Artigos

Escolle o teu agasallo de Nadal! Regala un libro!

Non sabedes que agasallar este Nadal! BAÍA ofrece moita variedade cos seus títulos….

–  Para os máis novos contamos cunha gran variedade de libros: DRÁCULA, O MAGO DE OZ, AS VIAXES FANTÁSTICA DE JULES VERNE,  a colección A DRA. PETEIRO, FABULANDO, XIZ DE COR, GRANDES CLÁSICOS ADAPTADOS, TOCA E ESCOITA….

–  Para os amantes da natureza: O CARBALLO, GUÍAS DA NATUREZA, GUÍAS PRÁCTICAS, AS 50 MÁIS COMÚNS

–  Para os que lles gusta a cociña: COCIÑA CASEIRA GALEGA, PEIXES E MARISCOS, SOPAS FRÍAS E QUENTES, COGOMELOS. A COCIÑA DO BOSQUE, APERITIVOS E TAPAS….

–  Para os que disfrutan cos ensaios: BREVE HISTORIA DA CORUÑA, CARTAS NO EXILIO, MODELOS DE LINGUA E COMPROMISO, MARÍA BARBEITO, A POESÍA OCULTA DE FILGUEIRA VALVERDE

E moitos máis… VISITA A NOSA WEB E ESCOLLE!

AGASALLA UN LIBRO NESTE NADAL!

Interesante e preocupado debate na presentación de ‘A horta sen químicos’

Os 45´ de tempo para a presentación de A horta sen químicos quedou corto, mesmo roubando un pouco de tempo á seguinte actividade, polo que pido desculpas. O motivo da escaseza de tempo foi debido ao  intenso debate que xurdiu arredor dos efectos dos produtos químicos na saúde das persoas, ademais da perda de diversidade ecolóxica por mor das sementes industriais. Na conversa posterior arredor do café acousa foi a peor, cando comentou os problema engadidos nos fillos de embrazadas expostas a químicos e deixou aberta a dúbida dos beneficios da lactancia en nais sometidas aos tóxicos.

Mais fóra do debate, qque arredor deste tema sempre resulta deprimente, Xan Pouliquen deunos unha breve introdución ao traballo na horta ecolóxica, que non reproducirei aquí pois para iso está o libro e insitiu na facilidade, economía e conveniencia de elixir como opción a plantación sen químicos, á vez que facía fincapé na necesidade de optimizar tempos e traballos e nos alertaba a cerca da inutilidade de moitos dos sulfatos naturais, case aceptados como un dogma por parte dos produtores ecolóxicos.

Grazas Xan, pola información e a túa cercanía e aproveito para deixar o enlace a un vídeo que ten na web da súa empresa: https://www.youtube.com/watch?feature=player_embedded&v=Egldu9QEzb.

Seguiremos na Feira esta tarde coa presentación en paralelo de dous interesantes ensaios: A poesía oculta de Filgueira Valverde e Modelos de lingua e compromiso. As 19:00 é a nosa hora!!!

Presentación dupla: Modelos de lingua e compromiso e A poesía oculta de Filgueira Valverde

Esta tarde, no marco da Feira do Libro da Coruña presentaremos dous ensaios, Modelos de lingua e compromiso, obra na que  Gorreti Sanmartín, Laura Tato,  Manuel Ferreiro e Xose Ramón Freixeiro, coordinados por Xose Manuel Sanchez Rei, todos  investigadores do grupo ILLA, achegan as súa reflexións sobre a calidade da lingua.

En paralelo Xosé Ramón Freixeiro presenta os resultados da súa investigación sobre a obra  do autor homenaxeado no Día das Letras e desvela a autoría de 2 poemas en A poesía oculta de Filgueira Valverde

De seguro dará para o debate, estades todas e todos convidadas; será ás 19:00

 

 

 

 

Publicada a ORDE que convoca axudas para a adquisición de libros de texto para 1º, 2º, 4º e 6º de Ed. Primaria e 1º e 3º de ESO ou educación especial

O pasado 1 de xuño sae publicada a ORDE do 22 de maio de 2015 pola que se convocan axudas para a adquisición de libros de texto destinadas ao alumnado matriculado en 1º, 2º, 4º e 6º de educación primaria, 1º e 3º de educación secundaria obrigatoria ou educación especial, en centros sostidos con fondos públicos, para o seu uso no curso escolar 2015/16.

