Entradas

Mobilizacións no Día Internacional de Eliminación da Violencia contra a Muller

O venres 25 de novembro de 1960 foron asasinadas as tres irmás Mirabal por orde do ditador dominicano Rafael Leónidas Trujillo. A sociedade dominicana sentiu moito as súas mortes, e moito máis no momento en que a prensa do país intentou ocultar o feito, converténdoo nun burdo accidente de estrada, e deste xeito presentouno nos diarios do país.

Trujillo (Rafael Leónidas Trujillo, 24-10-1891/ 30-5-1961), o dictador dominicano, realizara un dos seus actos represivos aos que xa tiña afeita á sociedade dominicana, pero, o que non puido adiviñar, é que este supoñería o inicio do seu fin (e da súa dinastía política) e acabaríase convertendo nun feito digno de recordo a nivel mundial e anualmente.

Non pasara un ano cando Trujillo foi asasinado (axusticiado dicían algúns diarios), e este atentado puxo final á súa vida, acabando coa ditadura.

O asasinato das irmás Mirabal, e o seu intento de encubrimiento, supuxo un fito na visión da muller e a seu estatus. Así en 1981 realizouse en Bogotá (Colombia), o Primeiro Encontro Feminista de Latinoamérica e do Caribe. E unha das decisións de devandito encontro foi a de que a partir dese mesmo momento o día 25 de novembro (recordatorio do asasinato), sería o Día Internacional de Non Violencia contra as Mulleres. Anos máis tarde, en 1993, a Asemblea Xeral da Nacións aprobaría a Declaración sobre a Eliminación da Violencia contra a Muller. Nela acabou definindo a violencia cara á muller como “todo acto de violencia baseado no xénero que ten como resultado posible ou real un dano físico, sexual ou psicolóxico, incluíndo as ameazas, a coerción e a prohibición arbitraria de liberdade, suceda este feito na vida pública ou na privada”. Seguindo nesta liña a Asemblea Xeral das Nacións Unidas, na súa resolución 54/134 de 17 de decembro de 1999, resolveu que a partir do ano seguinte o 25 de novembro sería a data estipulada como Día Internacional de Eliminación da Violencia contra a Muller.

Mobilizacións 25 de novembro.

  • A Coruña, 20:00 h. Obelisco.
  • A Estrada, 20:30 h. diante do Concello.
  • A Gudiña, 20:00 h. diante da Casa do Concello.
  • Ames, 18:00 h. na Praza do Concello.
  • As Pontes, 20:30 h. na Praza do Hospital.
  • Betanzos, 20:00 h. no Palco da Música.
  • Cambados, 19:30 h. Saída do Concello/Praza Asorei.
  • Carnota, 20:00 h. na Praza da Pedra.
  • Cee, 20:30 h. na Praza 8 de Marzo.
  • Celanova, 20:00 h. na Praza Maior.
  • Compostela, 20:00 h. na Praza 8 de Marzo.
  • Ferrolterra, 19:00 h. no Cantón de Molíns.
  • Lugo, 20:00 h. diante do Concello.
  • Marín, 20:30 h. na Praza 8 de Marzo.
  • Melide, 20:00 h. na Praza do Convento.
  • Miño, 19:00 h. na Praza do Parchís.
  • Monforte, 20:30 h. na Praza de España.
  • Ourense, 20:00 h. na subdelegación do Goberno.
  • Padrón, 20:00 h. na rúa Rosalía de Castro.
  • Pontevedra, 20:00 h. na Peregrina.
  • Rianxo, 20:00 h. na Praza de Castelao.
  • Ribeira, 20:00 h. na Praza do Concello.
  • Sarria, 20:30 h. na Praza da Vila.
  • Val Miñor, 20:00 h. no cruce da Ramallosa.
  • Verín, 20:30 h. na Praza do Concello.
  • Vigo, 20:00 h. cruce de Vía Norte con Urzaiz.
  • Vilalba, 20:30 h. na Praza da Constitución.

Fina Casalderrey atrévese a tratar o tema da violencia contra as mulleres desde os ollos dun neno, ofrecendo un relato que sen dramatismo, pero con toda a clareza, pon de relevo a manifestación máis dolorosa da desigualdade de xénero». XELA VOLVEUSE VAMPIRA!!, de Fina Casalderrey e ilustracións de Noemí López Vázquez.

