Entradas

Galiciana é a biblioteca dixital de Galicia impulsada pola Consellería de Cultura, Educación e Ordenación Universitaria da Xunta de Galicia

Galiciana é a biblioteca dixital de Galicia impulsada pola Consellería de Cultura, Educación e Ordenación Universitaria da Xunta de Galicia. Está xestionada pola Biblioteca de Galicia, coa misión de difundir e preservar o rico patrimonio documental e bibliográfico galego.

O proxecto ten como obxectivo non só a dixitalización dos fondos patrimoniais máis relevantes para Galicia, senón tamén a normalización do acceso mediante a aplicación das últimas directrices e estándares nacionais e internacionais. A súa finalidade é lograr a máxima visibilidade dos recursos dixitais integrados nela e a interoperabilidade cos principais proxectos de dixitalización existentes hoxe en día. Xa que logo, Galiciana está presente desde os seus inicios en Hispana, directorio e recolector de recursos dixitais españois, e en Europeana, a biblioteca dixital europea, xurdida como unha forma de contribuír á preservación e difusión da riqueza cultural dos pobos de Europa.

Galiciana integra actualmente, ademais de fondos propios da Biblioteca de Galicia, obras dixitalizadas en colaboración coas principais bibliotecas patrimoniais galegas. Nela pódense consultar recursos dixitalizados en institucións culturais tan importantes para Galicia como a Universidade de Santiago de Compostela, o Museo do Pobo Galego, a Fundación Penzol de Vigo, e a Real Academia Galega. Esta vontade de cooperación ampliouse recentemente coa incorporación de fondos dixitalizados procedentes das bibliotecas do Seminario de Mondoñedo e da de Estudos Locais da Coruña. En definitiva, trátase de conseguir que Galiciana sexa a plataforma global para o acceso na web do importante patrimonio cultural de Galicia.

Fonte: Galiciana

Queremos Galego chama a se mobilizar pola lingua

Os datos sobre o emprego da nosa lingua que publicou recentemente o Instituto Galego de Estatística están detrás da nova convocatoria de Queremos Galego. A plataforma en defensa do idioma convocaba esta mañá a unha grande mobilización o vindeiro 8 de febreiro en Compostela para protestar contra o que consideran “o quinquenio negro para a lingua galega” e do que responsabilizan o actual goberno da Xunta. Segundo denuncia este colectivo, “a política da actual Xunta de Galiza con respecto á lingua galega agravou máis esta situación ao incidir nos prexuízos que xa sofría o galego e ao iniciar uns retrocesos sen precedentes na etapa democrática”.

De xeito previo á manifestación, as máis de 600 entidades que participan en Queremos Galego desenvolverán diferentes actividades informativas e de dinamización a nivel local. O lema da mobiliación seleccionarase entre as propostas que lle envíe a xente á plataforma.

Fonte: Culturagalega

Loita lingüística entre a RAG e A Mesa

Un recente estudo advertía esta semana dos serios perigos aos que se enfronta o galego, con tan só un 13% dos rapaces entre 5 e 13 anos que teñen como primeira lingua o galego, fronte a máis dun 50% que usa xa como única lingua o español. E, fronte esa dura e difícil situación para o futuro da lingua, dúas entidades da relevancia da Real Academia Galega (RAG) e A Mesa pola Normalización Lingüística manteñen camiños diferentes e, mesmo enfrontados, nesa necesaria unión que precisa a lingua nestes duros momentos.

Desta volta foi o presidente da RAG, Xesús Alonso Montero, quen cargou duramente contra A Mesa e os seus procedementos. “Todos os que non pensan como eles son imbéciles e escuros”, criticou hoxe en alusión a un verso do himno de Pondal. “E non hai que chamarlle a ninguén imbécil nin escuro”, engadiu.

Por iso, insistiu na necesidade de que se empregue a “pedagoxía da persuasión”. “O galego non é do Bloque, nin de Esquerda Unida, nin dos comunistas, nin dos de dereitas. Cando os que máis din defender o galego saiban que é de todos,  será bo”, engadiu nunha entrevista na Radio Galega.

