Entradas

As empresas galegas usan máis software de código aberto que a media española

A fenda tecnolóxica que durante anos existiu entre Galicia e España en moitos indicadores relacionados coa Sociedade da Información desapareceu xa en moitos eidos ou mesmo se pode enunciar á inversa, sobre todo en certos grupos de idade ou sectores. Os datos ofrecidos polo informe La Sociedad de la Información en España, da Fundación Telefónica, correspondentes a 2013, confirman o crecemento cuantitativo e cualitativo do uso de internet e das novas teconoloxías en Galicia, onde o 65,3% da poboación afirmou ter empregado a rede nos últimos tres meses, unha cifra aínda seis puntos por debaixo da media española (71,6%).

Porén, se atendemos a outros indicadores, vemos como os galegos e galegas menores de 45 anos utilizan Internet moi por riba da media do Estado. Son usuarios habituais da rede o 85% dos galegos e galegas que contan entre 35 e 45 anos, fronte ao 83,5% dos españois nesa franxa de idade. Galicia tamén mellora a media nas persoas entre 25 e 35 anos (93,3% fronte a 92%).

Outros indicadores tamén amosan esta realidade. Galicia é a segunda comunidade autónoma no uso da Administración electrónica para obter información de páxinas web e en descarga de formularios oficiais. Un 61,5% dos internautas galegos obtivo información de webs da Administración (5,5 puntos máis que a media estatal) e un 43,1% descargou formularios oficiais (3,5 puntos máis que a media estatal).

De igual xeito, Galicia é a segunda comunidade autónoma coa maior porcentaxe de fogares (o 55%) que se conectan a Internet dende dispositivos móbiles (tanto telefonía como tabletas), superando en oito puntos a media estatal. O mesmo sucede con indicadores coma o do comercio electrónico. O 22,7% dos españois mercan habitualmente a través da rede (cando menos unha vez nos últimos tres meses), algo por riba dos datos de Galicia (21,2%). Pero, de novo, analizando os datos por idades, vemos como entre os 25 e os 35 anos o 41,7% dos galegos mercan habitualmente en Internet (fronte á media española do 35%), e o mesmo pasa nos que teñen entre 35 e 45 anos (34,9% en Galicia, fronte a 30% no conxunto de España). Por riba de 45 anos o diferencial é claramente positivo a favor de España.

E o mesmo podemos destacar ao analizar os datos das empresas galegas de máis de dez traballadores. Un 98,2% das empresas galegas de 10 ou máis empregadas ten contratada conexión a Internet, superando a media estatal (98%), e un 99,3% destas dispón de banda larga. Ademais, o 64,4% destas empresas dispón de páxina web e o 74,4% utiliza software de código aberto, 3,9 puntos máis que a media estatal. O informe da Fundación Telefónica tamén destaca que “emerxen novas solucións TIC no ámbito empresarial” e, por exemplo, un 16,3% das empresas galegas de 10 e máis traballadoras utilizan cloud computing, un 25,6% participaron en medios sociais, un 11,6% empregou canles de contidos multimedia e un 10,5% fixo uso de blogs ou Twitter.

Onde Galicia aínda se sitúa por debaixo dos indicadores do conxunto de España é nas pequenas empresas, de menos de 10 empregados, que constitúen a meirande parte do tecido empresarial do noso país. Iso si, neste eido, o diferencial foise reducindo nos últimos anos. Un 71,2% das microempresas galegas dispón de fronte, fronte ao 71,6% do Estado; o crecemento en Galicia foi dun 13,6%, moi superior ao estatal (0,4%), reducindo nun ano a fenda de 8,6 a 0,4 puntos. O 64,9% das microempresas galegas ten conexión a Internet, aumentando un 12,3% e reducindo a distancia coa media estatal en 6,6 puntos. Un 28,1% das microempresas con conexión a Internet dispón de web, un 15,2% máis que o ano anterior.

O informe tamén destaca que “o sector TIC ten especial relevancia no tecido empresarial galego”, pois Galicia é a quinta Comunidade en número de empresas TIC (2.029), cun crecemento do 2,7% e emprega 15.144 traballadores e traballadoras.