GÁLIX nomea a María Jesús Fernández Socia de Honra 2019

A xunta directiva de GÁLIX (Asociación Galega do Libro Infantil e Xuvenil) decidiu por unanimidade nomear Socia de Honra 2019 a María Jesús Fernández Fernández, experta en Literatura Infantil e Xuvenil, mestra, crítica literaria e tradutora.

Chus Fernández é socia fundadora de GÁLIX (1989), onde ademais ocupou os cargos de vogal e vicepresidenta. Actualmente colabora coa revista CLIJ (Cuadernos de Literatura Infantil y Juvenil) elaborando as recensións e artigos sobre Literatura Infantil e Xuvenil galega, e con outras publicacións como Revista Galega de Educación, Peonza ou Platero. Forma parte tamén do consello de redacción da revista Criaturas.

A maiores, colaborou coa revista Fadamorgana durante o tempo en que esta se publicou (1999-2008), foi coordinadora do Seminario Papeles de Literatura Infantil e en 2004 recibiu o Premio Xerais á cooperación editorial polo seu traballo como crítica literaria.

A entrega do galardón terá lugar o venres 15 de novembro ás 19.30 h, nun acto aberto ao público na librería Lume da Coruña. No seu decurso, o ilustrador Xosé Cobas, amigo da homenaxeada e socio de GÁLIX, realizará a laudatio; e o presidente de GÁLIX, Xosé A. Perozo fará entrega dunha escultura conmemorativa deseñada por Noemí López.

Nas anteriores edicións, esta mesma distinción foi outorgada a Xavier Senín, David Otero, Xosé Neira Vilas, Agustín Fernández Paz, Fina Casalderrey, Xoán Babarro, Helena Villar Janeiro, Marifé Quesada e Paco Martín.

Fonte: GÁLIX

Centenario da II Asemblea das Irmandades da Fala

Para celebrarmos o centenario da II Asemblea das Irmandades da Fala, na Libraría Couceiro, o mércores 13 de novembro ás 19.30 horas, o profesor e doutor Emilio Xosé Ínsua disertará sobre esta efeméride.

A conferencia xirará arredor do contexto, desenvolvemento e significado da segunda Asemblea Nacionalista, celebrada polas Irmandades da Fala en Compostela en novembro de 1919, hai agora exactamente cen anos. Repasaranse os debates afrontados, as figuras máis sobranceiras participantes e as conclusións adoptadas, con algunhas reflexións desde a perspectiva que nos brinda o tempo histórico transcorrido desde entón.​

Emilio Xosé Ínsua, autor de A nosa terra é nosa! A xeira das Irmandades da Fala (1916-1931)

 

A escritora coruñesa Pilar Pallarés, galardoada co Premio Nacional de Poesía 2019

A galega Pilar Pallarés foi galardoada hoxe co Premio Nacional de Poesía 2019, por Tempo fósil, unha obra distinguida por transmitir “con profunda sabedoría e emoción” a experiencia da perda, segundo destacou o xurado.

Pilar Pallarés (Culleredo, A Coruña, 1957) é licenciada en Filoloxía Galega pola Universidade de Santiago de Compostela, traballa como profesora de literatura galega e colabora como articulista en diversos medios, como A Nosa Terra, El País ou Si scrive.

En 1979, o seu primeiro libro publicado, Entre lusco e fusco, gañou o premio Poesía Nova de O Facho, e, en 1983, a súa seguinte obra, Sétima soidade, gañou o Premio Esquío.

Posteriormente publicou, entre outros, os libros de poemas Livro das devoracións (1996), Poemas (2000), Leopardo son (2011), polo que recibiu o Premio da Asociación de Escritores en Lingua Galega, Amor en feminino: antoloxía das poetas galegas de Rosalía á Xeración dos 80, (2006), Baía Edicións. Edición de Maximino Cacheiro Varela.e Tempo fósil (2018), merecedor do Premio da Crítica 2018.

O premio, concedido polo Ministerio de Cultura e Deporte, está dotado con 20.000 euros.

O xurado distinguiu a obra de Pallarés por “transmitir con profunda sabedoría e emoción, a un tempo lúcida e desgarrada, a experiencia da perda e da destrución do vivido, do que nos configura, desde unha conciencia da paisaxe como un corpo vivo”.

O xurado estivo presidido por Carlos Alberdi Alonso, director do gabinete do ministro de Cultura e Deporte, e como vicepresidenta actuou Begoña Cerro Prada, subdirectora xeral de Promoción do Libro, a Lectura e as Letras Españolas.

