Presentación de ‘Tres mulleres galegas de armas tomar: María Balteira, María Castaña e María Soliña’

O Observatorio da Mariña pola Igualdade organiza mañá martes 24 de abril ás 20:00 horas a presentación do libro Tres mulleres galegas de armas tomar: María Balteira, María Castaña e María Soliña (Baía Edicións, 2009), de Guillermina Domínguez e Felicia Estévez, profesoras no ensino secundario de historia e lingua respectivamente, que terá lugar na Casa das Letras /Gráficas Santiago de Ribadeo (R/ Rodríguez Murias, 8).

As autoras, profesoras historia e lingua, respectivamente, no ensino secundario, farán unha reflexión sobre a historia das mulleres en Galiza, o oculta que aínda permanece moitas veces e a pouca visibilidade que se lle dá, salvo excepcións, aínda hoxe nos libros de texto de secundaria.

Extracto da introdución do libro:

Este libro é unha escolma das tres marías, máis antigas, precedentes de tantas e tantas mulleres loitadoras: María Castaña, María Soliña e María Balteira.
Esta é unha nova historia coas poucas fontes e referencias que delas hai, os moitos rumores que tamén corren ao falar delas e as ganas de facer algo que chegue ás rúas, ás escolas, ás novas xeracións de rapazas e rapaces que teñen que seguir a construír un mundo en que mulleres e homes sigan facendo del un lugar máis habitable no sentido máis humano e xusto da expresión.
Así a nosa pretensión sinxela é contar parte do seu devagar pola vida, cos atrancos que supuxo vivir no Betanzos do século XIII, no Lugo do século XIV e na Cangas do Morrazo do XVII, engadíndolle o feito de seren mulleres nun mundo de homes.
Non se pretende facer historia “compensatoria” falando destas tres mulleres concretas, senón de reivindicar a visibilidade das mulleres no devir histórico ao igual que aquilo de que “o pobo que non coñece a súa historia está condenada a repetilo”. E isto poderiamos estendelo á historia social, á historia das mulleres como parte integrante dunha sociedade que, por diversos motivos, as silenciou. Reivindicar as súas vidas, fazañas e movementos nas diferentes etapas da Historia, fará que as mulleres contemporáneas teñan referentes máis que suficientes para seguir cara ao camiño da igualdade como cidadás de pleno dereito.

Organizan un concurso en liña de mensaxes de amor para dinamizar o galego na Rede

Os obxectivos da nova iniciativa son fomentar a participación en galego da mocidade, aumentar a presenza do noso idioma en internet e animar ao seu uso nas relacións interpersoais, de acordo co establecido polo Plan xeral de normalización da lingua galega nos ámbitos da mocidade e das novas tecnoloxías.
O secretario xeral de Política Lingüística, Valentín García, recordou durante a presentación que o galego é actualmente “a lingua que preferimos para falar coa xente que queremos: os amigos, a familia, as persoas que temos preto”, mais que pode ser tamén “a lingua que usemos para dirixirnos a persoas descoñecidas e iniciar relacións novas que, se comezan en galego, se manterán en galego”. García Gómez destacou tamén que o noso idioma, “que foi lingua de namorar na Idade Media, pode seguir séndoo hoxe e esperamos que así o entenda a mocidade galega”. Neste sentido, indicou que “o prestixio literario que tivo e ten a lingua galega debe complementarse co que hoxe ofrecen outros medios, coma internet”.
Ata o 17 de maio, os mozos e mozas que queiran participar poderán inscribirse e colgar as súas declaracións, de menos de 350 caracteres, na páxina web do concurso, onde se poden consultar as súas bases. Todas as declaracións serán alí visibles, onde figurarán de forma anónima, para que, a partir do Día das Letras Galegas e Día de Internet, as persoas que o desexen poidan votar polas que máis lles gusten.
Neste mesmo senso, Ovidio Rodeiro, director xeral de Xuventude e Voluntariado, fixo fincapé en que a promoción do idioma galego é necesaria e, por iso, lembrou que é unha das prioridades da primeira Lei de Xuventude de Galicia. As bases establecen dúas categorías (unha para mozos de 14 a 19 anos e outra para mozos de 20 a 35) e tres premios por categoría consistentes en produtos tecnolóxicos coma un iPad, unha Wii ou un lector de libros electrónicos, entre outros.

