Entradas

Ánxela Gracián gaña o 10º Premio Meiga Moira de Literatura Infantil e Xuvenil 2022

Reunido e mirando á Baía da Coruña, hoxe 17 de maio de 2022 o xurado do 10.º Premio Meiga Moira, integrado por Violeta Meléndrez (influencer e bookstagramer divulgadora da literatura galega nas redes sociais), Pilar Ponte (profesora de ensino medio, dinamizadora da normalización lingüística no ensino e na sociedade e activista cultural), Armando Requeixo (investigador no Centro Ramón Piñeiro, profesor na USC, crítico literario e promotor do blog Criticalia), Blanca-Ana Roig (profesora na USC, investigadora da literatura infanto-xuvenil galega e crítica literaria), e Olalla Sánchez (xornalista de La Voz de Galicia e divulgadora da literatura infanto-xuvenil), outorgou por unanimidade o premio á obra Donas de nós, presentada baixo o lema “María Balteira”, que resultou ser da escritora Ánxela Gracián.

O xurado valorou en Donas de nós:

A súa proposta de revisión e reescrita da mellor tradición literaria ao incorporar como protagonistas personaxes como o Mago Merlín, a Fada Morgana, o Príncipe Azul ou os Reis Provenzais, creando un artefacto dramático metaliteraturizado non exento de humor e ironía, onde se visitan e actualizan temas importantes do noso tempo e de todo tempo dando unha ollada claramente identificada e feminista.

Tamén si, coa súa decisión quixo apostar pola escrita teatral como xénero idóneo para achegar os valores da creación literaria e como vehículo para convidar á mocidade a coñecer e recoñecer o mundo que nos rodea, as súas problemáticas e os seus retos e os camiños aínda por andar, así como unha ferramenta para o desenvolvemento persoal.

A obra premiada recibirá unha dotación económica a de 2.000 euros e será publicada por Baía Edicións na súa colección Meiga Moira.

Ánxela Gracián en 2018 foi gañadora coa obra As voces da auga, compartindo o premio con Pere Tobaruela e a súa obra Auga e Lume.

Baía Edicións fará entrega do III Premio Fina Casalderrey o próximo 17 de novembro

Baía Edicións fará entrega do III Premio Fina Casalderrey de Literatura Infantil pola Igualdade á autora, Marta Lado por A pita xefa. No acto participará Valentín García Gómez, secretario Xeral de Política Lingüística, Belén López Vázquez, directora de Baía Edicións e a autora e gañadora do premio, Marta Lado. Terá lugar no Pazo de San Roque de Santiago de Compostela o mércores día 17 de novembro ás 12:00 horas.

O Xurado do III Premio Fina Casalderrey de Literatura Infantil pola Igualdade estivo formado por Charo Baleirón Soñora, coordinadora do Departamento de Innovación Pedagóxica das Escolas Católicas en Galicia e dos recoñecidos Premios Frei Martín Sarmiento; María Jesús Fernández Fernández, socia fundadora de Gálix, colaboradora de revistas como CLICJ, Revista Galega de Educación, Platero e Criaturas, nas que centra o seu interese na divulgación da literatura infantil e xuvenil; Esther Gómez Suárez, propietaria da Libraría Moito Conto (A Coruña); Ángeles Roca López, Bibliotecaria, actualmente xubilada, gañou o Premio Nacional de Animación á Lectura, pola súa creación do Moucho Leroucho, auténtico dinamizador da lectura e do libro para xeracións de nenas e nenos de Cambre e Tania Vázquez García, profesora de ensino secundario, filóloga, investigadora e colaboradora de diversos plans de lectura e igualdade.

Aberta a plica correspondente, resultou ser a gañadora do premio a obra de Marta María Lado Ínsua, que leva como título definitivo A pita xefa.

O Xurado manifestou, entre outros aspectos, o seguinte:

“A temática axústase estritamente ás bases, criticando os roles de xénero tan asentados na nosa sociedade e loitando contra os estereotipos, cunha historia orixinal, divertida e reivindicativa sen caer en dogmas nin estereotipos.

Enmárcase nun mundo animal-natureza co que é doado que se identifiquen as lectoras e lectores aos que vai dirixida, considerando un acerto o emprego da imaxe do galiñeiro, que ilustra perfectamente as leis que rexen o comportamento dos distintos individuos que o forman, piramidal e dominada polo galo.