As diferencias entre a RAG e A Mesa veñen de lonxe e se agudizaron tras a elección de Alonso Montero coma presidente da Academia Galega. Desde A Mesa entenden que a militancia comunista de Alonso Montero nunha formación non nacionalista como é EU, non suscita confianza ao entender que esta formación é “españolista”. Pola súa banda, non é primeira vez que desde EU acusan á Mesa de ser o “brazo lingüístico” da UPG e de tentar “torpedear” todo o que non teña que ver coa súa “ortodoxia lingüística”.

De feito, Alonso Montero inseriu nesta estratexia do partido que dirixe Francisco Rodríguez a oposición do BNG na dedicación do Día dás Letras Galegas de 2015 a Xosé Filgueira Valverde. Neste sentido criticou o “sectarismo” e o “fanatismo” dos que criticaron dita dedicación e suliñou que “non hai biografías inmaculadas”.

Críticas á Xunta

Con todo, o presidente da RAG responsabilizou da actual situación do galego ao Goberno galego. “Quen máis responsabilidade ten é a Xunta”. “Debería facer un pronunciamento público, desde as máis altas autoridades, sobre a enquisa do coñecemento e uso do galego elaborada polo Instituto Galego de Estatística (IGE)”, indicou.

Por iso, fixo un chamamento aos “axentes a favor do idioma” para “empezar a actuar” porque, mantivo, “a cultura debería ser a columna vertebral do país”.

Fonte: Galicia Confidencial

Neira Vilas reivindica o galego nos Premios da Cultura

Un 10 de decembro, cen anos atrás, saía á luz “unha das partidas de nacemento da literatura galega”: o Pergamino Vindel, que contiña sete cantigas de amigo de Martín Códax. Varios séculos separan a voz daquel trovador doutra, a de Xosé Neira Vilas, que tamén o mércores soou alto, e entre estruendosos aplausos -conseguiu que todo o público se puxese en pé- na gala de entrega dos Premios da Cultura Galega para reivindicar como é “un orgullo para todos pensar que este pequeno país ten un idioma propio” no que se escribe unha literatura que “está á altura de calquera literatura europea”.

“Galicia merece que sigamos traballando por ela”, reivindicou o galardonado en Letras, quen recordou que o galego ensínase “en 24 universidades de todo o mundo”. “De maneira que podemos sentirnos orgullosos de ser galegos”, proclamou. Como o está el, que se define como “un xornaleiro das letras” e alguén que “en todo momento defendeu a dignidade de Galicia entre propios e alleos”.

A proba do interese polo galego ofrécea o profesor británico David Mackenzie, quen recolleu a distinción de Lingua polo seu labor de difusión do galego no mundo anglófono. De feito, ademais de realizar toda a súa intervención en galego, explicou como o Centro Irlandés de Estudos Galegos, que el creou, promoveu as investigacións sobre a lingua de Rosalía. “A Dirección Xeral de Política Lingüística pode estar satisfeita”, bromeou.

Tamén o presidente da Xunta, Alberto Núñez Feijóo, referiuse ao galego para invitar a entrar “nunha nova fase que permita ver aos falantes actuais e potenciais un galego desprovisto de controversias”, que actúe como “punto de encontro” e que “ninguén” utilice “como bandeira privada”. O mandatario entende que a lingua “é a gran ferramenta da nosa cultura”, da que son “referencia nun tempo que precisa modelos aos que seguir e admirar” todos os galardonados.

Entre eles, o vigués Cándido Pazó, en Artes Escénicas, quen dedicou o seu premio a todos os “que calquera día entraron nun teatro” para asistir a un espectáculo. “Porque esa é a gran tarefa pendente”, subliñou. “Temos un país con inmensas infraestruturas culturais” e “humanas”, asegurou, e Administración e artistas deben “traballar en conquistar hábitos que garantan que o público dea sentido a todo isto”. “Polo público. Con toda a polisemia que encerra esta declaración”, reivindicou.

Se o público preocupa a Pazó, son os apoios institucionais os que inquietan á presidenta de Agapi (Asociación Galega de Produtoras Independentes), Dores Ben, quen aludiu á situación “dramática” que viven moitas empresas do audiovisual. Recordou que fai vinte anos a Xunta considerou este sector como estratéxico e apelou a que se recupere” ese “espírito” porque, alega, “Galicia non pode permitirse perder o mellor sector que nunca puido soñar”.

