Artigos

Convocado o Premio Internacional de Ilustración

A finalidade deste certame é escoller a ilustración do cartel da XIX edición do Salón do Libro Infantil e Xuvenil de Pontevedra, que se celebrará no Pazo da Cultura da cidade entre o 6 e o 29 de abril de 2018 e que terá a temática central de: MULLERES DE CONTO.

A ILUSTRACIÓN GAÑADORA será premiada con 3.000 €.

Coa imaxe gañadora e as 12 finalistas farase unha exposición durante o Salón e a área de Cultura da Deputación de Pontevedra editará un catálogo en forma de calendario do libro e da lectura 2018.

Prazo de entrega: 5 de novembro de 2017.

Máis información

Os Premios da Edición entregaranse en Pontevedra o 13 de marzo

A Asociación Galega de Editores entregará os Premios da Edición o próximo 13 de marzo no transcurso dun acto que terá lugar no Pazo da Cultura de Pontevedra. O xurado dos premios, que decide entre os libros finalistas que resultaron da votación dos editores integrados na entidade, está composto polo libreiro, Cano Paz, de Librería Paz de Pontevedra; o expresidente da AGE, Alfonso G. Sanmartín; a bibliotecaria Pilar Fernández, directora da Biblioteca de Pontevedra; o ilustrador e debuxante Kiko da Silva; e o xornalista Ramón Rozas.  Colaboran coa organización do acto o Concello de Pontevedra, Gadisa e a Xunta de Galicia.

Visita ao Salón do Libro Infantil e Xuvenil 

Os actos do día 13 comezarán ás 19 horas coa visita ao Salón do Libro Infantil e Xuvenil de Pontevedra. Ás 20 horas está previsto o comezo da entrega dos recoñecementos ao traballo editorial do ano 2014 e a homenaxe á editorial Galinova, que celebra o seu 25 aniversario. Está prevista a asistencia de diversas autoridades galegas e da cidade, así como de representantes da vida cultural galega.

Trinta e seis títulos 

Trinta e seis títulos editados no ano 2014 compiten en 7 categorías: libro de ficción, non ficción, poesía e teatro, ilustración, infantil e xuvenil, educativo e tradución. Cinco proxectos optan ao Premio Rosalía de Castro á mellor iniciativa editorial do ano. Tres autores resultaron finalistas para o Premio Xosé Mª Álvarez Blazquez ao mellor autor-a do ano.

MARÍA BARBEITO. Unha vida ao servizo da escola e dos escolares (1880-1970), de  Ana Romero finalista no PREMIO ÁNXEL CASAL AO LIBRO DE NON FICCIÓN DO ANO 2014.

Miña querida Sherezade, de Andrea Maceiras e ilustracións de Antonio Seijas finalista do PREMIO NEIRA VILAS AO MELLOR LIBRO INFANTIL E XUVENIL DO ANO 2014.

A Colección Emocións (9 títulos), de Mireia Canals e ilustracións de Sandra Aguilar e Historia das mulleres galegas. Das marchas nómades á Marcha Mundial das Mulleres, de Pepe Carreiro finalistas do PREMIO XOSEFA IGLESIAS VILLAVERDE AO MELLOR LIBRO EDUCATIVO DO ANO 2014.

Fonte: AGE

O Salón do Libro gaña o primeiro Premio do Público Culturgal

Comparten espazo no Pazo da Cultura de Pontevedra e daranse a man o próximo día 1 de decembro, cando Culturgal entregue ao Salón do Libro Infantil e Xuvenil de Pontevedra o primeiro Premio do Público que se resolve despois de vinte días de votación na rede na que o público puido optar entre as tres opcións propostas pola organización.

O Salón do Libro Infantil e Xuvenil de Pontevedra é un programa do Concello de Pontevedra que naceu hai quince anos e que ten como obxectivo a promoción da lectura nas primeiras idades. Neste tempo, consolidouse como unha cita obrigada na que milleiros de persoas participan nunha completa programación converte o Salón no principal escaparate das novidades culturais para as primeiras idades, editoriais mais tamén de artes escénicas e musicais.

Quince anos de libros

Impulsado en 1999 por un grupo de persoas que buscaban a creación dun novo espazo para que o público máis novo se atopara cos libros e a lectura ten nos seu obxectivo o ser un foro de festa literaria, de cita cos libros das crianzas e promoción das novidades do sector cultural que medra arredor de públicos novos.