Fonte: Praza

Publican estudos sobre a influencia, relación e contacto entre o galego, castelán e portugués

O CCG acolleu a presentación do libro “Contacto de linguas, hibrididade, cambio: contextos, procesos e consecuencias”, coeditado co Instituto da Lingua Galega. O volume aborda a relación do galego coas outras linguas do seu contorno. Na presentación estiveron presentes Ramón Villares, presidente do Consello da Cultura Galega, Ernesto González Seoane, director do Instituto da Lingua Galega e dous dos editores do libro: Henrique Monteagudo e Gabriel Rei Doval.

“Este volume é posible logo de catro décadas de deseño da norma e do estándar da lingua galega”, sinalou o profesor da Universidade de Wisconsin e coeditor da publicación Gabriel Rei Doval, “porque tenta aproximarse sen complexos a unha área difusa e na que se producen estas dinámicas de contacto co castelán e co portugués”. A presenza do galego no “léxico dispoñible” do castelán de Galicia ou fenómenos tan controvertidos coma o ‘castrapo’, o neofalantismo, o purismo lingüístico ou a fronteira entre o galego e o portugués son analizados neste volume por diferentes especialistas. Para os editores, “cando se pensa na historia e na situación lingüística actual de Galicia, o prolongado contacto entre o galego e o castelán é unha realidade imposible de ignorar”.

Os expertos destacaron a fortaleza do galego na convivencia con outras linguas. “Ponse moito acento na influencia do castelán sobre o galego, pero o galego tamén inflúe no castelán”, sinalou Henrique Monteagudo, coeditor da publicación e profesor da USC. “É un libro que demostra a madurez dunha comunidade científica”, sinalou Ramón Villares, presidente do Consello da Cultura Galega, “e que permite un diálogo non moi frecuente”, sinalou o Presidente do CCG, en alusión á perspectiva máis tradicional de estudar os idiomas coma compartimentos estancos, e non na súa relación cos idiomas do contorno, “pero hoxe podemos dialogar porque o espazo construído é firme e seguro”.

Unha colección de dez volumes

Ernesto González Seoane, director do Instituto da Lingua Galega, encadrou o libro dentro da liña de publicacións e traballos desta entidade. “Forma parte dunha serie de dez volumes que vimos coeditando co CCG desde o ano 2002, e en certo xeito, son un balance sobre o que sabemos en diferentes ámbitos relacionados coa lingua a nivel galego e internacional”.

O volume recolle as contribucións realizadas ao Simposio ILG 2010. Deste xeito, no redacción do volume participaron especialistas como Eva Gugenberger, María Álvarez de la Granja, Belén López Meirama, Dante Lucchesi, Marta Negro Romero, Xosé Afonso Álvarez Pérez, Fernando Ramallo, Gabriel Rei-Doal, Francisco Dubert, Eva Fernández ou Fernando Venâncio.c.

Fonte: Culturagalega

Convocada a edición número 23 dos Premios Irmandade do Libro

A Federación de Librarías de Galicia vén de convocar os  XXIII Premios Irmandade do Libro, cos que a organización libreira de Galicia quere render homenaxe aos que durante o ano 2013 destacaron no seu traballo para que o libro e a lectura segan a ter un presente activo e un futuro determinante para a sociedade galega. Os premios recoñecen as seguintes modalides: Centros de Ensino, Librarías, Fomento da Lectura, Libro do Ano,Libro Infantil e Xuvenil do Ano,Obra Editorial, Autor – Autora.

As bases dos premios poden consultarse na web dos libreiros galegos. A entrega de premios será na localidade coruñesa de Rianxo o día 5 de abril.