Abre a porta a unha mudanza dos comportamentos estabelecidos dun xeito lúdico sen caer no dirixismo e tratando á rapazada con intelixencia. Anima a romper cos esquemas sexistas dominantes, pon de manifesto  a utilidade da unión e anima  a loitar por un obxectivo igualitario.

O emprego do galego está moi coidado, presentando estruturas e léxico do noso, resultando un texto, fresco, divertido, con musicalidade, conectado con refráns e bastante retranca. A linguaxe é clara e está ben adaptada a primeiras lectoras e lectores.

Trátase, á fin, dun texto rico en imaxes, o que favorecerá o traballo de ilustración da obra. Ambos rexistros, texto e imaxe, poderán perfectamente complementarse e dar lugar a un fermoso álbum ilustrado”.

A obra será publicada por Baía Edicións en álbum ilustrado a toda cor na colección Contoxconto e a autora recibirá 2 500 € cos que está dotado este premio.

O Premio Fina Casalderrey de Literatura pola Igualdade trátase do primeiro destas características que se convoca en Galicia, xurdido a raíz das carencias percibidas dalgunhas temáticas nos contos infantís, temáticas  que poden axudar á construción dun imaxinario en igualdade entre mulleres e homes xa desde a infancia, necesario para un mundo máis xusto.

Día da Galiza Mártir na Coruña

O vindeiro luns, día 16 de agosto, ás 19.30 h celebraremos o Día da Galiza Mártir na Coruña.

Logo de vernos na obriga de adiar, por mor da COVID, esta actividade o ano pasado retomámola este 2021 e realizaremos o acto de homenaxe diante do monumento a Bóveda na rúa que leva o seu nome (na zona de Catro Camiños).

Este ano queremos facer algo especial que sexa homenaxe máis tamén momento para estar xuntas e por iso queremos festexalo e así contaremos con Susana Seivane que nos ofrecerá un pequeno concerto.

Teremos tamén con nós a  Mercedes Queixas que elaborou  o folleto dedicado a Elvira Bao, mestra represariada e con Ana Romero que elaborou o folleto dedicado a María Barbeito, mestra e pedagoga tamén represariada.

Aquelas persoas que nos acompañedes recibiredes de agasallo os dous últimos números do folleto de Mulleres de Palabra: o dedicado a Elvira Bao Maceiras e o dedicado a María Barbeito.

Ao ser ao aire libre non é necesario inscribirse.

Fonte: : Asociación Cultural Alexandre Bóveda

Marta María Lado Ínsua gaña o III Premio Fina Casalderrey de Literatura Infantil pola Igualdade

O Xurado do III Premio Fina Casalderrey de Literatura Infantil pola Igualdade estivo formado por Charo Baleirón Soñora, coordinadora do Departamento de Innovación Pedagóxica das Escolas Católicas en Galicia e dos recoñecidos Premios Frei Martín Sarmiento; María Jesús Fernández Fernández, socia fundadora de Gálix, colaboradora de revistas como CLICJ, Revista Galega de Educación, Platero e Criaturas, nas que centra o seu interese na divulgación da literatura infantil e xuvenil; Esther Gómez Suárez, propietaria da Libraría Moito Conto (A Coruña); Ángeles Roca López, Bibliotecaria, actualmente xubilada, gañou o Premio Nacional de Animación á Lectura, pola súa creación do Moucho Leroucho, auténtico dinamizador da lectura e do libro para xeracións de nenas e nenos de Cambre e Tania Vázquez García, profesora de ensino secundario, filóloga, investigadora e colaboradora de diversos plans de lectura e igualdade.

Aberta a plica correspondente, resultou ser a gañadora do premio a obra de Marta María Lado Ínsua, que leva como título definitivo A pita xefa.

O Xurado manifestou, entre outros aspectos, o seguinte:

“A temática axústase estritamente ás bases, criticando os roles de xénero tan asentados na nosa sociedade e loitando contra os estereotipos, cunha historia orixinal, divertida e reivindicativa sen caer en dogmas nin estereotipos.

Enmárcase nun mundo animal-natureza co que é doado que se identifiquen as lectoras e lectores aos que vai dirixida, considerando un acerto o emprego da imaxe do galiñeiro, que ilustra perfectamente as leis que rexen o comportamento dos distintos individuos que o forman, piramidal e dominada polo galo.

Abre a porta a unha mudanza dos comportamentos estabelecidos dun xeito lúdico sen caer no dirixismo e tratando á rapazada con intelixencia. Anima a romper cos esquemas sexistas dominantes, pon de manifesto  a utilidade da unión e anima  a loitar por un obxectivo igualitario.

