Artigos

Presentación de ‘Mar…usía. Relatos salpresados’ en Foz

Baía Edicións presenta o libro Mar…usía Relatos salpresados na Libraría Bahía (Avda. da Mariña, 40 – Foz), hoxe xoves, 2 de novembro ás 20:30 horas.
A presentación contará coa participación de Bernardo Penabade, Belén López Vázquez e co autor da obra, Paco Rivas.

Contido do libro: Colección de 15 relatos con protagonismo do mar e das súas xentes que respiran a mellor tradición do realismo fantástico e mostran unha lingua que procura recoller fielmente a fala da xente da Mariña luguesa, mesturada, no entanto, cunha prosa rica en matices e recursos estilísticos postos ao servizo do dramatismo das distintas historias.

 

BASES DO VI PREMIO DE MICRORRELATOS “MULLERES PROGRESISTAS”

Poderán participar todas as Mulleres que o desexen, de calquera nacionalidade ou cultura e maiores de 16 anos. Cada participante poderá presentar un máximo de 3 microrrelatos que deberán ir escritos en galego normativo.
O tema será libre, pero con especial valoración daqueles que traten e reflexionen sobre os distintos aspectos da igualdade de oportunidades entre mulleres e homes (corresponsabilidade, dereitos, empoderamento etc.).
Enlazando o carácter reivindicativo coa vertente literaria, o microrrelato será por tanto de natureza narrativa e non de mera proclama. Teranse en conta por isto aspectos como a calidade literaria e a orixinalidade das obras.
Os microrrelatos deberán levar título e ter un máximo de 100 palabras (excluído o devandito título).

Chegan os especialistas a Baía!

Baía Edicións acaba de abrir unha nova colección ESPECIALISTAS con tres títulos:

O CORPO HUMANO

O TEMPO E AS ESTACIÓNS

OS CASTELOS

Estes libros presentados ao xeito dos documentais nos que un animal, que actúa como presentador, descobre e mostra ás nenas e aos nenos o universo apaixonante que nos rodea e períodos que foron conformando a historia da humanidade e, en concreto, de Europa.

Todos eles finalizan, como recapitulación do lido e aprendido, cun léxico que recolle os termos e/ou aspectos máis significativos tratados na publicación.

Un material que de seguro non deixará indiferente a nais/pais e educadores/as.

‘Caramulo e a carpinteira de soños’ e ‘A cova da moura’ finalistas do premio Premio Frei Martín Sarmiento

Indicamos, a continuación, a listaxe dos libros finalistas deste 2017-2018 do Premio Frei Martín Sarmiento:

Educación Infantil
PREGO, LUIS; Xogos musicais; Edicións do Cumio.
MOURE, ANXO; Caramulo e a carpinteira de soños; Baía Edicións.

1ª categoría: 1º e 2º de Educación Primaria
FERRER, ÁNXELES; O sombreiro do mago; Ed. Xerais.
SAMPAYO, ALEX E CAAMAÑO , BORJA F.; A nena que quería navegar; Redrum Teatro.

2ª categoría: 3º e 4º de Educación Primaria
CORTIZAS, ANTÓN; Zoonetos; Ed. Tambre-Edelvives.
VILLAR JANEIRO, HELENA; Contos do sol e da lúa; Ed. Alvarellos.

3ª categoría: 5º e 6º de Educación Primaria
BABARRO, XOÁN; Hilario e os tres medos; Ed. Santillana.
BAYORTI, ALEX; Tom, Hunck e o misterio da trabe de ouro; Urco editora.

4ª categoría: 1º e 2º de ESO
CAROU FIGUEIRA, NATALIA; A cova da moura; Baía Edicións.
DÍAZ VALADARES, FRANCISCO; Tras a sombra do bruxo; Ed. Rodeira-edebé.

5ª categoría: 3º e 4º de ESO
PRADO, MIGUELANXO; Presas fáciles; El Patito editorial.
TROUBS; A Alquitara; Ed. Figurandorecuerdos.

6ª categoría: bacharelato e adultos
RIVEIRO COELLO, ANTÓN; A ferida do vento; Ed. Galaxia.
FRAGA, ANTONIO M. ; A virxe das areas; Edicións Embora.

Fonte: Blogoteca

Antonio García Teijeiro, Premio Nacional de Literatura Infantil e Xuvenil 2017

Antonio García Teijeiro obtivo o Premio Nacional de Literatura Infantil e Xuvenil na súa edición 2017 pola súa obra «Poemar ou mar».

O Xurado decidiu premiar ao autor e a súa obra «por ser un libro cargado de emoción, cunha brillante elección léxica, onde o mar é o gran protagonista, poboado de criaturas que transitan por orixinais e suxerentes composicións poéticas».

O galardón concédeo o Ministerio de Educación, Cultura e Deporte para distinguir unha obra de autor español, escrita en calquera das linguas oficiais do Estado e editada en España durante o pasado ano 2016. A dotación económica do premio é de 20.000 euros.

