Entradas

ESCRIBIR …. EN GALEGO

Veño de publicar o meu primeiro libro. Moitos dos que me coñecen, sorprendéronse cando lles dixen que se ía editar un libro escrito por min.

“ Vaia, metícheste a escritora?”, foi a resposta maioritaria.

Non me metín a escritora, non creo que o feito de publicar un libro cambie para nada o que xa  fun sempre, dende que me lembro, dende que teño uso da palabra.  Penso que escritor é o que escribe, o que o fai por necesidade, por devoción ou por afección. Non me considero mais escritora porque publicara un libro, así como non considero que sexa mais artista aquel que amosa nunha exposición a súa obra, que o que garda para sí o froito da súa habelencia.

Coñezo a unha rapaza de trece anos que compón e toca a súa propia música, non o fixo nunca sobre un escenario, varía iso acaso a certeza de que leva dentro de sí unha gran artista?

Despois desa primeira cuestión, que non vai exenta de certa admiración pola súa parte, teño que dicilo, moita xente pregúntame tamén con mágoa que porqué escribín o libro en galego.
…..

Teño que recoñecer que a xente non lee moito en galego, quizais porque non estamos acostumados ó uso normativo desta lingua na nosa vida diaria, pero creo que se pode contar unha gran historia sen abusar de algunhas expresións enfaixadas que pululan polo noso dicionario, salvando sempre o uso axeitado do idioma.  Cando era mais pequena, a maioría dos libros que compartían habitación comigo, estaban escritos en galego, agora decátome de que os títulos que abondan na miña libraría están escritos en castelán. As veces eu tamén me pregunto en qué momento da vida cambiamos a nosa preferencia por ler nun idioma determinado.

“ En castelán terías oportunidade de chegar a un número maior de lectores, de acadar mais éxito”, dinme.

Pode ser, pero nunca me parei a pensar en que escribiría un libro para acadar certo renome, ou para chegar a un público determinado ( si tivera esta pequena cuestión en conta, escribiría en chino, posto que de seguro o público que alcanzase sería moito mais extenso ); simplemente escollín unha lenda da nosa terra, que transcorre en Galicia e que me pedía ser contada en galego. Nada mais.

Para responder a todas esas persoas, direi que escribo en galego porque podo, e porque sei facelo. Iso non quere dicir que non poida facelo en castelán, ou que non o vaia facer no futuro. Temos a inmensa sorte de nacer nunha terra onde, dende pequenos, se nos ensina a falar e escribir correctamente nos dous idiomas. Porqué desperdicialo, pois?

A próxima vez que me pregunten porqué escribo en galego, contestarei coa única resposta posible. E porqué non?

Texto: Natalia Carou

Natalia Carou fala de ‘O alento nas costas’ no Zigzag Diario

Como novidade literaria Natalia Carou presenta o seu primeiro traballo publicado no Zigzag Diario, O alento nas costas (colección infantil e xuvenil Meiga Moira), que alterna o mundo real coa época medieval reflectida a través dos soños. Esta entrevista pode visualizarse no minuto 21:15.

Zigzag Diario

Presentación do libro ‘A herdanza do marqués’ en Vigo

A presentación do libro A herdanza do marqués, da colección infantil-xuvenil Meiga Moira, tivo lugar en Vigo o mércores día 15 de xullo de 2009, ás 19,30 horas, na Feira do Libro de Vigo (Praza de Compostela), en que interviñeron, Conchi Regueiro (autora do libro) e Patricia Gómez (coordinadora editorial de Baía Edicións).

Escrita en primeira persoa por cada unha das protagonistas desta intrigante historia, mostra dous vehículos distintos e, á par complementarios, de narrar: o tradicional, en que Xandra nos fai partícipe das súas preocupacións e vivencias directamente, e o propio das charlas pola Internet, en que Zoila non se dirixe directamente ao lector, senón aos seus amigos da cidade. Pode verse, tamén, como un xogo de irmandade entre o rural e o urbano, entre a modernidade e a tradición, entre o pasado e o presente, posto ao servizo da resolución dun enigma que condiciona os dous mundos.

[nggallery id=19]

Presentación dos libros ‘Boa Sorte’ e ‘O tempo do revés’ en Santiago de Compostela

Presentación dos libros Boa Sorte e O tempo do revés na Fundación Caixa Galicia de Santiago de Compostela en 2008. A colección Meiga Moira inicia unha serie de relatos de ficción con trasfondo científico. A autora e presentadora de televisión María Solar, combina a trama literaria cos contidos científicos, e nestes números subxacen, por unha banda, a meteoroloxía, e por outra os movementos do planeta. Ademais da historia de ficción, conteñen actividades didácticas realizadas polo pedagogo Arturo Iglesias e o debuxante e profesor Xosé Tomás, quen tamén os ilustrou. Meiga Moira, personaxe insignia da colección que dá nome ao premio de literatura infantil e xuvenil, conducirá a nenos e nenas polo apaixoante mundo da Ciencia, a través, claro está, da literatura.

Entrega do IV Premio Meiga Moira ‘Violeta tamurana’

Baía Edicións entrega o IV Premio Meiga Moira 2010 Achegarte da Coruña. O acto de presentación tivo lugar, no marco de ACHEGARTE, na Coruña o sábado día 2 de abril de 2011, ás 12:00 horas, nas instalacións de Palexco (Peirao de Transatlánticos, s/n), da obra da autoría da escritora coruñesa Andrea Maceiras Lafuente, titulada Violeta tamurana, e ilustrada polo boirense Rodrigo Chao Blanco. No acto, ademais da autora, participou a escritora Marica Campo, integrante do Tribunal que resolveu o IV Premio Meiga Moira de Literatura Infantil 2010, e Belén López Vázquez, directora de Baía Edicións, que se encargaron de facer un achegamento crítico a esta obra.

Entrega do III Premio Meiga Moira ‘Os Globos de Andar’

Baía Edicións fai entrega do III Premio Meiga Moira 2008 ao libro Os Globos de Andar de Xavier López Rodríguez. Este acto tivo lugar no marco da feira Culturgal no edificio do PALEXCO na Coruña o día 4 de decembro, ás 11:30 horas, no que interviñeron, ademais, do autor, o catedrático de Literatura Galega da UDC, Carlos Paulo Martínez Pereiro como presidente do tribunal e Belén López Vázquez, directora editorial de Baía Edicións. O acto contou tamén coa realización dun contacontos do libro por parte de Fátima Fernández. Read more

Achegarte 2011

Baía Edicións contou con stand propio onde expoñer todos os seus libros: infantil-xuvenil, natureza, teatro, narrativa, divulgación, arte e escrita, poesía etc. O sábado 2 de abril ás 12:00 h. realizouse a entrega de premios “Meiga Moira 2011”, onde a gañadora, Andrea Maceiras, recolleu o seu premio pola obra Violeta Tamurana, publicada na colección que leva por nome. O domingo 3 de abril ás 17:30 h. contouse cun contacontos sobre a colección Rodribico: Divírtete co paxaro Rodribico. Read more