O sector de artes plásticas non é alleo á crise. A propietaria da Galería Trinta, Asunta Rodríguez, premiada nesa categoría, dedicou o recoñecemento aos seus clientes, que permiten facer “realidade” o que definiu como unha “imposibilidade marabillosa”, e aos artistas, “que co seu inmenso e xeneroso talento dan forma a un proxecto”: “Artistas equilibristas sempre encima dun arame sen rede”.

De austeridade falou Francisco Fariña, presidente do Grupo Marcelo Macías -premiado na categoría de Patrimonio Cultural-, quen encomiou o empeño de grupos como o seu por “traballar en que o patrimonio de Galicia sexa a representación da identidade galega” e facelo desde unha “austeridade asumida”. “A nós fálannos de austeridade, e esquecen que nos traballadores está o futuro”, sinalou.

Que a cultura “xera riqueza” téñeno claro en Ortigueira, sé do festival que reúne miles de visitantes. Así o sinalou o seu alcalde, Rafael Girón, que recolleu o galardón no apartado de música. Por iso comprometeuse a seguir “investindo en cultura” como “motor de desenvolvemento” e aposta por “a nosa música” e o “patrimonio cultural de Galicia”.

Pola súa banda, Luís González Tosar, presidente do Centro Pen Galicia, recoñecido polo seu labor de Proxección Exterior, recordou como convenceron ao Pen Club Internacional para crear a sección galega: “Galicia é un país de palabras e ten unha das literaturas máis vellas de Europa.”

Fonte: Faro de Vigo

María Solar faise co premio Lazarillo

Os Premios Lazarillo 2014 son convocados pola Organización Española para o Libro Infantil e Xuvenil (OEPLI), en dúas modalidades: álbum ilustrado e creación literaria. A escritora e xornalista galega María Solar foi premiada na categoría Creación Literaria polo seu libro “O meu pesadelo favorito”, e impúxose a obras escritas en calquera das outras linguas do Estado. O premio consiste en 3.000 euros.

Fonte: Culturagalega

A consellería de Cultura e Educación programa para decembro no CGAC diversas actividades

A Consellería de Cultura, Educación e Ordenación Universitaria programa no Centro Galego de Arte Contemporánea, CGAC, un conxunto de actividades dirixidas a diferentes públicos arredor das artistas emerxentes, o cinema documental, a música contemporánea, talleres creativos para cativos e un mercado de nadal, que se desenvolverán ao longo do mes de decembro.

A partires do 2 de decembro o CGAC acolle o proxecto de visualización de novas creadoras ‘ARTISTAS’. A proposta busca impulsar a traxectoria das mulleres recén tituladas en Belas Artes e en Ciencias da Comunicación da Universidade de Vigo. Un total de 32 creadoras emerxentes foron seleccionadas para ilustrar unha colección de postais coa intención de ofrecerlles a posibilidade de abrirse camiño no mundo da arte, maioritariamente masculino. Ademais de no CGAC, as postais serán distribuídas gratuitamente no MARCO e nas facultades dos tres campus da Universidade de Vigo.

‘O Documental do mes’ é unha iniciativa da produtora Parallel 40 que ten como obxectivo achegar o xénero documental ao maior número de espectadores posibles e incrementar a presenza do documental europeo nas pantallas cinematográficas. O proxecto inclúe a estrea dun filme documental de calidade, de temática e procedencia diversa unha vez ao mes en múltiples espazos do mundo.

Cine

Doutra banda, neste mes de decembro, o CGAC programa as dúas derradeiras películas do ciclo. O martes 9 – xunto con outras 40 salas de diferentes cidades españolas e do contexto internacional- exhibirase o filme ‘Master of the Universe (Confesións dun banqueiro)’ dirixido polo alemán Marc Bauder. Ademais, como peche especial do ciclo, o xoves 11 proxectarase a película de animación ‘Approved for Adoption’ de Jung Henin e Laurent Boileau.

Ciclo ‘Música e Arte’

O 16 de decembro ás 20,30 h terá lugar o derradeiro concerto do ciclo ‘Música e arte. Correspondencias sonoras’ do ano 2014 organizado polo CGAC. A ensemble contemporánea galega Vertixe Sonora tomará como referencia a exposición ‘A orde das primeiras cousas’ do artista Carlos León. O concerto ofrecerá catro estreas absolutas a cargo de Lou Michelle (Estados Unidos, 1975), Andrés Nuño de Buen (México, 1988), Santiago Quintáns (España, 1975) e Stefan Beyer (Alemaña, 1981).