BAÍA EDICIÓNS gañou o Premio a OBRA EDITORIAL DO ANO 2012 polas GUÍAS DA NATUREZA Baía Verde. Este recoñecemento nos Premios Irmandade do Libro á colección Guías da natureza Baía Verde tivo unha especial importancia para nós porque describe case a nosa traxectoria vital, como empresa e como proxecto cultural desde os seus inicios no ano 1990, un ano antes da publicación da primeira edición da Guía de aves de Galicia. Máis información

Fonte: AGE

Concurso para ‘airear’ os cazapos e as trabadas á lingua e concienciar sobre o seu bo uso

Os cazapos xa non teñen escapatoria coa posta en marcha do FotoTrabadas, un concurso, promovido pola Asociación Trabalingua, que busca darlle caza a todos os erros que se poden apreciar nos carteis, na sinalización, nas misivas e noutros medios escritos dependentes da administración pública nos que se produza tanto un mal uso da lingua galega como a ausencia da mesma. A través desta iniciativa os integrantes da asociación universitaria dan un paso máis cara á concienciación e normalización da lingua galega no seu uso público, solicitando para iso a axuda de persoas alleas á agrupación para denunciar estes erros. Co obxectivo de incentivar a participación no concurso, a asociación outorgará un premio á fototrabada que máis apoios reciba nas redes sociais.

O curso pasado a asociación levou a cabo a iniciativa Ti informas, Trabalingua denuncia, e “foi de aí de onde saíu a idea das FotoTrabadas” explica Antía Veres, integrante de Trabalingua, facendo fincapé en que “o ano pasado organizabámonos doutro xeito, posto que na anterior actividade eramos os propios membros da agrupación os encargados de levar a cabo a acción quedando a sociedade como mera informadora ou indicadora”. Sen embargo, con este novo concurso o que buscan “é unha participación máis activa da sociedade, o que conleva unha maior concienciación, xa que o ollo crítico pasa de informar a actuar dun xeito máis directo” sinala Veres.

En Trabalingua saben da relevancia que neste momento teñen as plataformas dixitais e por iso centran o concurso nas mesmas. Sen embargo, tamén son conscientes “da inxente cantidade de información que lles chega aos usuarios das redes sociais a diario e, polo tanto, do difícil que é captar a súa atención e conseguir participantes activos” recoñece a integrante, que non dubida en afirmar que “aínda así, estamos moi contentos coa participación e coa colaboración que nos está a chegar por parte doutros colectivos á hora de difundir a actividade, cousa que aproveitamos para agradecerlles”.

Ata o momento teñen recibido 19 fototrabadas a través das redes sociais, aínda que “a gran maioría mandáronnolas a través do Facebook” indica Veres. “O que temos é unha participación clarisimamente maioritaria de mulleres. Rapaces, a que andades? Poñede as pilas!” subliña esta compoñente da asociación, invitando ao xénero masculino a participar na acción que ten o prazo aberto ata o 2 de febreiro.

Así funciona o Fototrabadas
As redes sociais son unha ferramenta esencial para a participación neste concurso que ten un funcionamento moi sinxelo. “Cada vez que vexades algún uso indebido do galego, ou a súa ausencia en calquera das administracións públicas, tirade unha foto e compartídea connosco a través do Facebook, do Instagram ou do Twitter” explican dende a organización. Despois eles farán unha recompilación de todas as imaxes recibidas a través das diferentes plataformas xuntándoas nun álbum de Facebook.

Esta recompilación resulta esencial para a votación e a escolla da persoa gañadora, xa que serán os propios usuarios que frecuenten a páxina en facebook da Asociación Trabalingua os que decidirán a fototrabada merecedora do premio, ou o que é o mesmo, a que máis “gústame” teña recibido antes do 2 de febreiro, data na que se pecha tanto a recepción de fototrabadas como a votación.

Actividades para concienciar
Trabalingua é unha asociación que xorde a partir dun grupo de estudantes que se decatan do seu interese común pola lingua galega despois de acudiren ás primeiras Xeiras da lingua en abril de 2009, organizadas polos Comités. A partir dese momento os seus membros traballan arreo para poñer en valor a lingua e a cultura galegas e para concienciar á sociedade sobre o seu bo uso. Para este fin teñen organizado actividades de moi diverso tipo e están a piques de presentar a súa programación para o segundo cuadrimestre do presente curso.

