Entradas

Cincuenta carteis para 50 anos

Nesta iniciativa súmanse os esforzos de diferentes estamentos da cultura galega co obxectivo de rememorar, desde unha óptica actual, as cincuenta edicións do Día das Letras.

A comisión que promoveu a inciativa diante da porta da Real Academia Galega. De esquerda a dereita: Marcos Dopico, presidente da Asociación Galega de Deseñadores; Xosé Salgado e Pepe Barro, de Grupo Revisión Deseño; Jacobo Bermejo, presidente da Asociación de Empresarios de Artes Gráficas de Galicia; Xosé Luís Axeitos, secretario da Academia; Xosé Luís Méndez Ferrín, presidente da Academia; Cesáreo Sánchez Iglesias, presidente da Asociación de Escritores/as en Lingua Galega e Manuel Bragado, presidente da Asociación de Editores.

O caderno, de 56 páxinas, foi publicado o 17 de maio polo xornal Faro de Vigo de xeito gratuíto. Conta, ademais, cunha edición adicional de mil exemplares, a cargo da Asociación Galega de Editores, que será repartida por colexios e bibliotecas de todo o país. No caderno faise un percorrido por cada unha das figuras homenaxeadas ao longo destes cincuenta anos de Día das Letras a través dunha serie de 50 carteis realizados por cadanseu deseñador. En cada cartel aparece tamén un breve texto autoría dun escritor galego actual, quer da xeración máis veterana, como Manuel Álvarez Torneiro e María do Carme Kruckenberg, quer da máis nova, como María Reimóndez ou Daniel Costas. O caderno inclúe o manifesto titulado “As letras que nos fixeron”, no que se pode ler: “As palabras e as imaxes son os lugares da cultura, esa é a masa que nos une”.

No proxecto participaron once entidades e asociacións reunidas arredor da causa comunal da defensa e dignificación da nosa lingua e cultura propias que nomeamos a continuación: Real Academia Galega, Asociación Galega de Deseñadores, Asociación de Escritoras/es en Lingua Galega, Asociación de Empresarios de Artes Gráficas de Galicia, Torras Papel/Norte Papel, Asociación Galega de Editores, Federación de Libreiros de Galicia, Asociación Profesional de Bibliotecarios Municipais de Galicia, ANABAD – Galicia, Faro de Vigo e a Xunta de Galicia.

Nos seguintes links poderedes descargar os arquivos PDF da primeira e último homenaxeado: Rosalía de Castro e Valentín Paz-Andrade.

Cartaz en homenaxe a Rosalía (1963). Texto: Teresa Moure. Deseño: Danivx/Daniel Costas

Cartaz en homenaxe a Valentín Paz-Andrade (2012). Texto: Tucho Calvo. Deseño: Xosé Lois Vázquez

Fonte: Real Academia Galega

Presentación da 35º edición dos Premios da Crítica

A Fundación Premios da Crítica Galicia celebrou esta mañá unha roda de prensa na Casa Galega da Cultura de Vigo na que presentou a 35ª edición dos seus premios. Bieito Ledo, o presidente da Fundación, anunciou que a a partir desta edición a cea de fallo dos premios celebrarase o penúltimo sábado do mes de outubro nas instalacións do Hotel Os Escudos de Alcabre. Será, polo tanto, o vindeiro 20 de outubro cando se coñezan os gañadores nas modalidades de Creación Literaria, Investigación, Música, Iniciativas Culturais, Artes Plásticas e Visuais e Artes Escénicas e Audiovisuais. Bieito Ledo insistiu que a Fundación convoca os premios con idéntico espírito ao da primeira edición en 1978, o «recoñecemento do traballo aberto, racional, integrador e colectivo da cultura galega en todos os seus ámbitos e expresións».

A Fundación publicará o libro 35 anos de Cultura Galega 

Ademais de presentar as bases polas que se rexerán estes premios e anunciar os nomes dos membros da Fundación que exercerán a secretaría de cada unha das modalidades, Bieito Ledo anunciou a publicación dun libro, «35 anos de Cultura Galega», coordinado por Ernesto Sánchez Pombo, no que se pretende realizar unha radiografía da cultura galega dende a primeira edición dos premios en 1978, na que se compaxinará a visión crítica coa documental. Así mesmo, anunciou a celebración, antes de fin de ano, de sete mesas redondas, en cada unha das cidades galegas, nas que diversas figuras valorarán o estado actual de cada un dos ámbitos da cultura abordados por estes premios. Por último, anunciouse a próxima apertura do espazo web da Fundación e a celebración dun encontro de irmandade (o sábado 16 de xuño, ás 13:00 horas,nas Bodegas Martín Códax de Cambados), ao que están convidados a participar todas as persoas premiadas nas 34 edicións realizadas e os membros da Fundación.