O emprego do galego está moi coidado, presentando estruturas e léxico do noso, resultando un texto, fresco, divertido, con musicalidade, conectado con refráns e bastante retranca. A linguaxe é clara e está ben adaptada a primeiras lectoras e lectores.

Trátase, á fin, dun texto rico en imaxes, o que favorecerá o traballo de ilustración da obra. Ambos rexistros, texto e imaxe, poderán perfectamente complementarse e dar lugar a un fermoso álbum ilustrado”.

A obra será publicada por Baía Edicións en álbum ilustrado a toda cor na colección Contoxconto e a autora recibirá 2 500 € cos que está dotado este premio.

O Premio Fina Casalderrey de Literatura pola Igualdade trátase do primeiro destas características que se convoca en Galicia, xurdido a raíz das carencias percibidas dalgunhas temáticas nos contos infantís, temáticas  que poden axudar á construción dun imaxinario en igualdade entre mulleres e homes xa desde a infancia, necesario para un mundo máis xusto.

Baía Edicións convoca o III PREMIO FINA CASALDERREY de literatura infantil pola igualdade

Co motivo da celebración do 8 de marzo, para promover a educación en igualdade e como homenaxe a todas as persoas que fixeron a aposta de escribir literatura infantil non sexista, Baía Edicións, coa colaboración da Secretaría Xeral de Política Lingüística da Xunta de Galicia, convoca o III PREMIO FINA CASALDERREY de Literatura Infantil pola igualdade, que se rexerá polas seguintes bases:

BASES DO CONCURSO

Primeira

Poderán concorrer ao premio todas as autoras e autores de calquera nacionalidade que presenten os orixinais escritos en lingua galega conforme a normativa vixente.

As obras deberán atender ao concepto de literatura infantil non sexista e coeducativa en calquera dos seus aspectos, introducindo elementos críticos que cuestionen o modelo social sexista dominante.

Segunda
As obras a concurso deben ser orixinais, inéditas e non premiadas. O feito de participar implica o compromiso de non optar a outros premios coas mesmas obras mentres non se resolva este, compromiso que se estenderá máis aló da resolución de resultar gañadora.
Aproveitamos para lembrarmos as obras gañadoras do I e II Premio Fina Casalderrey de Literatura Infantil pola Igualdade, de especial interese por tratar temas necesarios:
A ocupación do espazo central no patio do colexio, na actualidade maioritario para os nenos, resultando unha radiografía sexista, da que diversos estudos están a poñer a atención. Ese é o tema que Antía Yañez aborda n’A reconquista.
Calcúlase que 800 millóns de mulleres no mundo están menstruando á vez, no que supón o maior derramamento de sangue pacífico no mundo. No entanto, a sociedade oculta este feito, mitifícao e mesmo o discrimina con certas actitudes. Desde logo, os contos infantís non o teñen moito en conta, pero Sabela Losada Cortizas si, dando como resultado Vermella.
O País do Gran Furado, de Xerardo Quintiá é unha obra que resalta polo seu humor irreverente, pola súa transgresión dos contos populares e por reivindicar a poesía, a alegría e a revolución como camiños para procurar a igualdade.

Día Internacional para a Eliminación da Violencia contra as Mulleres

O venres 25 de novembro de 1960 foron asasinadas as tres irmás Mirabal por orde do ditador dominicano Rafael Leónidas Trujillo. A sociedade dominicana sentiu moito as súas mortes, e moito máis no momento en que a prensa do país intentou ocultar o feito, converténdoo nun burdo accidente de estrada, e deste xeito presentouno nos diarios do país.

Trujillo (Rafael Leónidas Trujillo, 24-10-1891/ 30-5-1961), o dictador dominicano, realizara un dos seus actos represivos aos que xa tiña afeita á sociedade dominicana, pero, o que non puido adiviñar, é que este supoñería o inicio do seu fin (e da súa dinastía política) e acabaríase convertendo nun feito digno de recordo a nivel mundial e anualmente.

Non pasara un ano cando Trujillo foi asasinado (axusticiado dicían algúns diarios), e este atentado puxo final á súa vida, acabando coa ditadura.