Fonte e foto: Codigocero

Día Internacional do Libro cunha programación especial nas bibliotecas nodais

A Consellería de Cultura, Educación e Ordenación Universitaria celebra este luns o Día Internacional do libro cunha programación especial que se levará a cabo nas bibliotecas nodais de toda Galicia durante esta semana.

Talleres, contacontos, mostras de libros e actividades de ‘bookcrossig’ serán algunhas das iniciativas que propoñen as bibliotecas públicas de Santiago de Compostela, Lugo, Vigo, Pontevedra, Ourense e A Coruña para fomentar a lectura entre o público máis novo, detallou o departamento autonómico nun comunicado.

Deste modo, ao longo de toda ao semana os distintos centros ofrecerán visitas guiadas dirixidas a escolares e adultos, co fin de mostrar os distintos servizos das bibliotecas, o seu funcionamento e unha selección de libros curiosos.

A CORUÑA

Dentro do programa de actividades, a Biblioteca Pública González Garcés celebra o Día Internacional do Libro inaugurando o 23 de abril o servizo de empréstito de ‘e-books’ en domicilio e en sala. O mesmo día se desenvolverán actividades de ‘bookcrossing’ nas que se liberarán libros destinados a adultos.

Ademais, de luns a xoves Marina Mayoral ofrecerá nesta biblioteca nodal da Coruña o taller ‘O proceso da creación literaria’, no que se analizará o proceso da creación.

SANTIAGO, OURENSE E PONTEVEDRA

Pola súa banda, a biblioteca Ánxel Casal de Santiago de Compostela ofrecerá este luns aos nenos de máis de cinco anos a posibilidade de crear o seu propio libro nun taller que se desenvolverá na sala infantil ás 18.30 horas. Ademais, mostrará os seus espazos a todos os asistentes con visitas guiadas extraordinarias.

A actividade de cuentacuentos será a protagonista das celebración na Biblioteca Pública de Ourense, a cargo de Susana Villar; e na Antonio Odriozola de Pontevedra, a cargo de María Campos.

BIBLIOTECAS DE LUGO E VIGO

As actividades na Biblioteca pública de Lugo comezarán este luns coa inauguración do novo servizo ‘A colección accesible a todos’, con libros de letra grande, audiolibros películas con subtítulos para xordos ou libros de lectura en ‘braille’.

Por último, na Biblioteca nodal de Vigo as accións organizadas con motivo do Día Internacional do Libro arrancarán tamén este luns ás 20.15 horas na hemeroteca co recital da poetisa Daisy Villalobos.

Fonte: GaliciaHoxe

Poesía e punk para apoiar os medios en galego

O evento inclúe un recital poético a cargo de Olalla Cociña, Xia Arias, Alicia Fernández e Gonzalo Hermo, seguido dun concerto do grupo punk de Muros Terbutalina.

Todos os beneficios do festival serán destinados a sufragar o mantemento da propia campaña e dos medios en galego, que nos últimos anos sufriron importantes baixas. As entradas saen a só 4 euros (5 o día do concerto) e haberá unha fila cero para os que queiran colaborar aínda máis a 10 euros. O concerto será no Centro Social A Gentalha do Pichel, onde se poden mercar as entradas, ademais de na Reixa, Casa das Crechas e Restaurante Rúa.

No mesmo festival darase conta do proxecto en marcha de cara ao gran evento do 17 de maio, que Vitaminas para o Galego está preparando co gallo do Día das Letras Galegas. A actuación é a primeira iniciativa da segunda fase da campaña, lanzada este inverno. A primeira fase logrou duplicar o obxectivo de recadación inicial, inxectando 6.800 euros grazas a colaboración de case 200 mecenas.

24 medios en galego

A campaña Vitaminas para o Galego está artellada polos medios de comunicación:  Tempos Novos, Galicia Confidencial, RadiofusiónPraza PúblicaNovas da GalizaVal Miñor.info Quepasanacosta. Colaboran ademais Xornal Certo , O Sil.info , Crónica 3 , Radio Nordés , Terra Chá.Xa , Crónicas da Comarca , Surf GZ , Cardenos de Comunicación e Análise ,Lalín e Comarca , Hermes e Atenea , Disquecool , De Luns a Venres , Cabozo.com , Vencello , Cartafol , A nova Peneira , Programa radio Plástico Elástico , Cerne, terra de Melide e Gaceta de Fene,

A iniciativa diríxese a todas as persoas que queren contribuír a que o idioma propio de Galicia adquira un rango social de normalidade. Para logralo, resulta imprescindíbel a existencia dunha pluralidade de medios de comunicación en galego.