 

Feliz Día das Bibliotecas

Desde 1997 celébrase o Día da Biblioteca o 24 de outubro, una conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administracións autonómicas. Esta asociación, membro da OEPLI, facilita na súa páxina o cartel e o pregón para esta conmemoración nas diferentes linguas do Estado, obra desta vez do ilustrador Miguel Calatayud e a escritora Gemma Pasqual.

Pola súa parte, o Ministerio de Cultura e Deporte propón este ano 2019 a incorporación do lema “aptas para todos os públicos”, co obxectivo de salientar o papel das bibliotecas na promoción da igualdade de xénero.

As bibliotecas escolares galegas teñen o seu propio lema para este curso 2018/2019, BIBLIOTECA ESCOLAR, VIVEIRO DE CIDADANÍA, que conta cunha imaxe propia creada por Óscar Villán. Os carteis editados con este lema están xa en todos os centros educativos. As bibliotecas escolares están xa en plena celebración do seu día, unha oportunidade para inaugurar novos espazos, abrir as portas á comunidade educativa e presentar ás familias os recursos e as actividades da biblioteca, programar actos específicos nos que lembrar as oportunidades que ofrece a biblioteca para estimular a formación lectora do alumnado e reforzar a adquisición de todas as competencias e contidos incluídos no currículo.

A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar as outras, que os pon en contacto con eses outros espazos do coñecemento e do lecer, eses lugares nos que pasan moitas cousas (e todas boas), que son as bibliotecas públicas, eses lugares para a igualdade e a diversidade que son as BIBLIOTECAS.

Baía Edicións celebra este día feliz de contar con moitos dos seus títulos en todas as bibliotecas de Galicia.

Xerardo Quintiá Pérez gaña o II Premio Fina Casalderrey de Literatura Infantil pola Igualdade

O Xurado, formado por Ana Luísa Bouza Santiago, socióloga, colaboradora de medios de comunicación, membro do consello de redacción da revista Andaina e administradora da revista Luzes, Montse Pena Presas, profesora da USC, escritora, colaboradora de medios de comunicación e crítica literaria, Patricia Porto Paderne, xerente da libraría compostelá especializada en temática feminista Libraría de Mulleres Lila de Lilith, Pilar Sampedro Martínez, especialista en xestión de bibliotecas escolares / literatura infantil e vicepresidenta de Gálix, e a directora editorial de Baía Edicións, María Belén López Vázquez, como secretaria, resolveu conceder por unanimidade o II Premio Fina Casalderrey de Literatura Infantil pola Igualdade á obra presentada baixo o lema “O País do Gran Furado”.

Aberta a plica correspondente, a mesma resultou corresponder á presentada polo escritor friolés Xerardo Quintiá Pérez, que leva como título definitivo O País do Gran Furado.

O Xurado manifestou, entre outros aspectos, o seguinte:

«O País do Gran Furado é unha obra que resalta polo seu humor irreverente, pola súa transgresión dos contos populares e por reivindicar a poesía, a alegría e a revolución como camiños para procurar a igualdade.

Ademais, a resolución de conflitos desde unha perspectiva pacifista e a través da palabra, nunha historia na que Toribia e a súa banda de punk son quen de axudar a outras mulleres, é outro dos grandes acertos deste texto paródico, distópico e humorístico».

O conto emprega a poesía narrativa como recurso moi apropiado para que o público lector ao que vai dirixido (nenas e nenos de 3 a 8 anos) interiorice máis facilmente a mensaxe da súa historia.

A obra será publicada por Baía Edicións en álbum ilustrado a toda cor na colección Contoxconto antes do mes de outubro e o autor recibirá 5.000 € cos que está dotado este premio.

O Premio Fina Casalderrey de Literatura pola Igualdade trátase do primeiro destas características que se convoca en Galicia, xurdido a raíz das carencias percibidas dalgunhas temáticas nos contos infantís, temáticas  que poden axudar á construción dun imaxinario en igualdade entre mulleres e homes xa desde a infancia, necesario para un mundo máis xusto.

