacional de Estatística facía público recentemente o seu estudo bienal sobre este campo, no que se recolle a evolución do sector entre 2010 e 2012. No mesmo, verificase que o noso país está por baixo da media estatal en canto a número de visitas por habitante e ano (3,87 fronte a 4,63) e de préstamos (1,34 fronte a 1,78). Ademais, a nosa é unha das catro únicas comunidades onde minguou a cantidade destes espazos para o libro no período estudado, e ocupa o cuarto último lugar en canto a acceso a Internet desde estes centros. Os datos do INE verifican unha tendencia á baixa que se dá no número de bibliotcas en Galicia nos últimos anos, xa que desde 2008 desapareceron 45 centros deste tipo.

Fonte: Culturagalega

Nace o Magazine Cultural Galego

A xornalista Montse Dopico -colaboradora frecuente de medios como Praza Pública ou El País- reconvertiu o seu blog persoal, no que xa informaba da súa actividade profesional, no Magazine Cultural Galego. A partir de textos xa publicados e producidos para outros medios e outros textos novos a partir da actualidade cultural galega ou exterior.

Fonte: Culturagalega