Entradas

Presentación do libro ‘A herdanza do marqués’ en Vigo

A presentación do libro A herdanza do marqués, da colección infantil-xuvenil Meiga Moira, tivo lugar en Vigo o mércores día 15 de xullo de 2009, ás 19,30 horas, na Feira do Libro de Vigo (Praza de Compostela), en que interviñeron, Conchi Regueiro (autora do libro) e Patricia Gómez (coordinadora editorial de Baía Edicións).

Escrita en primeira persoa por cada unha das protagonistas desta intrigante historia, mostra dous vehículos distintos e, á par complementarios, de narrar: o tradicional, en que Xandra nos fai partícipe das súas preocupacións e vivencias directamente, e o propio das charlas pola Internet, en que Zoila non se dirixe directamente ao lector, senón aos seus amigos da cidade. Pode verse, tamén, como un xogo de irmandade entre o rural e o urbano, entre a modernidade e a tradición, entre o pasado e o presente, posto ao servizo da resolución dun enigma que condiciona os dous mundos.

[nggallery id=19]

Presentación do ensaio ‘Xeografía real e mítica das augas de Galicia’ en Santiago de Compostela

Baía Edicións presentou en Santiago o libro Xeografía real e mítica das augas de Galicia, de Gonzalo Xosé de Francisco da Rocha. O acto tivo lugar o sábado 8 de maio de 2010, ás 20:00 horas, na carpa da Feira do Libro de Santiago de Compostela (Paseo da Ferradura) no que intervviron, ademais do autor, Manuel López Torrente (Profesor de Ciencias Sociais e Comunicación de Vigo e xornalista da CRTVG) e Patricia Gómez Uzal (Coordinadora editorial de Baía Edicións).

Texto de Manuel López Torrente na presentación do 8 de maio de 2010 na Feira do Libro de Santiago de Compostela. Ver

Proxecto didáctico ‘Os dereitos do neno e da nena’

O programa Bocaberta de Política Lingüística fará gozar aos máis pequenos cos contacontos, obradoiros e teatriños de Os dereitos do neno e da nena.  O proxecto didáctico OS DEREITOS DO NENO E DA NENA, organizado por Baía Edicións en colaboración coa Secretaría Xeral de Política Lingüística realizaranse durante un prazo de tres meses, de outubro a decembro, un mes en cada cidade e centro comercial; nun horario de seis a oito horas, nos centros comerciais O Porto Centro de Ocio de A Coruña, Ponte Vella de Ourense e As Termas de Lugo.

Esta campaña pretende achegar e promover o emprego do galego entre os máis pequenos a través dun programa de contacontos e obradoiros baseados na colección de libros infantil Os dereitos do neno e da nena, de Baía Edicións escrita por Teresa Sabaté e ilustrada por Carme Solá, colección de carácter didáctico dirixida a rapaces de máis de catro anos que relata diversas aventuras que lle suceden aos personaxes coas que se pretende que os máis pequenos se vexan identificados, conseguindo a través das ilustracións espertar o seu interese pola lectura en lingua galega, ademáis de promover nos nenos e nenas actitudes que faciliten a creación de situacións xustas no seu contorno e trasladarlles outros valores de vital importancia para o seu futuro como o compañeirismo, a xustiza, a igualdade entre mulleres e homes…, sendo único material similar existente en lingua galega. Ao final das sesións de Os dereitos do neno e da nena, os monitores farán entrega do libro que corresponda a ese día, repartindo un exemplar a todos os rapaces participantes nas sesións.

Presentación dos libros ‘Boa Sorte’ e ‘O tempo do revés’ en Santiago de Compostela

Presentación dos libros Boa Sorte e O tempo do revés na Fundación Caixa Galicia de Santiago de Compostela en 2008. A colección Meiga Moira inicia unha serie de relatos de ficción con trasfondo científico. A autora e presentadora de televisión María Solar, combina a trama literaria cos contidos científicos, e nestes números subxacen, por unha banda, a meteoroloxía, e por outra os movementos do planeta. Ademais da historia de ficción, conteñen actividades didácticas realizadas polo pedagogo Arturo Iglesias e o debuxante e profesor Xosé Tomás, quen tamén os ilustrou. Meiga Moira, personaxe insignia da colección que dá nome ao premio de literatura infantil e xuvenil, conducirá a nenos e nenas polo apaixoante mundo da Ciencia, a través, claro está, da literatura.

Baía Edicións presenta unha nova web informativa

Baía Edicións conta, ata o momento, cunha web-tenda (www.baiaedicions.gal) onde están incorporados todos títulos que actualmente temos publicados. Nela podemos visualizar as súas coleccións, os libros que compoñen cada unha delas, así como toda a información de cada un dos títulos: autoría, ilustración, ISBN, páxinas, comentario da obra, imaxe da capa do libro etc. incluíndo tamén a opción de compra ou de agasallo segundo nos interese. No caso de libros de narrativa, tanto de adultos como de infantil-xuvenil, contamos coa posibilidade de visualizar tamén un capítulo do libro, co fin de axudar aos usuarios da rede a facerse unha idea clara do conxunto total da obra, como se estivesemos remexendo nos títulos que atopamos na libraría.