Ás 20,00 h, en colaboración co Ateneo de Santiago e a Universidade compostelá, haberá un encontro previo ao concerto no que o director artístico do ciclo Ramón Souto e os compositores explicarán as pezas musicais e o seu proceso creativo.

Feira Creativa

A fin de semana do 20 e 21 de decembro, o CGAC acolle o proxecto do ‘Mercado da Estrela’. Nesta terceira edición da feira creativa amosarase o traballo de artesáns, produtores e emprendedores que darán a coñecer as súas coleccións de ilustración, moda, bixutería, complementos, fotografía, bonecos, decoración, obxectos para o fogar, papelería, adornos de Nadal, produtos enogastronómicos e agroalimentarios e postos solidarios.

O mercado complementarase con obradoiros lúdicos e interxeneracionais e un servizo de gardería- ludoteca para os cativos. As xornadas estarán amenizadas por bandas musicais que presentarán os seus últimos traballos.

Talleres de Nadal gratuítos

Este Nadal o CGAC presenta dous talleres impartidos polos artistas Xesús Carballido e Rebeca Mariño dirixidos a nenos e nenas de entre 4 e 9 anos. Os participantes poderán xogar, coñecer, comunicarse e mergullarse nos procesos creativos a través de linguaxes, soportes, técnicas e conceptos propios da arte máis actual.

Os días 22 e 23 de decembro Xesús Carballido impartirá o taller ‘Cativarte’ para nenos e nenas de 4 a 6 anos. O artista propón crear a partir dos materiais cotiáns que os pequenos teñan na casa. Traballarán cos seus propios xoguetes rotos, con contos vellos ou con esas outras cousas que adoitamos tirar ao lixo ou gardar eternamente para usalas nalgún momento (chaves, abelorios, clips, botóns…). Con esa materia prima tan especial crearán un cadro tridimensional persoal mesturando diversas técnicas artísticas como o debuxo, a pintura, a colaxe e a ensamblaxe.

Os das 29 e 30 4 a 6 anos. ías 29 e 30 de decembro Rebeca Mariño desenvolverá un taller vinculado ao cinema para nenos e nenas de 7 a 9 anos titulado ‘Teutropo’. Neste obradoiro os participantes achegaranse á imaxe en movemento mediante o deseño de diferentes xoguetes ópticos. A través do debuxo, da fotografía e do uso do corpo como modelo crearán fotogramas para os seus enxeñosos aparellos. Construirán traumatropos, zootropos e os seus propios tropos. Os talleres son gratuítos e terán un horario de 11,00 a 13,00 h.

As solicitudes de inscrición poderán presentarse a partir do 1 de decembro enviando unha mensaxe de correo electrónico a cgac.educacion@xunta.es no que se indique o nome completo e idade dos nenos e nenas participantes, o número de teléfono, o enderezo de correo electrónico, e o nome do taller no que desexan inscribirse. Poderase inscribir un máximo de dous participantes mediante cada solicitude.

Fonte: Xunta. Foto

Segunda edición dos Premios Martín Códax da Música

Unha gala en Cambados acolleu onte a presentación dos finalistas á segunda edición dos Premios Martín Códax da Música. En total son 54 propostas as que optan ás 15 categorías musicais e mais aos 3 premios Organistrum, que recoñecen o traballo de salas, festivais e espazos de comunicación. Os membros da Asociación de Músicos ao Vivo, que organiza o certame, botarán agora os gañadores do premio, que se entregará o 17 de decembro no Pazo da Cultura de Pontevedra.

A participación, mesmo sen chegar ás 521 propostas recibidas o pasado ano, foi valorada como moi positiva pola organización. En total inscribíronse no certame 307 grupos, 14 salas, 21 festivais e 18 medios de comunicación. Entre os candidatos á final deste ano atópanse varias propostas que resultaron premiadas o pasado ano, como Transivalnians, Machina ou Narf (desta volta como trío). A listaxe inclúe tamén proxectos que ficaron no final da primeira edición, como Xoel López (agora na nova categoría de Canción de Autor), Caxade, Pablo Díaz, Cró ou Wöyza. Aos premios en competicións súmase o xa anunciado galardón honorífico para a banda N.H.U., pioneira do rock progresivo en Galicia.