Descargar as bases

Fonte: AGE

Foto: Faro de Vigo

O conxunto do ecoloxismo galego reclama a liberación do tiburón do Museo do Mar de Galicia en Vigo

Sería o mellor acto que o Museo do Mar podería desenvolver para celebrar o día dos museos, pois a diferenza doutras especies de fauna silvestre en catividade o cazón branco do acuario vigués aínda e recuperable para a súa devolución ao medio natural.

Os colectivos ecoloxistas galegos reclaman a súa liberación ante a Consellería de Cultura da Xunta de Galicia e a dirección do Museo do Mar.

Os colectivos ecoloxistas consideran que manter en cautividade ese pequeno cazón branco non se pode xustificar nin divulgativa, nin educativa nin científicamente. Tampouco ten nada que ver ese animal co ecosistema da ría de Vigo que o acuario pretende representar. Trátase simplemente de manter en catividade a un animal silvestre co único obxectivo de servir de reclamo para o público que, na práctica, asiste a un espectáculo que o único que consigue e insensibilizarnos polo feito de degradar a un animal ate rebaixalo á categoría de adorno. Xustamente todo o contrario do que defende a Educación Ambiental e que ao final solo só acaba sendo un lamentable espectáculo que se complementa co dobre cativerio do polbo cazón, dentro do acuario e a súa vez dentro dunha caixa de metacrilato na que morrerá en catividade.

Polo tanto reclamamos á Consellería de Cultura e á dirección do Museo do Mar que poñan fin a este absurdo exemplo de maltrato animal e liberen ao cazón branco, para que poida vivir donde debe facelo, no mar, e non nunha estreita e triste peceira.

Do mesmo xeito que no seu día o Museo do Mar utilizou o confinamento nesa peceira do cazón branco como reclamo publicitario, teñen agora unha oportunidade de dignificar as súas instalacións dando un bo exemplo de auténtico compromiso coa conservación dos océanos liberando ao tiburón. Un xesto que permitiría pensar que o Museo do Mar efectivamente predica co exemplo o seu discurso conservacionista.

Asinan esta petición os colectivos ecoloxistas ADEGA, Amigos da Terra, Verdegaia, Federación Ecoloxista Galega FEG (Adega, Adenco, Asociación pola defensa da Ría Pontevedra, Asemblea do Suido, Colectivo Ecoloxista do Salnés, Coto do Frade, Guerrilleiros das Fragas, Hábitat, Luita Verde, Movemento Ecoloxista da Limia, Naturviva, Néboa, Niño do Azor, Oureol, Vaipolorío, Verbo Xido, Verdegaia, Xevale), e a Sociedade Galega de Educación Ambiental-SGEA, Sociedade Galega de Historia Natural SGHN.

Fonte: SGHN

A porcentaxe de obras dixitalizadas cae no mes de abril

A Axencia do ISBN rexistrou durante o mes de abril 6.220 títulos, cunha lixeira caída en relación ós meses precedentes. Tamén se produce unha diminución do número de obras dixitais, en relación ós meses anteriores. Nunha nota feita pública pola Federación de Gremios de Editores e pola propia Axencia do ISBN, as dúas organizacións manteñen que as editoriais, no seu conxunto, mateñen a aposta polo libro dixital, incrementándose o número de ebooks nos catálogos. No ano 2010 as obras dixitais representaron o 2,4% da facturación das empresas.

O 18% dos libros catalogados durante os primeiros catro meses do ano foron libros de ficción, un 11% correspondéronse con títulos didácticos e de infantil e xuvenil. Os estudos literarios e de humanidades acadaron o 16%.

A Axencia do ISBN, xestionada polo propio sector, ofrece datos mensuais do seu rexistro.

Máis información

Fonte: AGE

Antón Reixa vence nas eleccións da SGAE

A candidatura encabezada polo galego Antón Reixa impúxose nas eleccións da Sociedade Xeral de Autores e Editores. Autores Unidos pola refundación obtivo unha maioría simple nas votacións que celebrou onte a entidade, sumando 14 asentos para a xunta directiva, mentres outras dúas formacións reparten os 16 postos restantes. Reixa deberá agora negociar coas outras candidaturas para artellar unha directiva unitaria. O galego conseguiu estes resultados cunha campaña na que chamaba á rexeneración da principal entidade de xestión de dereitos do Estado.