O Salón homenaxeará na próxima edición ao conxunto de escritores e escritoras que foron recoñecidos nas anteriores edicións e que dan medida da solidez da  nosa literatura infantil e xuvenil. María Vitoria Moreno, Neura Vilas e Anisia Miranda, Bernardino Graña, Xabier P. Docampo, Agustín Fernández Paz, Fina Casalderrey, Paco Martín, Gloria Sánchez e Marilar Aleixandre compoñen o ronsel de autores e autoras que compartirán recoñecemento colectivo ao se cumpriren 15 anos do nacementos do Salón do Libro en Pontevedra.

“Cociñando Contos” é o tema escollido para a próxima edición, vencellado ao proxecto europeo “Europa a la carta” no que participa en parcería coa editorial Oqo.  A ilustradora da AGPI que se encargará de deseñar o o cartel será Natalia Rey González, Pirusca que traballa na imaxe do encontro que terá lugar do 14 de marzo ao 5 de abril.

O Salón do Libro impúxose ao Festival de Cans e a Puntogal nunha elección a través da páxina web de Culturgal que rematou no inicio do día de hoxe, cando os votos emitidos deron o trunfo á iniciativa de Pontevedra. O premio entregarase nun acto público na propia feira o domingo día 1 de decembro.

Fonte: Sermos Galiza

PuntoGAL, Salón do Libro Infantil e Xuvenil de Pontevedra e Festival de Cans optan ao Premio do Público Culturgal

Culturgal bota a andar nesta nova edición un premio que se outorgará a unha iniciativa novidosa que se escollerá por votación popular entre tres candidaturas que a organización escolle. A Asociación PuntoGAl, o Festival de Cine de Cans e o Salón do Libro Infantil e Xuvenil de Pontevedra son, nesta primeira edición as tres candidaturas propostas pola organización para optar á primeira edición do Premio do Público Culturgal.

A votación comezou o venres día 25 de outubro e prolongarase até o 15 de novembro, periodo no que se poderá optar entre estas tres iniciativas seleccionadas pola Asociación Culturgal de entre as propostas polos diferentes gremios de industrias culturais que toman parte na súa directiva. A votación está aberta na páxina de Culturgal e a única limitación é que só admitirá un voto por IP. O premio entregarase nun acto público na propia feira o domingo día 1 de decembro.

Para a escolla das distintas iniciativas, a directiva optou por valorar o carácter novidoso e a súa proxección de futuro, a condición transversal e que fomenten a implicación social. Os votos recibidos na páxina de Culturgal serán os que decidan a iniciativa gañadora desta primeira edición do premio.

Desde a organización de Culturgal destacan da Asociación PuntoGal o seu traballo de cara a “consecución dun dominio propio” que recibiu a aceptación do ICANN no pasado mes de xuño. En canto ao Festival de Cans, que chegará no 2014 a súa décima edición, valoran o se tratar dun festival transversal “que apoia o asociacionismo a través da implicación de todos e que logra cada ano reunir milleiros de persoas combinando cine, concertos, desfiles de chimpíns, pasarrúas, coloquios e moita festa”. Con respecto ao Salón do Libro Infantil e Xuvenil promovido polo Concello de Pontevedra, que se celebra no Pazo da Cultura, o mesmo recinto que o Culturgal desde o 1999, destacan que “mantén unha identidade vinculada ao libro. En todos os formatos, sen límite á imaxinación, pero sempre o libro.”

Fonte: Sermos Galiza

Tres mil rapazas e rapaces de centros escolares colaboradores participarán nas actividades do Salón do Libro de Pontevedra

Contacontos de Pavís Pavós, Queliña, Andrea Bayer e Celso Fernández e diferentes obradoiros conforman o programa de actividades concertadas para os colexios expositores, así coma a Master Class BDMachine de Kiko da Silva para os IES o 21 de marzo. Perto de 500 nenos/as asistirán cada día ao Salón do Libro durante a súa primeira semana (ata o luns 11 inclusive) para gozar dos contacontos e obradoiros que se lles conceden gratuitamente en agradecemento á súa colaboración. Todos eles pertencentes a educación infantil e primaria, xa que os IES colaboradores asistirán o día 21 ás 10:00 e ás 12:00 horas a un obradoiro de banda deseñada con Kiko Dasilva. Ao rematar as actividades citadas, o alumnado realiza unha visita guiada á Sala onde os monitores lles explican historias sobre os traballos dos centros, a ambientación e ás diferentes exposicións que acolle: “Evolution”, “Parafusos, alambiques e birleques” da AGPI, etc.