Segundo a ORDE: “A presente orde regula a convocatoria de axudas para a adquisición de libros de texto para 1º, 2º, 4º e 6º de educación primaria, 1º e 3º de educación secundaria obrigatoria e educación especial no curso escolar 2015/16.

A gratuidade solidaria dos libros de texto ten o seu complemento no fondo solidario dos centros docentes sostidos con fondos públicos, que inicia o seu funcionamento no curso escolar 2015/16, cos recursos procedentes da devolución dos libros de texto adquiridos coa axuda do curso pasado Orde do 28 de maio de 2014 (DOG do 30 de maio), así como os procedentes de calquera outra doazón.

Polo tanto, os cursos non incluídos na presente orde, 3º e 5º de educación primaria e 2º e 4º de educación secundaria obrigatoria, xestionaranse a través do fondo solidario de libros de texto dos centros, como consecuencia do calendario de implantación da Lei orgánica 8/2013, do 9 de decembro, de mellora da calidade educativa (LOMCE), no curso 2015/16.

O Álbum da Ciencia do CCG achéganos á vida e obra de máis de douscentos científicos da nosa terra

Estes días de celebración tecnolóxico-científica (xa estamos nas celebracións da Semana da Ciencia e mañá celébranse importantes actividades do Día da Ciencia en Galego nos centros educativos) colle especial pulo o Álbum da Ciencia, unha enciclopedia virtual galega cuxa principal toma de contacto coa comunidade internauta celebrouse hai máis dun ano pero que retomamos agora co obxectivo de ir dando conta (estes días) das principais achegas da nosa Rede ao proceso divulgador. A iniciativa, que vén da man do Consello da Cultura Galega, tivo o seu xermolo no Diccionario histórico de científicos galegos, cuxa elaboración foi un dos obxectivos básicos do Grupo de Traballo de Historia das Ciencias constituído en 1987 (Seminario de Estudos Galegos).

Semellantes arelas foron as que levaron ao CCG, en 2007, a crear o Álbum da Ciencia, un espazo destinado a recoller as biografías dos principais protagonistas da nosa investigación científica. O proxecto cobrou nova vida estes últimos anos, cunha “nova etapa na que atende en exclusiva ao ámbito científico e amplía substancialmente o tramo temporal analizado”. Trátase, en palabras dos seus responsábeis, dunha liña de traballo máis ambiciosa e novidosa, partindo da base de actualizar e reformular fondamente as 201 biografías elaboradas para o devandito Dicionario histórico. “A iso”, sinala o CCG, “engadiuse a incorporación de novas entradas, correspondentes a outros autores, nomeadamente aos que desenvolveron o seu labor entre 1936 e 1970, e as relativas a institucións científicas salientables”. E engade o Consello, facendo mención da metodoloxía seguida: “O principal criterio que utilizamos para a selección de autores foi a relevancia da obra no momento histórico que viviron e o seu vínculo con Galicia”. A idea foi que en 2011 se abordase a revisión e actualización das biografías publicadas en 1993 e 2005. Nun segundo momento, en 2012 afrontouse a incorporación das novas entradas. O resultado final permite ofrecer aos usuarios máis de duascentas biografías online, “unha parte substancial do I+D histórico do país, unha especie de panteón virtual da excelencia científica que proporcionará unha valiosa e actualizable información a públicos diversos”.

Fonte: Codigocero

Baía Edicións vén de poñer en marcha a súa AULA VIRTUAL

Baía Edicións segue innovando no eido da edición e da achega dos seus fondos en versión dixital, desta volta coa creación da Aula Virtual: Plataforma de distribución de recursos didácticos e materiais educativos.

