Artigos

Nunca Máis reactívase co xuízo do Prestige para gritar “contra a impunidade”

“Claro que é moi posible que volva haber outro Prestige”. Con esta contundencia, Xurxo Souto, un dos portavoces da plataforma Nunca Máis, deixou claros os riscos de que Galicia volva padecer unha catástrofe como a da que agora se cumprirán dez anos e que será xulgada o próximo día 16 na Coruña. Precisamente por iso, reactívase agora un movemento que protestará o mesmo día do xuízo para gritar “contra a impunidade” e esperando que se depuren todas as responsabilidades derivadas daquela catástrofe.

Nunha rolda de prensa convocada na Coruña, os portavoces da plataforma recoñeceron algúns avances, como a existencia de máis barcos anticontaminación ou menos buques monocasco, pero destacaron sobre todo os defectos que aínda existen no país respecto á prevención e á actuación no caso dun accidente semellante. “Non hai control vía satélite do corredor con maior tráfico marítimo que é o de Fisterra, o que provoca continuas alertas, mentres as competencias de control marítimo seguen sen transferirse a Galicia e levándose a cabo desde Madrid”, destacou Souto, que manifestou a “auténtica preocupación” de Nunca Máis ante a posibilidade “moi posible” de que outro Prestige afunda algún día nas costas galegas.

Ademais, Isabel Risco, outra das portavoces, destacou a importancia da plataforma e do movemento cidadán, que foron os que permitiron “os avances conseguidos” en materia de prevención e control, polo que chamou á poboación a que acuda á manifestación que se celebrará o próximo día 16, con motivo do comezo do xuízo, nas instalacións xudiciais “improvisadas” de Expocoruña a partir das 11 da mañá. Tanto Risco como Souto cualificaron de “heroes” aos dous avogados de Nunca Máis, Pedro Trepat e Miguel Anxo Fernández, presentes tamén na comparecencia.

O primeiro deles destacou que “é un alivio” que por fin se celebre o xuízo, pero incidiu tamén no feito de que “estadisticamente claro que pode haber outro accidente semellante”. Ademais, fixo fincapé no feito de que a “dilación indebida” da xuízo, case dez anos despois, será “unha atenuante de culpabilidade” que será “con toda seguridade” empregado polos imputados e que tamén lles reducirá a pena” de habela.

Para Trepat, á marxe das mellores técnicas e de prevención, o que si queda claro é que “de producirse novas desgrazas, os responsables políticos non se marcharían de cacería nin tomarían decisións oportunistas ou caprichosas, senón que se basearían en expertos e xente coñecedora do mar”. “Isto tamén é grazas a Nunca Máis”, engade.

Ademais, e sobre a presenza do ex ministro Álvarez Cascos no xuízo, Trepat aclara que López Sors, que era director xeneral da Mariña Mercante, “asumiu todas as decisións”, aínda que di ter “o convencemento” de que “estaba sacrificando a súa cabeza” en favor de superiores como o ex titular de Fomento.

En canto ás informacións da prensa que desvelan as intencións de varios cargos de abrigar o Prestige na Coruña, os avogados cren que a conversación feita pública “é moi reveladora” e “dará moito xogo” ao deixar claro que había máis opcións que a decida finalmente de afastar o buque e que acabou provocando unha enorme catástrofe ambiental.

Así, o patrón maior da confraría da Coruña, Manuel Cao, asegura que el “non metería o buque na Coruña” e destacou tamén que o porto exterior de punta Langosteira, vendido naquela época como porto refuxio, “non é tal”. “Non é seguro para meter un barco así”, asegurou, logo de advertir de que “se hai unha alarma como a do Prestige dentro de dúas horas, os mariñeiros seguirían sen ter os medios necesarios para deter a vertedura”.

Preguntados pola coincidencia do xuízo e das manifestacións coa campaña electoral, os portavoces aseguraron que non tiñan “culpa” de que se fixase esa data e advertiron do feito de que os xefes dos executivos dos que na actualidade dependen os galegos tivesen na época do Prestige altas responsabilidades. “A persoa que invoca agora á seriedade e ao bo facer é o mesmo que se gañou o alcume de ‘o señor dos hilillos’ polas súas declaracións”, dixo Xurxo Souto, en referencia a Rajoy, tras recordar tamén que Núñez Feijóo, presidente da Xunta, era entón vicepresidente con Manuel Fraga.

“Nós sabemos perfectamente quen é Rajoy e sabemos tamén ben que farían el e Feijóo tivésense que volver actuar”, aseguraron, tras negar que a manifestación convocada para cinco días antes dos comicios poida influír no resultado electoral.

Fonte: Eldiario

Un documental e unha páxina web renden homenaxe aos voluntarios do Prestige

A Asociación Profesional do Sector Turístico da Costa da Morte (APTCM) emprendeu a campaña Galicia en color para favorecer os reencontros do voluntariado que colaborou cos traballos de limpeza da costa galega tras o desastre do Prestige como agradecemento ao que fixeron hai unha década, e que agora vai completarse con Marea Blanca, un documental de Isabel Coixet que o vindeiro día 16 estrearase no Cine Callao de Madrid, podendo verse na Rede a partires do día seguinte.
Este documental de 30 minutos conta as historias e motivacións persoais de quen deixou o seu fogar, traballo ou tempo de vacacións para realizar o duro labor de recoller coas súas propias mans vertidos tóxicos que tinguiron de negro o litoral galego. Para contar esta historia Marea Blanca céntrase na voluntaria Soledad Méndez, que chegou dende Estremadura e decidiu quedar en Galicia para sempre tras iniciar unha relación con outro voluntario (que rematou cunha filla como froito, que leva por nome Alegría Fisterra). Coixet tamén fai un achegamento aos pescadores da Costa da Morte e a outra parella formada limpando a costa de Muxía (o galego Nacho Castro e a catalá Nuria Blanco).
Este proxecto enmarcado en Coronita Save the Beach non se limita a unha peza audiovisual, senón que tamén conta cunha plataforma en liña que está a construírse como un monumento virtual na honra dos colaboradores, e na que tamén pode verse a fotografía panorámica máis grande do mundo que amosa o estado actual dos 274 quilómetros de costa afectados, sobre os que se proxectan os nomes de moitos voluntarios xeoposicionando imaxes que tomaron durante a limpeza do vertido, de xeito que podemos ver o antes e o despois do enorme esforzo que serviu para salvar a costa.

Fonte: Codigocero