Mañá, 17 de maio, celebramos o DÍA DAS LETRAS GALEGAS con ANTONIO FRAGUAS

Antonio Fraguas naceu en Loureiro (Cerdedo-Cotobade) o 28 de decembro de 1905. Fillo de Manuel Fraguas Rodríguez e de María Teresa Fraguas Vázquez, foi rexistrado inicialmente cos dous apelidos da nai e só pasaría a apelidarse Fraguas Fraguas en 1912, cando o pai volveu do Brasil onde estaba emigrado desde meses antes do seu nacemento, casou coa nai e recoñeceu o fillo.

Aconsellada polo mestre de Antonio, que viu no neno capacidade para o estudo, a familia matriculouno no Instituto Xeral Técnico de Pontevedra para que cursase o bacharelato. Neste centro tivo como docentes a Castelao ou Antón Losada Diéguez, determinantes na súa escolla a prol do galeguismo. Con outros estudantes fundou en 1923 a Sociedade da Lingua co obxectivo de defender o galego e redactar un dicionario.

A década dos 20 foi especialmente intensa para Antonio Fraguas. En Santiago de Compostela, a onde chegara para estudar Filosofía e Letras, afiliouse ás Irmandades da Fala e ingresou no Seminario de Estudos Galegos, do que sería secretario de actas e bibliotecario. Finalizada a carreira, iniciouse na docencia como profesor auxiliar da Facultade de Xeografía e Historia.

Nos anos 30 casou con Teresa Martínez Magariños (1932) e empezou a traballar no instituto da Estrada (1933). No ámbito da política, coa chegada da República creouse o Partido Galeguista, no que Antonio Fraguas se integrou e desde cuxas filas participou activamente na campaña a prol do Estatuto de Autonomía.

Como consecuencia desta actividade galeguista, tras o golpe de Estado de 1936 foi perseguido e a Comisión de Depuración de Enseñanza de Pontevedra ordenou a súa separación do ensino público. Non sería ata 1950 cando Antonio Fraguas volvese aprobar a oposición a cátedras de instituto, o que o levaría a exercer no Masculino de Lugo e, a partir de 1959, no Rosalía de Castro de Santiago, onde se xubilaría en 1975.

A persecución política e a ditadura non reduciron o seu compromiso con Galicia, senón que Antonio Fraguas continuou colaborando en todas as iniciativas a prol da cultura galega da posguerra: foi membro da Real Academia Galega, xefe da sección de Etnografía e Folclore e mais secretario do Instituto Padre Sarmiento de Estudos Galegos ou membro fundador e tesoureiro do Padroado Rosalía de Castro, entre outros cargos. Tras a morte de Franco, participou na creación do Museo do Pobo Galego, do que foi director e cuxo padroado presidiu máis tarde, e ingresou como membro -e, posteriormente, coordinador da sección de Antropoloxía Cultural- do Consello da Cultura Galega.

Coa democracia chegou tamén o recoñecemento ao seu compromiso coa cultura de Galicia: recibiu o Pedrón de Ouro, os premios Trasalba e Otero Pedrayo ou a Medalla Castelao, entre outras distincións. En 1992 a Xunta de Galicia nomeouno cronista oficial de Galicia.

Faleceu en Santiago de Compostela o 5 de novembro de 1999, tres anos despois do pasamento da súa muller Teresa.

Obra

Antonio Fraguas Fraguas destacou como investigador nos campos da historia, da etnografía e do folclore, entre outros. O seu traballo está recollido en numerosas publicacións, fundamentalmente como colaboración en revistas ou obras colectivas. En todo caso, tamén publicou un considerable número de monografías, entre as que podemos sinalar, a título de exemplo, as seguintes:

  • Geografía de Galicia (1953)
  • Historia del Colegio de Fonseca (1956). Tese de doutoramento
  • Aportacións ó cancioneiro de Cotobade (1985)
  • Romarías e santuarios (1988)
  • Do Entroido (1994)
  • A festa popular en Galicia (1995)

Fonte: O portal da Lingua Galega

Feliz Día do Libro

O Día do Libro Mundial e dos Dereitos de Autor foi establecido pola UNESCO en 1995. E ao redor desta data, o 23 de abril morreron tres grandes da literatura universal. Miguel de Cervantes (falecido o 22 de abril e enterrado o día 23), William Shakespeare e Inca Garcilaso de la Vega.

Non obstante, moi poucas persoas coñecen a orixe española desta iniciativa ou o feito de que nos seus inicios foi celebrada nunha data moi diferente: o 7 de outubro, cando se cría que o creador do Quijote naceu.