Despois de sermos unha das primeiras editoras galegas en crear unha páxina web interactiva, onde, ademais de proporcionar información sobre os títulos publicados e a visualización das súas novidades mesmo antes da súa distribución e comercialización, se ofrece a posibilidade de comprar os seus fondos na Tenda online Baía. Nesta tenda pódense visualizar as distintas coleccións e os libros que as compoñen, obter información básica de cada un dos títulos: autoría, ilustración, ISBN, páxinas, PVP, comentario da obra, imaxe da capa do libro etc. No caso específico das obras de creación literaria, tanto de adultos como infantil-xuvenil, inclúese un capítulo do libro en formato dixital, co fin de axudarmos aos usuarios da rede e futuros lectores e lectoras a facérense unha idea clara do conxunto da obra, como se se estivese remexendo nas obras que se atopan nas librarías, bibliotecas, espazos de lectura etc.

Ante a demanda de moitos dos usuarios e das usuarias da nosa páxina web, nace en 2011, Espazo editorial Baía, onde se incorporan diariamente novas relacionadas coa actualidade editorial e cultural galega.

Ante o aumento da demanda da información e da necesidade de ofertarmos espazos de participación, materiais e formatos de edición, Baía Edicións  decide ampliar a súa web e crear nela novos espazos onde incorporarmos artigos, recensións, imaxes, vídeos etc. Como consecuencia deste esforzo, xorde un espazo interactivo, onde a editora, os autores e as autoras, colaboradores e calquera persoa que o desexe poden compartir a súa opinión sobre os artigos e informacións que se propoñen como obxecto de debate. Neste novo espazo incorpóranse, á súa vez, varios apartados independentes como os orixinais Xuntanza de escritoras e Encontro coa natureza, que acompañan o xa existente de Novas sobre a actualidade e unha a galería de imaxes e vídeos:

>      En Xuntanza de escritoras son as escritoras as auténticas  protagonistas, incorporando artigos, recensións, notas, relatos etc. Con este faladoiro virtual buscamos que as escritoras falen do seu papel na sociedade, de como ven a literatura…

>       En Encontro coa natureza procúrase achegar a natureza e a súa problemática a todo o mundo (nenos, nenas , adultos, especialistas etc.), incorporando informacións, novidades, recensións de publicacións temáticas, calendario de conmemoracións e actividades dos grupos ecoloxistas e naturalistas, artigos de opinión, consellos medioambientais etc. É dicir, un espazo aberto a cada vez máis amplos sectores da sociedade galega interesados polo medio natural e preocupados pola súa degradación.

Finalmente, e co obxectivo de complementarmos os materiais didácticos e textos dirixidos aos niveis educativos de secundaria e bacharelato, Baía Edicións decide crear a Aula Virtual, proxecto que nace coa idea de facilitarmos tanto ao profesorado como ao alumnado todos os recursos didácticos e materias educativos dos que se dispón de cada un dos libros de texto publicados na actualidade.

A Aula Virtual conta cos libros dixitais de Sociais de 1º e 2º de ESO, dirixidos tanto ao alumnado como ao profesorado, e desde a cal se poden adquirir.

Asemade, desde esta plataforma poderanse descargar tanto o Proxecto curricular establecido e a Programación proposta para cada unha das disciplinas como materiais complementarios de axuda ao profesorado no seu labor didáctico e pedagóxico diario nas aulas tan só co seu rexistro  (http://aulavirtual.baiaedicions.gal/usuario/rexistro).

Defendo o carácter activo da Aula Virtual, Baía Edicións irá incorporando progresivamente novos materiais e recursos que fagan dela un espazo referencial no mundo virtual da edición en galego.

E, como non podía ser doutro xeito, Baía Edicións tamén participa das redes sociais a través do seu Facebook, Twitter e Canal en Youtube.