O asasinato das irmás Mirabal, e o seu intento de encubrimiento, supuxo un fito na visión da muller e a seu estatus. Así en 1981 realizouse en Bogotá (Colombia), o Primeiro Encontro Feminista de Latinoamérica e do Caribe. E unha das decisións de devandito encontro foi a de que a partir dese mesmo momento o día 25 de novembro (recordatorio do asasinato), sería o Día Internacional de Non Violencia contra as Mulleres. Anos máis tarde, en 1993, a Asemblea Xeral da Nacións aprobaría a Declaración sobre a Eliminación da Violencia contra a Muller. Nela acabou definindo a violencia cara á muller como “todo acto de violencia baseado no xénero que ten como resultado posible ou real un dano físico, sexual ou psicolóxico, incluíndo as ameazas, a coerción e a prohibición arbitraria de liberdade, suceda este feito na vida pública ou na privada”. Seguindo nesta liña a Asemblea Xeral das Nacións Unidas, na súa resolución 54/134 de 17 de decembro de 1999, resolveu que a partir do ano seguinte o 25 de novembro sería a data estipulada como Día Internacional de Eliminación da Violencia contra a Muller.

Mobilizacións 25 de novembro.

  • A Coruña, 20:00 h. concentración Obelisco.
  • Ferrolterra, 19:00 h. concentración Praza Amada García.
  • Compostela, 20:00 h. concentración Praza do Obradoiro.
  • Ourense, 19:00 h. manifestación Subdelegación do Goberno.
  • Vigo, 19:00 h. manifestación saída Vía Norte.

Fina Casalderrey atrévese a tratar o tema da violencia contra as mulleres desde os ollos dun neno, ofrecendo un relato que sen dramatismo, pero con toda a clareza, pon de relevo a manifestación máis dolorosa da desigualdade de xénero». XELA VOLVEUSE VAMPIRA!!, de Fina Casalderrey e ilustracións de Noemí López Vázquez.

Celebramos hoxe o Día Universal da Nena e do Neno

O Día Universal da Nena e do Neno, celebrado todos os anos o 20 de novembro, é un día dedicado a todas as nenas e nenos do mundo.

É un día de celebración polos avances conseguidos, pero sobre todo é un día para chamar a atención sobre a situación dos máis desfavorecidos, chamar a atención sobre os dereitos das nosas crianzas e concienciar á xente da importancia do traballo día a día para o seu benestar e desenvolvemento.

UNICEF traballa durante todo o ano para conseguir cambios reais na vida dos nenos e nenas, e o Día Universal da Nena e do Neno é un momento clave para unirse a esta chamada global a favor da infancia e das nenas e nenos máis vulnerables.

Baía Edicións celebra este día con varios dos seus títulos da colección: OS DEREITOS DO NENO E DA NENA

Fonte: UNICEF

Fantástica tarde-noite en #Pardiñas na presentación de Ferreñas e Rock and Roll

Fantástica tarde-noite en #Pardiñas, por xentileza da veciñanza de Pardiñas e da Asociación Cultural #Xermolos, que levan anos amosando unha tenacidade e amor á nosa terra e artistas locais, que xa quererían para si moitos outros colectivos, co Festival de Pardiñas como evento máis visible e coñecido, pero que non é o único.

Pasada a corentena do festival, nesta LXI edición semella que a pandemia mundial lanzaba outro reto a estas activistas da cultura, mulleres e e homes bravos que non descartaron a súa celebración, aínda que algo cambiada.

Ademais doutras actividades ao longo do mes, o sábado 29 xuntaron na súa #CasadasArtes a #Ramón Vilar, “O Canteiro de Pardiñas”, quen nos falou do seu proceso creativo, a #SitoCarracedo quen converteu a presentación do libro “Palleta maldita” nun auténtico seminario sobre o seu traballo de lutier (a min sorprendeume a explicación da transformación dunha pequena castaloña) e a escola na que está formando a outras veciñas e veciños, e Laura Romero e Iria Pedreira, que, acompañadas por Mónica e Belén, falaron do proceso  creativo e de investigación  que levou á publicación de “Ferreñas e Rock&Roll”, libro que recupera a memoria das nosas músicas galegas pioneiras.

Mais como Festival que é, o día rematou coa música de MJPérez, que nos fixo esquecer a friaxe da noite malia ter que permanecer sentadas.

Como se indica na parada do autobús que hai á entrada, Pardiñas facendo Historia… non hai pandemia que poida co tesón e ganas de celebrármonos.