Fonte: Galicia Hoxe

Foto

A burra Ramona

A burra Ramona, un bo día, deixa de traballar e decide que quere voar. A súa decisión vai influír nunha chea de personaxes que, colaborando con ela, van conseguir realizar os seus soños aprazados e mesmo desouvir os mandados do exército e do rei.

MÁIS INFORMACIÓN

Galicia perdeu 17 bibliotecas entre 2010 e 2012

En 2012 había abertas en Galicia 505 bibliotecas, 17 menos que dous anos atrás. O Instituto Nacional de Estatística facía público recentemente o seu estudo bienal sobre este campo, no que se recolle a evolución do sector entre 2010 e 2012. No mesmo, verificase que o noso país está por baixo da media estatal en canto a número de visitas por habitante e ano (3,87 fronte a 4,63) e de préstamos (1,34 fronte a 1,78). Ademais, a nosa é unha das catro únicas comunidades onde minguou a cantidade destes espazos para o libro no período estudado, e ocupa o cuarto último lugar en canto a acceso a Internet desde estes centros. Os datos do INE verifican unha tendencia á baixa que se dá no número de bibliotcas en Galicia nos últimos anos, xa que desde 2008 desapareceron 45 centros deste tipo.

Fonte: Culturagalega

Nace o Magazine Cultural Galego

A xornalista Montse Dopico -colaboradora frecuente de medios como Praza Pública ou El País- reconvertiu o seu blog persoal, no que xa informaba da súa actividade profesional, no Magazine Cultural Galego. A partir de textos xa publicados e producidos para outros medios e outros textos novos a partir da actualidade cultural galega ou exterior.

Fonte: Culturagalega

Baía tamén no catálogo de agasallos do Nadal de Abertos ao Galego

Roupa, xoguetes, libros, alimentos ecolóxicos ou bonos para turismo rural son algúns dos contidos que achega o Catálogo de Nadal de Abertos ao Galego. A rede que agrupa preto de noventa empresas sensibilizadas coa lingua presentaba onte as súas propostas para agasallar nesta época na nosa lingua. Iria Taibo, coordinadora deste proxectos desde a Mesa pola Normalización Lingüística, impulsora da rede, animou a adquirir produtos en galego para as nosas festas.

http://issuu.com/abertosaogalego/docs/catalogo_abertos_2013_web

Coñecemos un pouco máis a Calros Silvar

Nace en Ferrol e reside en Sada (A Coruña). É diplomado en Interiorismo e Licenciado en Belas Artes (Madrid) e, actualmente, exerce de ilustrador. É debuxante, ilustrador e autor especializado en natureza, interpretación do patrimonio e divulgación ambiental. Imparte charlas, cursos e obradoiros de banda deseñada, debuxo, ilustración da natureza e divulgación ambiental. Comeza o seu periplo profesional como ilustrador editorial, humorista gráfico e autor de banda deseñada, aínda que o seu labor centrouse, durante case trinta anos, no deseño de produto, especialmente de pezas decorativas, para unha emblemática fábrica de porcelana galega. Nesta etapa exerce tamén, durante varios anos, como coordinador e co-monitor en cursos de cerámica en alta temperatura, tanto para nenos como adultos. Natureza, debuxo, escrita, lectura, fotografía e medios audiovisuais son as súas paixóns e o eixo do seu labor actual. MÁIS INFORMACIÓN

  • Bos días Calros Silvar, cóntanos… cando empezaches a ilustrar?

Empecei polos anos 78 ou 79, sendo aínda estudante de Belas Artes, con dúas obras case simultaneamente, unha era un folleto sobre as aves de Galicia, para ser usado polos seus autores (Patiño e Pedreira) nas escolas onde impartían clases… e que acabou sendo a primeira Guía das Aves de Galicia, editada por Galaxia no 1980. A outra foi o primeiro libro dunha colección que chegou a dez tomos, baixo o título de “Historia do Pobo de Xesús”, autoría de Xosé Chao Rego, editado por Edicións do Castro, e que deu pé a que entrara en contacto coa empresa coa que cheguei a traballar máis de 29 anos.