Inicialmente foi Vicente Clavel, o escritor valenciano, quen promoveu a proposta presentada na Cámara Oficial do Libro de Barcelona en 1923 para dedicar un día de cada ano para celebrar o Festival do Libro. Dous anos despois, Clavel reiterou a súa proposta en Cataluña e comezou estes mesmos esforzos en Madrid.

Finalmente, o 6 de febreiro de 1926, o rei Alfonso XIII aprobou e asinou o real decreto que estabeleceu que o 7 de outubro de cada ano conmemoraríase o nacemento de Cervantes cunha festa dedicada ao libro español.

Durante case 5 anos celebrouse nesta data, pero pronto xurdiron as dúbidas e críticas do día escollido. Por unha banda porque o día exacto do nacemento do mestre das letras castelás non se sabe con certeza. E por outra banda porque, tendo en conta que é unha festa de rúa, prestabase máis a que fora en primavera que no outono.

Finalmente, en 1930, acordouse trasladar definitivamente o Festival de Libros ao 23 de abril. A publicación de novidades e a organización de actos de sinaturas de copias coa autoría, tradición que sobreviviu ata a data actual, tamén comezou a xeneralizarse nesa data.

Máis tarde, en 1995, o goberno español presentou á UNESCO a proposta da Unión Internacional de Editoras de establecer esta data de primavera como Día Mundial do Libro. E a resposta non esperou, aprobada ese mesmo ano.

Anos máis tarde, a UNESCO promoveu unha nova iniciativa relacionada co mundo das letras: a cita anual dunha cidade como Capital do Libro Mundial. A decisión é tomada pola Unión de editores internacionais, a Federación Internacional de Librerías e a Federación Internacional de Asociacións de Bibliotecarios e Bibliotecas.

PARA CELEBRAR O DÍA DO LIBRO ESCOLLE ALGÚN DOS TÍTULOS DE BAÍA EDICIÓNS

Celebramos hoxe o Día Internacional da Nai Terra

O Día Internacional da Nai Terra celébrase desde 1970 co obxectivo de sensibilizar á humanidade sobre os problemas xerados pola superpoboación, a contaminación, a conservación da biodiversidade e outras preocupacións ambientais.

A primeira historia do Día da Terra remóntase a 1968 cando o Servizo Público de Saúde dos Estados Unidos organizou o Simposio sobre Ecoloxía Humana para estudantes de diferentes lugares para escoitar que os científicos falan dos efectos do deterioro ambiental na saúde humana.

Dous anos máis tarde, en 1970, o senador e activista ambiental Gaylord Nelson propuxo a creación dunha axencia ambiental e realizouse unha demostración masiva, á que asistiron máis de dúas mil universidades, decenas de miles de escolas públicas, centos de comunidades. Esta presión social dá resultados e o goberno dos Estados Unidos creou a Axencia de Protección Ambiental e unha serie de leis destinadas a protexer o medio ambiente.

En 1972 celebrouse a primeira conferencia internacional sobre o medio ambiente. O Cumio da Terra de Estocolmo, cuxo obxectivo era sensibilizar aos líderes mundiais sobre a magnitude dos problemas ambientais. Ao longo da historia deste Día Internacional da Nai Terra, realizáronse accións moi importantes en todo o mundo.

En BAÍA EDICIÓNS recomendamos moitos dos títulos de Baía Verde que nos axudarán a realizar un cultivo ecolóxico, sen químicos  etc. AQUÍ

MÁIS INFORMACIÓN

Celebramos hoxe o Día Internacional do Libro Infantil e Xuvenil

O 2 de abril celébrase o Día Internacional do Libro Infantil e Xuvenil, coincidindo coa data do nacemento do escritor danés Hans Christian Andersen, autor de historias tan populares como O soldado de chumbo, O Patito feo ou A sereíña.

O obxectivo desta data é promover bos libros infantís e xuvenís para nenas e mozas así como a súa lectura.

Con motivo do Día Internacional do Libro Infantil e Xuvenil realízanse actividades de animación á lectura en bibliotecas públicas e escolas. Pero todas as familias nos nosos fogares podemos fomentar o hábito de ler en nenos, gozar dunha historia coas máis pequenas e incluso dar exemplo, non só este día, senón todos os días, facendo ver aos nosos fillos o pracer dunha boa lectura.

En Baía Edicións atoparás o que precisas! Libros sobre natureza, de investigación, emocións, clásicos, a nosa historia, animais, igualdade…   PREME AQUÍ