Proxectos nomeados aos II Premios Martín Códax da Música

Pop e indie: Ataque Escampe / Silvia Penide/ Los Chavales

Rock: Cró / Narf Trío / The Cornelius

Blues, funk & soul: Cats and Monkeys / Bakin Blues Band / Victor Aneiros

Jazz e músicas improvisadas: Sumrrá / Felipe Villar Trío / Xan Campos Trío

Hip-Hop e músicas urbanas: Wöyza / Som do Galpom / Aid Alonso

Música clásica e contemporánea: Orquestra Vigo 430 / Sounding Images / Samuel Diz

Folque: Vaamonde, Lamas e Romero / Cuarteto Caramuxo / Caxade

Música tradicional galega: Treixadura / Davide Salvado / Malvela

Músicas do mundo: Dos fíos invisibles chegan as cores / Trilitrate / 2uS

Canción de Autor: A Cada Canto / Xoel López / Xoán Curiel

Música infantil: Pablo Díaz e a Banda Tic Tac Toc / Xiqui Xoque Fiú Fiú! / Golfiños

Electrónica: Sub Rosa / Pálida / Chrysalid9

Metal: Aphonnic / Nao / Machina

Reggae, Ska & Mestizaxe: Zamaramandi / Dakidarría / Transilvanians

Orquestras, grupos e música de verbena: Orquestra Os Modernos / Los Satélites / Claxxon

Premio Organistrum Salas: Aturuxo / Garufa Club / Sala Capitol

Premio Organistrum Festivais: Espazos Sonoros / Festigal / Festival Sinsal Son Estrella Galicia

Premio Organistrum Espazos de Comunicación Musical: GZMúsica / Planeta Furancho / Tres Peixes Voando

Fonte: Culturagalega

Reflexións sobre O libro e a lectura nos medios

Algunhas das bibliotecarias asistentes á décimo primeira edición do Simposio O libro e a lectura amosaron públicamente  que sentían que era a edición máis triste das máis de 9 nas que tiñan participado como público, e non pola ausencia de público atento, máis de 60 persoas, que nunca decepciona e, con independencia dos temas a tratar, enche o auditorio do Consello da Cultura Galega, desprazándose dende  Ourense, Lugo ou A Coruña, senón pola derruba que se percebe cando son xornalistas os que teñen que falar da realidade da información cultural e dos medios tradicionais e a súa atención aos sectores da cultura do país.

Elementos para a reflexión 

A xornada deixou interesantes argumentos para a reflexión de todos os axentes culturais implicados nos procesos de comunicación cultural: Que os axentes do  libro e a lectura teñen que adaptar as súas estratexias á segmentación das audiencias, outra realidade na que todos os intervintes coincidiron e que vén de constatarse nos datos ofrecidos por Manuel Gago, director de culturagalega.org. Que público cultural é variado e heteroxéneo e pode compartir ou non a súa afición pola música coa afición coa lectura, outro si acontece co cine e outros produtos adiovisuais. Que o libro debe estar atento ao nichos de mercado, bucear entre o mar das redes sociais para achegarse aos seus lectores e calibrar o protagonismo que foron cobrando os  blogueiros, xornalistas, críticos, etcétera, como mediadores cos lectores. Que o xornalismo cultural ten que contar con profesionais formados e os responsables dos medios, públicos e privados, democratizar os procesos de información prestando atención ás necesidades culturais da audiencia. Que o xornalismo, sexa por precario ou por banalizar a información cultural, non está respondendo ás actuais demandas socioculturais. Que os medios tradicionais están perdendo influencia en favor doutros recursos comunicativos, moito máis participativos e atentos aos cambios sociais.

Os xornalistas participantes amosáronse moi pragmáticos e realistas no que atinxe á valoración da situación pola que atravesan os medios tradicionais  e recoñeceron as dificultades dos contidos culturais para  facerse cun oco nos seus espazos, tendo tamén en conta a actual crise mediática e a relación entre contidos e publicidade. Os medios de comunicación máis pequenos, incluso unipersoais, con criterios pouco economicistas, moito máis centrados no traballo especializado e nesas audiencias segmentadas, desprenderon moito máis optimismo en canto ao futuro e as posibilidades da información cultural.