Fonte: AGE

Finou Xaime Isla cofundador da Editorial Galaxia

Xaime Isla Couto, cofundador e Presidente de Honra da Editorial Galaxia finou onte, 25 de abril, en Vigo, segundo comunica a Editorial Galaxia a través da súa web. O ensaísta, avogado, economista, animador cultural e político do galeguismo era tamén director de Honra da revista Grial.

Os fundadores

Editorial Galaxia constituíuse en xullo de 1950 a partir da iniciativa de Francisco Fernández del Riego e Xaime Isla Couto, que un ano antes botaran a andar o Suplemento Literario do xornal La Noche en Santiago de Compostela. Axiña incorporaríanse ao proxecto Ramón Piñeiro, como director literario, e Ramón Otero Pedrayo, primeiro presidente do Consello de Administración. Mais a iniciativa foi dos anteditos: pulmóns e brazos executivos de Editorial Galaxia durante anos. Ramón Piñeiro, Francisco Fernández del Riego e Xaime Isla Couto foron a alma desta empresa, guieiros do seu proxecto estratéxico desde a súa fundación.

Foto: EditorialGalaxia

Fonte: AGE

Os libreiros ven o relevo xeracional en perigo

A crise económica está a impactar tamén no sector do libro galego, onde cada ano se editan tiraxes medias con menos exemplares ante a diminución das vendas e onde os libreiros alertan de que o seu relevo xeracional está “en perigo” pola baixada na rendibilidade dos negocios.

Así o asegurou a Europa Press o presidente da Federación Galega de Libreiros, Xurxo Patiño, quen apuntou que o libro “non é alleo” á situación xeral de crise, aínda que cuns parámetros diferentes na súa influencia.

“Non é un negocio para facerse rico”, sentenciou Patiño, ao tempo que fixo fincapé en que o sector de venda de libros “non é en xeral de grandes subas nin grandes baixadas”, o que fai que os efectos da crise sexan máis suaves.

Neste sentido, sinalou que “a xente limita o seu gasto” en libros, aínda que “os lectores seguen lendo” e o fan en máis medida en lugares como bibliotecas, que “crecen” como “competencia libre e gratuíta”.

Ante isto, as vendas decreceron nos últimos dous anos e “resentíronse”, aínda que a influencia é menor que “noutros sectores” máis “especulativos”. “A venda baixou, pero non na mesma proporción que noutros sectores, é un sector máis resistente e estamos acostumado a non ter necesidades especialmente fortes”, recordou Patiño.

Non obstante, o presidente dos libreiros galegos si recoñeceu que as baixadas na rendibilidade destes negocios provocan que o relevo xeracional “estea en perigo”, dado que os mozos emprendedores non o ven como un sector rendible.

O LIBRO TÉCNICO, O MÁIS AFECTADO

En canto aos volumes máis afectados pola crise económica, Xurxo Patiño evidenciou a baixada nas vendas do “libro técnico”, relacionado cos estudios universitarios ou con áreas xurídicas, dado que os lectores recorren en maior medida a bibliotecas, “fotocopias ou PDF”.

Ao mesmo tempo, recordou como outros volumes, como as enciclopedias en papel, “desapareceu directamente” do mercado nos últimos tempos, dado que quedan “desfasadas en pouco tempo” e son substituídas pola información en Internet.

No outro lado da balanza, o libro que “mellor resiste” é “indubidablemente” a narrativa, sinala Patiño. En canto ao formato, o presidente dos libreiros galegos asegura que as tendencias se “polarizan” entre as vendas de dous tipos de libros, o de peto –o mais barato– ou o que está “ben editado” e cun “formato consistente”.

TIRAXES MÁIS PEQUENAS

Dentro do sector do libro, tamén os editores sofren as consecuencias á crise e o seu “ámbito adverso para o consumo e a lectura”, tal e como recordou o presidente da Asociación Galega de Editores, Manuel Bragado.

Unido ao proceso de “cambio de paradigma” coa introdución do libro electrónico, os editores sofren a baixada nas vendas e, no caso do libro en galego, o “impacto de determinadas medidas do actual Goberno da Xunta” no ámbito educativo, coa “redución de recursos destinados ao fomento da lectura” e á edición.