Fonte: Galicia Confidencial

Preséntanse as programacións para o Día do Libro

A celebración, o vindeiro 23 de abril, do Día do Libro, está a animar a axenda cultural do país. Na coruña, o concello presentaba onte unha programación que inclúe a celebración da Festa do Libro, coa instalación de postos de venda e a realización de actividades nos Xardíns de Méndez Núñez desde hoxe. Outros actos previstos son a lectura pública dun manifesto e actividades nas bibliotecas completan as propostas para esta festa. Ademais, o 23 de abril comeza unha nova xeira do ciclo Poetas Di(n)versos, que arrincará con Veronika Dintinjana e Lino Braxe e continuará con Mark Strand e Cesáreo Sánchez Iglesias (21 de maio) e con Sudeep Sen e Francisco Fernández Naval (11 de xuño).

Pola súa banda, a Deputación da Coruña presentaba onte a III Semana do Libro e da Lectura, un programa que recupera a temática do Salón do Libro de Pontevedra e que terá nas supersticións o seu eixe deste ano. Entre o 22 e o 28 de abril, a Sala de Exposicións do Pazo de San Marcos acollerá contacontos, exposicións, maxia e outras actividades.

En Gondomar iniciaban xa o pasado día 17 a V Semana do Libro e da Lectura, que ten como principal evento a celebración dunha sentada lectora na alameda local. Con este evento quérese reivindicar publicamente o acto de ler baixo o leme Onde hai libros hai futuro!.

A coincidir con esta data, o Concello de Santiago presentaba esta semana a súa Campaña de Animación á lectura en colaboración coa editorial Kalandraka. Contacontos, obradoiros de escrita creativa e de ilustración ou exposicións son algunhas das actividades que se realizarán ata o final do vindeiro mes de maio. Esta campaña súmase á de animación lectora que se está a realizar nos centros socioculturais da cidade.

A Xunta de Galicia, pola súa banda, participa no Bookcrossing mundial que se celebra con ocasión desta data e distribuirá mañá 5.000 volumes a través de museos para que o público os deixe onde queira e difunda así a lectura.

Fonte: Culturagalega

O Concello non celebrará este ano a feira cultural ‘Achegarte’

O encontro cultural Achegarte, nacido na cidade da Coruña en 2009 como alternativa ao entón desaparecido Culturgal, non se celebrará este ano. “Non se vai a facer o Achegarte como tal,- explicou onte a concelleira de Cultura, Ana Fernández-, pero seguiremos organizando proxectos concretos e temáticos nos que haberá disciplinas similares”.

A concelleira nacionalista María Xosé Bravo remitiu o pasado luns unha pregunta ao Goberno municipal na que inquiría se tiñan pensado organizar unha nova edición de Achegarte, unha feira cultural que nas súas dúas edicións reuniu en Palexco a máis de 40.000 persoas co seu programa de música, animación, literatura e talleres.

Fonte: La Opinión

[nggallery id=2]

Ferrín pide aos deputados unha emenda para que o galego non sexa unha lingua de ”cuarta fila”

O presidente da Real Academia Galega (RAG), Xosé Luis Méndez Ferrín, pediu hoxe a todos os deputados galegos que apoien unha “emenda poderosa” contra os Orzamentos Xerais do Estado que deixe sen efecto o trato “discriminatorio” dos recortes do Ministerio de Cultura á lingua galega.

En declaracións aos medios de comunicación á saída dun acto institucional na Deputación de Lugo, Ferrín mostrouse moi crítico coa rebaixa do 62 % do Goberno central na súa asignación anual á institución, que só recibirá 380.000 euros, cando as entidades homólogas en Cataluña e o País Vasco disporán de máis de 700.000 euros porque o recorte non pasará do 23 %.

Nese sentido, o presidente da RAG lamentou que o galego sexa tratado como unha lingua de ”cuarta fila”.

“A primeira nestes orzamentos é o castelán, e ata se pode entender que así sexa. A segunda é o catalán, a terceira é o vasco e o galego é de cuarta fila. Así nos consideran e así se consideran moitos galegos a si mesmos, de cuarta fila”, queixouse o presidente da RAG.

Méndez Ferrín expresou o seu desexo de que no Congreso dos Deputados “haxa unha emenda poderosa, apoiada por unanimidade e co consenso de todos os deputados galegos, tanto do PP, como do PSOE e do BNG”, para que “consiga facer desaparecer estes números discriminatorios”.