Nesta mesma web, contamos cun espazo onde incorporamos novas a diario, en relación á actualidade editorial, presentacións etc. Xa que cada día contamos con máis usuarios e estes nos solicitan máis información, pensamos en ampliar a nosa web, creando novos espazos onde poder incorporar artigos, reseñas, imaxes, videos etc. Un espazo interactivo, onde a editorial, os autores, colaboradores e calquera persoa que o desexe poida compartir a súa opinión sobre os artigos que, nesta nova web, se expoñen. Neste novo espazo web incorporamos varios apartados: Novas sobre a actualidade, Material didáctico, Xuntanza de escritoras, Encontro coa natureza, galería de imaxes e videos, e unha serie de recomendacións que Baía Edicións fai a todos os usuarios.

No apartado ‘Xuntanza de escritoras’ serán as escritoras as protagonistas deste espazo. Terán a posibilidade de incorporar artigos, reseñas, notas, relatos etc. O que queremos con este espazo é que non sexa unha simple exposición de textos, pretendemos que sexa algo máis…. un espazo para as escritoras, para que falen do seu papel na sociedade, de como ven a literatura. Co apartado ‘Encontro coa natureza’ pretendemos achegar a natureza a todo o mundo (nenos, adultos, especialistas etc.), incorporando no mesmo, reseñas, calendario de conmemoracións, artículos de opinión, consellos medioambientais etc. Pretendemos que sexa un espazo no que poida participar todo o mundo, enviándonos todos aqueles escritos, artigos, reseñas… que consideredes interesante compartir.

A presentación deste novo espazo de Baía Edicións será o día 11 de abril! Esperamos as vosas suxestións e recomendacións para facer deste novo espazo web un lugar de encontro para todas e todos, amantes da literatura e da natureza!

Se o que queres é información, visítanos!

Presentación na Coruña do libro ‘Deter o día cunha flor’ 1ª parte

Xulio López Valcárcel e Belén López Vázquez comentan a obra Deter o día cunha flor, de Luz Pozo Garza e José Valentín. Baía Edicións, 2009.

Espazo, esa palabra.

Espazo, esa palabra.

Ben tratando distancias siderais ou ben como cuestión básica para a ordenación dos obxectos, representa en xeral a oportunidade para facer cousas, pois son os sitios os que acaban por determinar a nosa acción. Sitios medibles en metros, áreas ou, nese misterio virtual, nos bytes, kilobytes das Novas Tecnoloxías, inaprensibles pero de capacidades inimaxinables.

As mulleres recoñecemos coma ninguén o verdadeiro valor do espazo, e as autoras de maneira especial: É significativo que o ensaio por antonomasia sobre a escrita de mulleres sexa precisamente “un cuarto de seu”, de Virginia Woolf, unha apelación á necesaria disponibilidade de sitios para a súa actividade creativa. O que seica a británica esquecía era tamén esa necesidade de contar con lugares onde ver e falar desa obra, naquela época na forma tradicional do tanxible conxunto de páxinas encadernadas. Na actualidade, esas páxinas teñen ademais a consistencia das pantallas, pero a necesidade segue intacta, ou aínda acrecentada: Temos moitas cousas que contar, e seguimos a precisar de lugares estables onde poder facelo.

E, como non, cando na mesma dimensión atopamos eses espazos e as vontades comúns, o produto resultante son as xuntanzas, verdadeiros viveiros de ideas e propostas, que, no caso da escrita, son impulsados polo motor do entusiasmo. Un entusiasmo que é vello amigo das autoras, fiel compañeiro en todo o seu proceso creativo. Unha xuntanza de escritoras vai ser, basicamente, un espazo do entusiasmo compartido, aínda que sexa nos terreos tan intanxibles do espazo virtual. A vocación común ofrecendo os mellores froitos da árbore da imaxinación e toda a reflexión que ese feito marabilloso implica.

Xuntanza de escritoras é, por tanto, ese recuncho acolledor e cheo de promesas que esta editorial pon a disposición das súas autoras na web, unha sala virtual onde a literatura é o motivo de reunión e que, como calquera estancia confortable, invita á permanencia. Aquí exporemos os nosos traballos, falaremos da escrita e intercambiaremos información sobre iso tan emocionante do negro sobre branco prolongando así a nosa paixón común aos límites case infinitos do ciberespazo. E é, tamén, a cordial invitación a quen se achegue para gozar por uns momentos dese encontro onde as historias e a palabra son os agasallos de benvida.

Texto: Conchi Regueiro