‘Conservando as nosas dunas’ premiado polo Ministerio de Medio Ambiente por segundo ano

A Fundación Biodiversidad do Ministerio de Agricultura, Alimentación e Medio Ambiente seleccionou por segundo ano consecutivo o programa ‘Conservando as nosas dunas’ no marco da iniciativa Playas, voluntariado y custodia del territorio.

Este proxecto de ADEGA é un programa de voluntariado ambiental para a eliminación da flora exótica invasora nas praias galegas. Ademais de seguir divulgando a problemática das especies invasoras, e a importancia de conservar os ecosistemas dunares, esta acción ten por obxectivo “aumentar a concienciación cidadá, divulgar e promover iniciativas de custodia litoral, facilitando ferramentas de conservación”, segundo a organización ecoloxista. Outros dos obxectivos é acadar un mellor estado ecolóxico dos ecosistemas dunares.

Precisamente, o pasado 18 de xullo realizáronse actuacións de eliminación de flora invasora no concello de Porto do Son dando continuidade aos traballos realizados na mesma iniciativa no 2012, e na iniciativa ‘Móllate polos humidais’ en 2011. ADEGA  e este concello teñen firmado un convenio de Custodia do litoral para a preservación dos valores naturais deste concello.

Nova xornada de voluntariado

A segunda xornada de voluntariado celebrarase este xoves, 10 de outubro, na praia da Corna (Pobra do Caramiñal), onde realizaremos un ano máis labores de eliminación de flora exótica invasora e recollida de lixo. “Esta praia ten un ecosistema dunar ben conservado mais conta con numerosas ameazas que poñen en perigo  tanto a flora como a fauna”, apunta ADEGA. Este é un dos poucos lugares da nosa costa onde se pode atopar píllara das dunas (Charadrius alexandrinus), especie que se atopa en estado vulnerable en Galicia.

Esta organización ecoloxista xa realizou o pasado ano unha campaña divulgativa sobre o valor deste ecosistema e a necesidade de protección da píllara das dunas, dentro do proxecto Conservando as nosas dunas.  Para participar é preciso inscribirse. Son actividades gratuítas onde o voluntariado contará con seguro de accidentes, transporte e comida. Máis info en:  ramses@adega.info.

Fonte: GC

Mañá sábado daranse a coñecer os 22 Premios Irmandade do Libro

O xurado dos Premios Irmandade do Libro, organizados pola Federación Galega de Libreiros desde hai 22 anos elixiu á escritora María Xosé Queizán como gañadora da edición dos premios do ano, por votación da ampla maioría dos membros

A motivación que levou ao xurado a votar esta candidatura foi a longa e moi definida traxectoria en traballar polo galego desde todos os xéneros, sendo pioneira na narrativa galega despois da guerra. Resultando, ademais, que no ano dedicado ao teatro, María Xosé é precisamente unha persoa moi vinculada ao xénero dramático.

Quedaron pendentes de fallar os gañadores no resto de modalidades convocadas:

  • Libro do ano 2012
  • Obra Editorial do ano 2012
  • Libraría
  • Centro de Ensino
  • Fomento da Lectura

A decisión do xurado darase a coñecer o mesmo día da celebración do acto de entrega dos 22º Premios Irmandade do Libro, acto que terá lugar na Casa da Cultura de Monforte de Lemos o vindeiro sábado, día 20 de abril, a partir das 19 horas.

Cultura e Educación reforza a programación infantil na carteleira de decembro da Rede Galega de Teatros e Auditorios

Un total de 72 das 126 actuacións de teatro, danza, música, maxia e novo circo que se celebran durante este mes están especialmente dirixidas aos rapaces.

A Consellería de Cultura, Educación e Ordenación Universitaria intensifica a programación infantil da Rede Galega de Teatros e Auditorios neste mes de decembro, durante o que ofrecerá 72 funcións de teatro, danza, música, maxia e novo circo especialmente dirixidas aos espectadores máis pequenos. A meirande parte delas concéntranse, así mesmo, no período de vacacións escolares.