Fonte: AGE

A administración de Xustiza segue falando case exclusivamente en castelán

Estes son só algún dos datos cos que ilustrou a conferencia Normalización do uso da lingua galega na administración de xustiza Juan Manuel Hermo Costoya, xuíz titular do xulgado de 1ª Instancia e Instrucción número 2 de Cambados e membro da Irmandade Xurídica Galega, entidade que aglutina os xuíces e maxistrados que falan en galego ou que utilizan o galego habitualmente no seu día a día profesional e que hoxe por hoxe se converteu no instrumento máis dinámico e activo na galeguización da xustiza.

“Son moi poucos os xuíces que traballan en galego e incluso se poderían sinalar os distintos partidos xudiciais nos que despachan”, subliñou o xuíz, que fixo fincapé en que a utilización é “tan escasa” que nin sequera hai a posibilidade de que haxa distinción de uso a nivel xeográfico entre o interior e a costa ou o rural e o urbano, “simplemente se trata de que hai galego alí onde un xuíz o emprega e isto varía en función dos seus posibles cambios de destino”.

 Soporte informático en galego, a principal demanda

En canto ás posibles dificultades de exercer en galego, o xuíz subliñou que “tan só hai unha, pero esta é fundamental”, xa que se trata de que a principal aplicación informática que empregan xuíces e maxistrados “pese a ser un soporte autonómico que se presta pola Xunta de Galicia”, apenas conta con documentos en galego, deixando á boa vontade e á destreza do funcionariado esta tarefa.

 “Dos arredor de 8000 modelos de resolución tan só podes atopar en torno a 2000 en galego e o resto están en castelán, o que te obriga a, se queres ditar unha resolución en galego, escribila de cabo a rabo e, por suposto, dado o volume de traballo que se move nos xulgados, é máis doado cubrir unha resolución que che ven no modelo que escribir punto por punto a resolución”, explicou aos asistentes da conferencia na Facultade de Filoloxía e Tradución Juan Manuel Hermo, que resaltou que, máis alá disto, non soe haber problemas en canto á tradución, a prestación de servizos ou a alegación de indefensión de que non se entende o galego, “cando menos nun xulgado de pobo como o de Cambados”, subliñou.

Preceptos constitucionais e estatutarios que só dependen dos principios e da boa vontade

Tras achegar un par de pinceladas sobre a evolución e a regulación desde a constitución de 1978 e explicar cales foron as distintas leis ou normas que se foron aprobando a partires de aí de cara a “normalizar ou simplemente utilizar” a lingua galega, o xuíz destacou a confianza que se fai en todos os ordenamentos autonómicos á vontade ou á boa fe do persoal xudicial en canto á utilización ou non dunha lingua cooficial, xa que non hai unha norma en concreto que diga ou especifique se o hai que utilizar para un ou outro aspecto e “a partir de aí atopámonos con esta escasa utilización de todas as linguas cooficiais na administración de xustiza e, en particular en Galicia”, recalcou Hermo Costoya, cuxa visita ao campus se enmarca no programa de actividades extraacadémicas e de extensión cultural da Facultade de Filoloxía e Tradución, tal e como lembrou durante a súa presentación o profesor Óscar Ferreiro, membro de AGPTI, Asociación Galega de Profesionais da Tradución e a Interpretación.

Fonte: Galicia Confidencial

Foto © Shutterstock Images

O ‘Diario Cultural’ da Radio Galega, premio do Público Culturgal 2014

O programa da Radio Galega Diario Cultural, que dirixe a xornalista e poeta Ana Romaní, fíxose co Premio do Público Culturgal 2014. Desde o 30 de outubro até o 18 de novembro os e as internautas puideron votar a través da web www.culturgal.com entre tres candidaturas: Diario Cultural, Cineuropa e o Salón de Cómic Viñetas desde o Atlántico.

Finalmente o programa da Radio Galega obtivo 361 votos, o festival de cine compostelán 269 e o salón de banda deseñada da Coruña, 171.

Fonte: El Correo Gallego