“Non estamos en contra dos recortes. Estamos nunha época difícil e, se hai rebaixas, que as haxa para todos. Pero non para uns máis e outros menos”, apostilou Méndez Ferrín, para quen esta situación “non é aceptable” nin para os membros da academia nin “para ningún galego de ben”.

Fonte: Galiciaé

Javier Cortés é o novo Presidente da Federación de Gremios de Editores de España

Javier Cortés Soriano foi elexido Presidente da Federación de Gremios de Editores de España  pola Xunta Directiva do gremio, celebrada o  17 de abril en Madrid.

A súa proposta foi respaldada pola unanimidade dos membros da asemblea de socios da entidade, na que están integradas asociacións de editores de Cataluña, Euskadi, Galicia, Andalucía, Valencia, Castela León, Madrid e ANELE, a entidade que representa aos editores de libro educativo. O novo presidente proponse a actualización e o fortalecemento sectorial na nova coxuntura económica e cultural, no ámbito dixital e nas novas circunstancias da propiedade intelectual. Outra das súas tarefas será a defensa dos intereses sectoriais diante das institucións estatais, europeas e internacionais.

Cortés compatibilizará o seu  cargo co de  Presidente de SM. Dentro do sector xa foi Vicepresidente de la FGEE,  presidente da Asociación de Editores de Madrid e membro da  Xunta  Directiva de CEDRO.

Fonte: AGE

O alumnado galego parará mañá as clases para defender o idioma

O alumnado galego parará a actividade este xoves. Aulas baleiras e concentracións en todas as cidades galegas é o que propoñen diversas organizacións de estudantes para mostrar o seu rexeitamento contra as políticas da Xunta no relativo ao idioma. “En tres anos do Goberno de Alberto Núñez Feijóo non se fixo nada positivo pola lingua”, asegura en declaracións a DIOIVO a  responsable de lingua en Mocidade Nacionalista Galega (MNG), María do Mar Lopes González.

Este parón, apoiado pola Mocidade Nacionalista Galega, a Mesa pola Normalización Lingüística, a Liga Estudantil Galega, os Comités e o Sindicato de Estudantes coincide co terceiro aniversario da chegada do presidente Feijóo á Xunta e afectará aos alumnos do segundo ciclo da ESO, aos ciclos formativos e as ensinanzas artísticas. Ademais, as organizacións apuntan que simultaneamente se producirán concentracións en todas as cidades galegas.

“O mal chamado decreto plurilingüe” continua a ser o maior foco de descontento, segundo apuntan desde MNG. “A situación do galego é nefasta”, explica Lopes, pois a aplicación desta medida produciu unha “redución do galego nas aulas” nos dous últimos anos, chegado ao caso de que en moitos colexios, “menos do 20% das horas lectivas son en lingua galega”.

Deste xeito, a organización denuncia que esta norma emprega á lingua inglesa coma “coartada” para suprimir o idioma propio do ensino. Ademais, engaden, “Galiza é actualmente o único territorio do estado español con lingua propia que ten prohibido por lei impartir determinadas materias de ciencias en galego no seu sistema educativo”, sinalan destacando que Matemáticas, Física e Química e Tecnoloxía deben ser impartidas obrigatoriamente en castelán”.

Esta protesta servirá para quentar motores de cara á manifestación que prepara a plataforma Queremos Galego con motivo do Día das Letras, segundo explica María do Mar Lopes, e que espera “recuperar” a mobilización cidadá despois de que o ano pasado non se celebrara por mor das eleccións municipais.

Foto: El País

Fonte: Dioivo

AGADIC convoca os Premios Álvaro Cunqueiro e Manuel María

A Axencia Galega das Industrias Culturais convoca a  XXI edición do premio Álvaro Cunqueiro para textos teatrais, da VII edición do premio Manuel María de literatura dramática infantil e, en colaboración coa Asociación Cultural Barriga Verde, da X edición do premio Barriga Verde de textos para teatro de monicreques en dúas modalidades: para rapaces e para adultos, segundo o público a que vaian dirixidos os textos.

A dotación económica, segundo se recolle no  DOG do 17 de abirl é a seguinte:

  • Álvaro Cunqueiro: 6.000 €.
  • Manuel María: 6.000 €.
  • Barriga Verde (modalidade infantil): 6.000 €.
  • Barriga Verde (modalidade para adultos): 6.000 €.

 

Información dos premios

Fonte: AGE