En total, serán 126 as representacións para público adulto e infantil que se celebrarán durante todo o mes no seo deste circuíto, que se estende por 32 localidades de toda Galicia. A rede, que Cultura e Educación xestiona a través da Axencia Galega das Industrias Culturais (Agadic), continúa a apostar de xeito prioritario pola produción galega e en galego, á que corresponde o 92% do total de funcións que porán en escena un total de 50 compañías e grupos.

Cofinanciamento

Cofinanciada ao 50% entre a Agadic e os concellos e entidades públicas que xestionan os espazos nos que se desenvolve o programa, a Rede Galega de Teatros e Auditorios pechará 2012 cun balance de 660 representacións. Esta cifra vén confirmar o destacado papel do circuíto como unha das principais canles de encontro entre os espectadores e as compañías profesionais de Galicia. A variedade nas propostas artísticas ofertadas e a descentralización xeográfica a través dos seus 46 teatros e auditorios asociados continúan a ser os seus principais sinais de identidade co obxectivo de cubrir así un amplo segmento de público potencial.

Neste mes de decembro a programación desenvolverase en 35 destes espazos, correspondentes a 32 concellos: 15 deles na provincia da Coruña (A Coruña, Ames, Arteixo, As Pontes de García Rodríguez, Betanzos, Carballo, Cedeira, Cee, Ferrol, Muros, Narón, Noia, Oleiros, Ortigueira e Santiago de Compostela), 9 en Pontevedra (A Estrada, Cambados, Gondomar, Lalín, Pontevedra, Redondela, Tui, Vigo e Vilagarcía de Arousa), 4 en Lugo (Foz, Lugo, Ribadeo e Viveiro) e 4 Ourense (A Rúa, O Barco de Valdeorras, O Carballiño e Ourense).

Salas de música e teatro

Á carteleira de decembro na Rede Galega de Teatros e Auditorios hai que sumar, así mesmo, a actividade nos outros dous circuítos promovidos pola Agadic: 58 concertos nas diferentes salas que integran a Rede Galega de Música ao Vivo e 33 funcións escénicas e musicais na Rede Galega de Salas. Neste último caso, a programación dirixida ao público infantil vén cobrando cada ano un maior peso no conxunto do seu catálogo multidisciplinar. Así, en decembro as salas ARTeria Noroeste e Santart en Santiago de Compostela, Teatro Ensalle en Vigo e Teatro del Andamio na Coruña acollerán un total de 22 representacións para os máis pequenos como parte da rede.

A programación completa das tres redes pode consultarse na sección de axenda da web da Agadic: www.agadic.info/axenda

Fonte: Xunta

O sábado comeza a Feira do Libro de Guadalaxara, México

Doce editores galegos amosarán as súas novidades editoriais na FIL, a Feira do Libro de Guadalaxara, México. O sábado terá lugar a apertura deste evento, un dos máis importantes do mundo do libro. A relación de editorias componse das seguintes empresas:Editorial Linteo, Editorial Ideas Propias, Kalandraka Editora, Biblos Clube de Lectores, Ediciones del Viento, Alvarellos Editora, OQO Editora, Everest Galicia, Editorial El Patito, Editorial Galaxia, Edicións Xerais de Galicia e MCSport.

A Asociación Galega de Editores e a Consellería de Cultura participan con stand dende o ano 2008. Formaron parte dos  programas  programas da FIL destinados á promoción do libro e a lectura, os autores galegos:  Fina Casalderrey, Manuel Rivas, Alfredo Conde, Xavier Alcalá, Kiko da Silva, Rosa Aneiros, Agustín Fernández Paz e Marcos Calveiro, entre outros.

A edición deste ano non contará coa presenza de creadores e de representación institucional. A AGE conta cunha axenda de traballo propia destinada á promoción comercial da produción galega.

Cámara de Comercio da Coruña

A Cámara de Comercio da Coruña organizou unha misión comercial composta por 9 empresas do ámbito editorial, tecnolóxico e bibliotecario. Odile Lueiro, responsable de comercio internacional da Cámara, estará á fronte da mesma.

Fonte: AGE

Foto: Xunta de Galicia