  • Tiveches algún referente ou estilo que che gustase en particular?

Pois a verdade é que non, seguín o meu propio xeito de facer, aínda que si gustaba da obra de certos ilustradores, coma Goñi, por nomear algún sobranceiro daqueles tempos.

  • Cales son as túas ilustradoras e/ou ilustradores favoritas/os?

Hai moitos autores dos que gusto, pero por cinguirme ao eido da ilustración da natureza nomearei algúns deles: Richard Lewington, Keith Brockie, Mitchell Beazley, Bruce Pearson, Christine Hutson, Darren Woodhead, Juan Varela, Diego Ortíz, Dranae, Francisco J. Hernández, Sandra Blair, J. A. Sencianes Ortega… fican moitos no tinteiro.

  • Que é o máis che gusta do teu traballo?

Poder facelo.

  • Algo que sempre me interesou foi o tema da inspiración: como fas? No momento de creación de ilustracións para libros infantís, narrativa, novela… acodes a algún dos teus referentes?

Non: leo o libro, escollo as escenas a ilustrar, maxínoas, emborrancho papel e vou depurando a composición e concretando a técnica e estilo máis acaídos (son un tanto camaleónico neste aspecto).

  • A cal das personaxes que creaches lle tes máis cariño?

Polo tipo de ilustración que fago non teño creado persoaxes, excepto na curta etapa na que fixen humor e banda deseñada. O primeiro e único personaxe que creei foi un neno (Xurxo) que dialogaba e interactuaba co seu amigo, un caracol agudo e sabichón (Balbino).

  • Con Baía nace a colección de Guías da natureza de Baía Verde con 25 títulos xa… entre títulos divulgativos sobre espazos naturais e guías de especies de fauna e flora galega.  Con cal das guías te quedarías? Por que?

Sinto un especial orgullo e aprecio por esta colección, pois foi a proposta miña que Baía a iniciou. A máis emblemática é a Guía de Aves, pero quedei máis satisfeito co resultado final (e falo exclusivamente do meu traballo) das Guía de mamíferos e de libélulas.

  • Con estas guías acadaches o 1º Premio Isaac Díaz Pardo ao mellor libro ilustrado pola Guía dos mamíferos no ano 2007, xunto co Premio Irmandade do Libro, na categoría de Mellor Obra Editorial en 2012. Que sentiches cando te informaron dos premios?

Pois loxicamente grande satisfacción, especialmente por ser unha das miñas guías favoritas. Alén diso, gustoume que se premiara un libro dunha colección emblemática para o noso país, e sen parangón no resto do Estado, pois non hai que esquecer que foi colección pioneira que non ten par en ningunha das outras linguas peninsulares.

  • A maioría dos teus títulos son guías de natureza, verdade?  Que guía foi a que máis traballo che dou?

A Guía de aves e máis a de cogomelos foron especialmente traballosas: a grande cantidade de especies e de detalles a ter en conta abondaron niso.

  • Tiveches algún problema con algún dos autores/as dos libros que ilustraches?

Non, con algún traballei máis comodamente ou con máis sintonía, pero non podo dicir que tivera problemas con ninguén.

  • Poderías explicarnos cales son os pasos a seguir cando realizas unha ilustración dunha ave ou unha árbore, por exemplo?

A primeira fase é a de documentación e, neste senso, procuro ter a miña propia documentación: bosquexos feitos pola miña man e directamente dos exemplares; se non queda outra utilizo outro material de referencia, empezando por fotos que eu mesmo poda ter feito ou material que o autor forneza.

Logo ven a fase de bosquexar no papel o exemplar ou a escena e, unha vez concretado, paso á fase de dar cor. Como traballo con acuarela, ás veces fago varias ilustracións ao tempo, aproveitando os tempos de secado dunhas para avanzar nas outras.

Unha terceira fase é, logo de escaneada a ilustración final, limpala e retocala dixitalmente.