Espazos para todos os públicos

Pavís Pavós, Queliña, Andrea Bayer e Celso Fernández ocupan 4 espazos diferentes nos que os nenos/as máis pequerrechiños escoitan moreas de contos relacionados co tema do Salón “A toda máquina”, mentres o alumnado de primaria asiste aos obradoiro de Ilustración (Anxo Fariña) onde aprenden a debuxar seguindo un método moi divertido e diferente, ScrapBook (María Reboredo Leiro) onde constrúen coa técnica do Pop Up, superpoñendo capas, unha postal cun gramófono como o que atopan na Sala de Exposicións. E mentres que con Lucía García se achegan ao mundo da fotografía grazas á montaxe das Cámaras de Papel con recortables en 3D, con Itziar Ezquieta elaboran bonequiños a mar de simpáticos no obradoiro Arte-Facto.

Fonte: AGE

‘A toda máquina!’, 14ª edición do Salón do Libro de Pontevedra

A concelleira de Cultura de Pontevedra, Anxos Riveiro, presentou a nova edición do Salón do Libro Infantil e Xuvenil de Pontevedra. A 14ª, que levará por título “A toda máquina!” e se celebra entre os días 2 e 23 de Marzo no Pazo da Cultura.

Coa finalidade de fomentar a lectura en galego, a creatividade e a imaxinación dos nenos/as dende ben pequenos/as e motivalos cada ano cunha temática distinta, o Salón prolóngase nesta ocasión durante 3 semanas. Serán preto de 100 actividades as que se celebrarán, destinadas a todas as idades e públicos, tanto concertados como en aberto, mantendo así o número de actividades do ano pasado, coa diferencia de que a edición 12+1, durou un mes enteiro.

Esta 14ª edición, que homenaxea a traxectoria da escritora Marilar Aleixandre, xirará em torno ao lema “A toda máquina!”, invitando aos participantes a inventar, crear, experimentar, construir e proxectar ideas e facelas realidade para este Salón, tal e como fixo a ilustradora da AGPI Almudena Aparicio, deseñadora do cartel.

Contacontos, obradoiros para todas a idades, teatro infantil e xuvenil/adulto, roteiros, pasarrúas, actividades para bebés, presentacións de libros, os Bolechas, Espazo Wii, espectáculos musicais e diferentes exposicións serán as pezas que fagan que o Salón do Libro vaia  “A toda máquina!”.

Horario de apertura

Debido a afluencia de público doutras edicións a organización acordou abrir as súas portas tamén os domingos pola tarde, podendo visitalo e participar das numerosas actividades da fin de semana en horario de 11:00h a 14:00. e de 17:00h a 20:30h os sábados e domingos.

Por outra banda, as Tardes na Sala, ademais dos contacontos e títeres habituais, apostan nesta ocasión por obradoiros en aberto que fomenten a participación dos nenos/as e os seus acompañantes, se cadra.  Ademais, as  presentacións que realizarán as editoriais serán máis dinámicas, e contarán en moitos casos con obradoiros, música, actividades didácticas.

E, como de máquinas vai o conto, teremos habilitado un Espazo Wii, con consolas e videoxogos cedidas por Nintendo Ibérica, permantemente monitorizado onde se celebrarán concursos e torneos con videoxogos educativos e didácticos polas tardes e o fin de semana.

Dossier Salón 2013

Fonte: AGE

O Salón do Libro de Pontevedra reduce a súa duración

Con 80.000 euros de orzamento (20.000 menos que na anterior edición) e dez días menos de duración, Pontevedra encara o XIV Salón do Libro Infantil e Xuvenil. No entanto, a concelleira de Cultura, Anxos Riveiro, asegurou que se manterá o número de actividades previstas. Co título A toda máquina, o evento homenaxeará a Marilar Aleixandre e achegará oito exposicións. Entre as actuacións previstas destacan Fantoches Baj, Mofa e Befa, Yllana, Tanxarina ou o Seminario de Jazz de Pontevedra. Entre as novidades do evento, haberá un espazo dedicado á videoconsola Wii e un novo formato de presentación das novidades editoriais.

Fonte: Cultura galega