Parabéns e grazas por converter a vosa #CasadasArtes nunha casa para compartir; sabemos das dificultades para mantela, pero despois da fermosa exposición que tedes, non temos dúbida de que seguirá en pé e mellorando.

Laura Romero foi protagonista total desta edición do festival, participando no deseño do cartel, das camisetas, na presentación de Ferreñas e finalmente tocado o baixo con MJPérez.

Finalistas do XVII Frei Martín Sarmiento

Felices de comunicar que A banda de Raimunda, de Pablo Nogueira Campo e Manuel Uhía é unha das finalistas da 1ª categoría dos XVII Frei Martín Sarmiento.

Tras convocarse a próxima edición do certame literario que cada vez suma máis lectores e lectoras entre o alumnado da rede de colexios de Escolas Católicas, estas son as obras que resultaron finalistas na súa décimo sétima edición. No mes de abril de 2021 coñeceremos os gañadores e terá lugar o acto de entrega de dito galardón aos recoñecidos:

INFANTIL

A fraga do meu avó. Mamá Cabra. Galaxia.
Se che pica un mosquito. Jordi Gastó. Kalandraka.

1ª CATEGORÍA (1º, 2º EP)
Hércules e o xigante. Unha torre de lenda. Henrique López. Hércules de Ediciones
A banda de Raimunda. Pablo Nogueira e Manuel Uhía. Baía Edicións.

 

2ª CATEGORÍA (3º, 4º EP)
Animalia. 2 Branco. Xosé Tomás. Xerais.
Astro Rato e Lampadiña en Patacator Cocido. Fermín Solís. El Patito Editorial.

 

3ª CATEGORÍA (5º, 6º EP)
Conta nove estrelas. Andrea Maceiras. Xerais.
Os peloteiros. Patricia Mallo. Galaxia.

 

4ª CATEGORÍA
Unha cidade chamada perfecta. Helena Duggan. Traducida por Moisés Rodríguez. Sushi Books.
Maneiras de vivir. Luis Leante. Traducida por Belén Rodríguez Suárez. Rodeira-Edebé.

 

5ª CATEGORÍA
Aqueles momentos que perdemos. Xavier Estévez. Oqueleo.
Ardora. Beariz Maceira Abeleira. Urco Editora.

 

6ª CATEGORÍA
Beleza Vermella. Arantza Portabales. Galaxia.
Os nomes do vento. Juan Andrés Fernández. Fervenza.

Baía Edicións regala unha máscara cirúrxica con cada libro

A lectura como actividade individual non leva risco de contaxio; a compra de libros en librarías tampouco implica maior perigo que ir, por exemplo, polo pan, sempre que se manteñan as razoables medidas de protección xeral aconselladas pola administración sanitaria.

Se ademais, ao facerse cun libro, este leva no seu interior unha máscara de protección individual, podemos concluír que a actividade de ler é non só é recomendable en todo momento, tamén é aconsellable no actual estado de alarma para frear os efectos do contaxio do coronavirus.

Por iso, Baía Edicións, seguindo as medidas promovidas desde o inicio do estado de alarma, entregará unha máscara cirúrxica con cada libro adquirido a través da súa web até fin de existencias coas que conta.

Esta acción enmárcase na campaña xeral de fomento da lectura como actividade individual saudable e estimulante e do recoñecemento da importancia de todas as partes implicadas na súa creación e divulgación.

Accións de promoción da lectura que agora veñen complementar as levadas, xa nos primeiros días de confinamento absoluto, por Baía Edicións, cando liberou, co compromiso solidario de máis de catorce autoras, autores, ilustradoras e ilustradores e a colaboración dos medios de comunicación, dez libros para unha lectura en familia, que tan útiles resultaron tamén para seguir os plans lectores dos centros educativos, e puxo en marcha unha intensa campaña nas redes sociais de colaboradoras e colaboradores de todas as idades con actividades que tiñan como centro de actuación o libro galego e a súa lectura.

Ás accións postas en marcha, no momento máis crítico para o sector, como a decisión de suprimir os gastos de envío para pedidos online e que todas persoas interesadas puidesen facerse coa lectura desexada que até ese momento conseguían a través das librarías de proximidade, e que, a partir da semana que vén, se completará co agasallo de unha máscara de protección por cada pedido recibido, e que agora se manifestan tamén coa participación, xunto con outras editoras galegas, nas medidas de apoio ás librarías de proximidade que a distribuidora Consorcio Editorial Galego está implementando nesta semana das Letras Galegas para #DesconfinarALingua galega.