A causa desta situación, Manuel Bragado asegurou que os editores, en lugar de reducir o número de títulos publicados, “o que se reduce máis é o número de exemplares na tiraxe media” que se realizan na Comunidade.

En canto ás debilidades do sector, o presidente da AGE asegurou que o libro galego está “sometido a un grande proceso de concentración da súa oferta arredor do ámbito infantil e xuvenil” e en relación co ámbito escolar, que supuxo en 2010 o 47 por cento dos títulos editados e o 63 por cento da facturación.

Por iso, recordou, os recortes en investimento público en libro de texto afectaron negativamente aos editores, que ven diminuídos os seus ingresos “non só pola crise económica”.

Fonte: GaliciaHoxe

Os editores galegos ven no libro electrónico unha «oportunidade»

Os editores galegos consideran que o libro electrónico é unha «oportunidade» de futuro en convivencia simultánea coa edición tradicional, a pesar de que, tal e como sinalan os libreiros, as súas vendas son «aínda moi residuais» na Comunidade. «Estamos nun proceso de tránsito, de cambio, temos que apostar pola innovación», asegurou, en declaracións a Ep, o presidente da Asociación Galega de Editores, Manuel Bragado, con motivo da celebración onte do Día do Libro.

En relación coa introdución en Galicia da edición en formato electrónico, Manuel Bragado evidenciou dous polos de acción. Por unha parte, destacou o «grande esforzo» realizado no ámbito educativo, coa «dixitalización» de materiais a través, en boa medida, do Proxecto Abalar. «Aí é onde se están a invertir a maior parte dos esforzos», explicou. Non obstante, fixo fincapé no desenvolvemento tamén importante da edición galega externa ao material curricular, un crecemento relevante porque se está a desenvolver «sen ningún tipo de axuda pública».

«Galicia non pode quedar fóra deste proceso, que é imparable», sinalou Manuel Bragado, que apostou, de cara ao futuro, por unha situación «híbrida» na que «convivirán ambos os dous soportes». Ademais da «coexistencia» do papel e o formato electrónico, o presidente da AGE instou a ver este cambio como unha modificación «non dos soportes, senón da lectura e a forma que a sociedade ten de acceder aos contidos e á creación literaria».

Con todo, a pesar da evolución da edición en formato dixital, Bragado recoñeceu que se trata dun proceso máis ben a nivel empresarial, dado que as vendas, tanto en Galicia coma en España, son «testemuñais».

Na mesma liña, o presidente da Federación Galega de Libreiros, Xurxo Patiño, recoñeceu a edición dixital como «emerxente», aínda que, «a día de hoxe» é «residual» en materia de vendas. «As porcentaxes de comercialización son baixas en España e en Galicia aínda moito máis», sentenciou Patiño, que cifrou as vendas nun 2% do total en Galicia. Entre os problemas do proceso de dixitalización, os libreiros alertan de que a maior parte dos libros que se consumen en formato dixital «son piratas».

Fonte: ABC

Os Premios Irmandade do Libro entréganse o sábado en Lalín

A Federación de Libreiros de Galicia entregará os Premios Inrmandade do Libro o sábado  21 de abril, na localidade de Lalín. Os premios recoñecen o traballo anual favor del libro e a lectura por persoas, colectivos, entidades e institucións, tanto públicas como privadas de Galicia durante el año 2011.

Prímianse as seguintes modalidades: Centros de Ensino,  Libro do Ano e Obra Editorial 2011,  Autor,  Institución, Fomento da Lectura e Librería.

Fonte: AGE

VI Noite da Edición 2010

Baía Edicións resultou gañadora de dous dos Premios da Edición de 2010 na gala celebrada o 12 de marzo en Lugo. Baía Edicións estrea o galardón Xosefa Iglesias Vilarelle ao mellor libro educativo coa Gramática práctica da lingua galega, de Xoán López Viñas, Cilha Lourenço Módia e Marisa Moreda Leirado, unha categoría que compartía con A sombra dos anacardios, de Antón Fortes e Simona Mulazzani; Unha década de literatura infantil e xuvenil en galego, de Héitor Mera; e Un xornal na clase de matemáticas, de Cecilia Alvarellos Casas. Entre os libros ilustrados, Baía Edicións volve a ser premiada co Isaac Díaz Pardo na Colección Rodribico de Xosé Tomás e texto de Manuel Guisande.

[nggallery id=21]