  • E, en cuestión, de tempos… canto che leva facer unha ilustración para unha guía?

Pois depende moito do tema que se trate e no número de ilustracións que haxa que facer por cada especie, ou mesmo o nivel de detalle ou estilo que o autor do texto prefira. Algúns queren ilustracións máis soltas, tipo bosquexo, outros prefírenas moi detalladas… por termo medio digamos que entre 8 e 16 horas, pois as editoriais tamén marcan un ritmo e non podes durmir nos loureiros.

  • En 2012 nace a colección Aventura de vivir e, con esta colección, O carballo… Que pretendes con este libro?

Foquei o libro na dificultade que os seres vivos teñen para sobrevivir na natureza… e, a maiores, enfrontados co máis temible dos predadores: os humanos. Alén diso, o libro destaca, e tenta divulgar, a importancia ecolóxica, económica e cultural desta especie na nosa sociedade e no noso contorno natural.

  • A que público vai dirixido? Poderías explicarnos que podemos atopar neste libro?

Vai dirixido a nenos a partires de 10 anos e rapaces e adultos que non teñan especiais coñecementos no ámbito das ciencias naturais. É un libro de divulgación, interdisciplinar, no que tanto se fala de como dexergar as diferentes especies do xénero Quercus que habitan na nosa contorna, do seu hábitat e ecoloxía, como da súa importancia económica ou mitolóxica nas diferentes culturas europeas.

  • Visitaches moitos centros educativos presentando o teu libro, verdade? Que reacción atopaches no alumnado?

Si, xa levo varios Centros visitados e, polo xeral, despértase a curiosidade logo dun inicio tinxido de certa incredulidade… iso de que che vaian “soltar o roio” sobre unha árbore, así de primeiras, non soa moi ben!.

  • E falando nun ámbito máis global, como ves o papel da ilustración galega neste momento?

No mellor momento da súa historia, cun importante número de autores dunha calidade excepcional. Hai moita creatividade e calidade no país, mesmo recoñecida a nivel mundial.

  • E a situación no mercado editorial hoxe en día?

Pois nun dos peores momentos, hoxe a situación é case de parálise, e só nos salva a diversificación ou traballo no exterior. Supoño que os ilustradores de “Infantil-xuvenil” aínda van zafando, pois é o eido que mellor terma, pero o descenso radical das vendas e o estrangulamento da produción propia é letal para o ilustrador.

  • Se queres comentarnos algo máis sobre ti ou sobre a túas obras deixamos este oco…

Sobre min pouco máis podo dicir do que aireo na miña web, que logo todo se sabe!, e da miña obra, pois é o público quen a xulgará como mellor lle preste. A min só me resta centrarme nos meus proxectos e tentar facer o que máis me gusta o mellor que sei.

Grazas Calros polas túas respostas! Foi un pracer!

Os Premios da Cultura Galega 2013 entréganse hoxe no Gaiás

A Xunta entregará hoxe os Premios da Cultura Galega 2013, en recoñecemento a persoas e entidades en favor do desenvolvemento cultural da Comunidade, nun acto que se celebrará no Museo Centro Gaiás da Cidade da Cultura.

Así, o Premio da Cultura Galega das Letras entregarase á escritora Luz Pozo Garza; o de Artes Plásticas á Fundación Eugenio Granell e o de Artes Escénicas á Mostra de Teatro de Ribadavia.

Así mesmo, a modalidade de Patrimonio Cultural irá para o Museo do Castro de Viladonga; o premio á Promoción Exterior para o Instituto Arxentino-Galego Santiago Apóstol; o de música para o compositor Juan Durán e na categoría Audiovisual recibirá o galardón Bambú Producións. A nova categoría, o Premio da Cultura Galega de Lingua será para a asociación PuntoGal.

A gala contará nesta ocasión con varias actuacións, como a da formación Talabarte, o grupo de teatro Lusco e Fusco, a artista galego-palestina Najla Shami ou os bailaríns Miguel A. Ponte e Ana Serantes.

Fonte: GaliciaHoxe