Fonte: ABC

Pere Tobaruela trasládase ás nosas orixes prerromanas para recrear ‘Catro pedras vellas’, última novela da colección Meiga Moira

Conta a lenda que na parroquia de San Xulián de Bastavales, concretamente no castro de Beca, tiña a súa residencia a Raíña Lupa na época en que o Apóstolo Santiago foi enterrado en Compostela. Pénsase que este Castro Lupario, ou Castro de Beca, puido ser a capital da tribo prerromana dos Amaeos, pertencente ó pobo dos Caparos.

Nese lendario lugar é onde Xela e os seus amigos Fuco, Carlos e Ana intentarán resolver os misteriosos movementos de persoas que desaparecen da vista cando alguén se achega  ás súas ruínas.

Con Catro pedras vellas, o último libro publicado na colección Meiga Moira, Baía Edicións trasládase, da man de Pere Tobaruela, aos lugares do noso imaxinario colectivo. Unha boa oportunidade para profundar nas nosas orixes prerromanas, saber algo máis desa misteriosa raíña con nome de lobo e de paso, visitar o fermoso val da Amaía.

Fotomontaxe: Fermín Durán Álvarez

Falece a escritora Xohana Torres

Apenados nos atopamos hoxe en Baía pola triste noticia do falecemento en Vigo de Xohana Torres aos 85 anos. Segundo destaca a Real Academia Galega no comunicado do seu pasamento “a súa é unha das voces máis destacadas das letras galegas contemporáneas que medraron na posguerra, cuxa obra abrangue a poesía, a narrativa, o ensaio e a literatura infantil. A autora contribuíu co seu labor como escritora, mais tamén noutros espazos como o radiofónico, á reconstrución cultural de Galicia e á defensa da súa lingua”.

Xohana Torres naceu en Compostela o 22 de novembro de 1931 e criouse en Ferrol, onde estaba destinado como mariño o seu pai. A súa vocación literaria manifestouse cedo e publicou os seus primeiros versos sendo adolescente na revista do instituto. En 1955 recibiu o primeiro premio de poesía da Asociación da Prensa de Vigo, que compartiu con Celso Emilio Ferreiro, por A nosa primavera: toxos, e en 1957 publicou o seu primeiro libro, Do sulco (1957), na colección de poesía Illa Nova de Galaxia.

Como poeta, publicou tamén Estación ao mar (1980), Premio da Crítica española en 1981, Tempo de ría (1992) e Poesías reunidas (1957-2001), así como Elexía a Lola (2016). Como dramaturga, destacan as súas contribucións ao teatro da posguerra con A outra banda do Iberr (1965), gañadora do Premio Castelao do Teatro Galego da Agrupación Cultural O Galo, e mais Un hotel de primeira sobre o río (1968). Asinou tamén a novela Adiós, María (1971), Premio Galicia do Centro Galego de Buenos Aires, e, xa no eido da literatura infantil, Polo mar van as sardiñas (1968) e Pericles e a balea (1984).

Fonte: RAG

As Aventuras de Gale, espectáculo de monicreques de A xanela de Maxín, unha chamada en defensa da nosa lingua

En Baía Edicións alegrámonos moito de que A Xanela do Maxín participe no Titirideza 2017,  de seguro nos fará tan felices como a estrea de As Aventuras de Gale desta primavera, un alegato a favor da nosa lingua, que defenden coa dozura que dá o amor. Sentímonos fachendosas e agradecidas  de que compañías de monicreques con tanta calidade recorran a textos das nosas publicacións para melloralos e complementalos coa súa arte, como o foi neste caso a #Historia da Lingua Galega, de Pepe Carreiro.

Deixamos aquí o enlace á súa web, onde podedes ver anaquiños da obra

 

Arranca a edición anual do Titirideza, con espectáculos de compañías producidas e dirixidas por mulleres

Esta fin de semana, do 24 ao 27, Lalín celebra outro ano máis o  Titirideza, Festival Galego da Marioneta,  con espectáculos de compañías de monicreques coa característica común de seren producidos e dirixidos por compañías de mulleres: La mar de marionetas; Periferia teatro de títeres; Títeres Babaluva, A Xanela do maxín,  Catro pés e Rojo telón.

Aproveitando o evento, o  Museo Galego da Marioneta presenta unha pequena retrospectiva do traballo de Fernanda Cabrera Varela, fundadora de Marionetas Trécola e persoa fundamental na historia do teatro de marionetas do noso país. Deixamos un enlace ao Museo da Marioneta para aprender un pouco máis de Fernanda e do propio museo

Na casiña de Fernanda Cabrera

Parabéns á organización!!!

 

Pere Tobaruela trasládase ás nosas orixes prerromanas para recrear Catro pedras vellas, última novela da colección Meiga Moira.